ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާޅޮސްމަޑުލު އުތުރުބުރީގެ ރަށްތަކަށް މިހާރު ކުރައްވަމުންގެންދަވާ ދަތުރުފުޅުގައި އެ އަތޮޅު އިންނަމާދޫ ވޮލީ ކޯޓު މިއަދު ހެނދުނު ހުޅުއްވައިދެއްވައިފިއެވެ.
އިންނަމާދޫ ވޮލީ ކޯޓު ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ އެތަން ބައްލަވާލައްވާފައެވެ. އިންނަމާދޫ ރައްޔިތުންނާއެކު ރޭ ބޭއްވެވި ބައްދަލުކުރެއްވުމުގައި، ޒުވާނުންނަށް ކުޅިވަރުގެ ދާއިރާއިން ބޭނުންވާ ވަޞީލަތްތައް ޤާއިމުކޮށްދެއްވުމަށް ޚާއްޞަ އަހަންްމިއްޔަތުކަމެއް ދެއްވައިގެން މަސައްކަތް ކޮށްދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރ އަތޮޅުގެ ވޮލީގެ ގިނަ ހަރަކާތްތަކެއް އިންނަމާދޫގައި ފަހަކަށްއައިސް ކުރިއަށްގެންދާއިރު، އިންނަމާދޫ ވަނީ އެ އަތޮޅުގައި އެންމެ ފަހުން ބޭއްވި އަތޮޅު ވޮލީ މުބާރާތުގައި ވެސް ވާދަކޮށްފައެވެ.
އިންނަމާދު ވޮލީ ކޯޓުގެ މަޝްރޫއަކީ ކުރީގެ ސަރުކާރުން ހުއްޓާލާފައި އޮތް މަޝްރޫއެކެވެ. ސަރުކާރުން ވަނީ މަސައްކަތް ހުއްޓިފަ ކުރިއަށްނުގެންދެވި ހުރި މަސައްކަތްތައް ދެ އަހަރުގެ ތެރޭގައި ނިންމަވާނެކަމަށް ހާމަކޮށްފައެވެ. މީގެ ކުރިންވެސް ނުނިމިހުރި ކުޅިވަރު ދަނޑުތަކުގައި މި ސަރުކާރުން ހަވާލުވެ ވަނީ ނިންމާފައެވެ.
ރާއްޖޭގެ އެކި ކަންކޮޅުތަކުގައި ކުޅިވަރު ވަސީލަތްތައް ގާއިމުކުރުމަކީ ރައީސުލްޖުމްހޫރިއްޔާ ހާއްސަ އިސްކަމެއް ދެއްވައިގެން ކުރައްވަމުން ގެންދަވާ މަސައްކަތްތަކެކެވެ. ސަރުކާރުން ވަނީ އަތޮޅުތެރޭގެ ކުޅިވަރު ކުޅޭތަންތަނުގެ ހާލަތު ރަނގަޅުކުރުމަށްޓަކައި ގިނަ މަސައްކަތްތަކެއް ކޮށްފައެވެ.
އެގޮތުން ވަސީލަތްތައް ގާއިމުކުރުމާއި ކުޅިވަރު ދަނޑުތަކުގެ މަރާމާތާއި ކުޅިވަރު ކުރިއަރުވާ ތަރައްގކުރުމަށް ސަރުކާރުން ވަނީ 255 މިލިއަން ރުފިޔާ ވޭތުވެދިޔަ އެއް އަހަރު ހޭދަކޮށްފައެވެ.