އަބަދުވެސް ބަލަނީ އެތުލީޓުންގެ ބޫޓަށް އަރައިގެން ކަންތައްތައް ކުރަން ކަމަށާއި، ވަރަށް ގިނަކަންކަން ކުރަން އެބަހުރިކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
ޕީއެސްއެމް "ފެށުން" ޕްރޮގްރާމުގައި ކުޅިވަރަށް ޚިދުމަތްކުރި ދުވަސްތަކުގެ ހަނދާންތައް އައުކުރައްވަމުން ރާފިޢު ވިދާޅުވީ ކުޅިވަރު ދާއިރާގައި ބޮޑަށް މަސައްކަތް ކުރެވުނީ ފަންނީ މަސައްކަތްތަކުގައި ކަމަށެވެ.
އެހެންކަމުން އެތުލީޓެއްގެ ނަޒަރުން ބަލާއިރު ކުޅިވަރުގެ ނިޒާމެއް އޮތުމާއި، މޮޅެތި ކުޅުންތެރިން އުފައްދާނެ ގޮތެއް ހޯދުމާއި، މޮޅެތި ކުޅުންތެރިންނަށް އިތުރަށް އިންވެސްޓު ކޮށްގެން އެ ކުޅުންތެރިން އިތުރަށް ކުރިއެރުވޭނެ ގޮތެއް ހޯދުން ވަރަށް މުހިންމުކަމަށް ވަޒީރު ވިދާޅުވިއެވެ.
އަދި ކުޅިވަރު ކުޅުންތެރިންގެ މެޑިކަލް އަދި އިންޝުއަރެންސްގެ ކަންތައްތަކަކީ ފާހަގަކުރެވޭ ކަންތައްތަކެއް ކަމަށް ރާފިޢު ވިދާޅުވިއެވެ. އަދި އޭރު އެ ވާހަކަތައް ވަރަށް ބޮޑަށް ކުޅިވަރުގެ ދާއިރާގެ ބޭފުޅުންނާއެކު ހިއްސާކޮށްފައިވާނެ ކަމަށް ވަޒީރު ވިދާޅުވިއެވެ.
"އެހެންވީމަ އަޅުގަނޑަށް މި ފުރުސަތު ރައީސް ދެއްވީމަ އަޅުގަނޑަށް ވިސްނުނީ މިއޮތް ހުރިހާ ދުވަހު އަޅުގަނޑު މި ދެއްކީ މި ވާހަކައޭ އެހެންކަމުން ދެން އެހެން ކަމެއް އަޅުގަނޑަކަށް ފޯކަސްވެސް ނުކުރެވޭނެ، އަޅުގަނޑުވެސް ޓްރައި ކޮށްލާނީއޭ އަޅުގަނޑުގެ މެކްސިމަމް މިއަށް ކޮންޓްރިބިއުޓްކޮށްލަން" ރާފިޢު ވިދާޅުވިއެވެ.
ވަޒީރެއްގެ މަގާމަށް އާދެވޭނެ ކަމަށް އޭރު ހީވެސް ނުކުރައްވާ ކަމަށާއި، މިކަންކަން އަމިއްލައަށް ތަޖުރިބާ ކުރެވިފައިވުމަކީ މަގާމު ގަބޫލުކުރަން ފަސޭހަވެގެންދިޔަ ސަބަބެއް ކަމަށް ރާފިޢު ވިދާޅުވިއެވެ. މިއީ އޭރު އަޑުއުފުލި ކަންތައްތައް ހަގީގަތަކަށް ހެއްދެވުމަށް ލިބުނު ފުރުސަތެއް ކަމަށް ރާފިޢު ވިދާޅުވިއެވެ.
ފަންނީ ރޮނގުން އެކިކަންކަމުގައި ކުރިޔަށްދިޔުމުގެ ވިސްނުން ވަރަށް ބޮޑަށް ގެންގުޅުނުކަމަށާއި އެހެން ނަމަވެސް ކަންކަން ރަނގަޅުކުރުމަށް ވަޒީރުކަމަށް ވަޑައިގެންނެވުމުގެ ކުރިން ކުޅިވަރަށް ހިދުމަތް ކުރެއްވި ދުވަސްވަރު ވަރަށް ގިނަ ހިޔާލުތަކެއް ހުށެހެޅިކަމަށް ވަޒީރު ވިދާޅުވިއެވެ.
"އަޅުގަނޑަށްވެސް ވަރަށް ބޮޑަށް އެތުލީޓުންނާއި ގާތުން މަސައްކަތް ކުރެވިފަހުރީ، އަޅުގަނޑު އަބަދުވެސް ބަލަނީ އެތުލީޓުންގެ ބޫޓަށް އަރައިގެން ކަންތައްތައް ކުރަން" ރާފިޢު ވިދާޅުވިއެވެ.
ކުޅިވަރު ވުޒާރާއާއި ހަވާލުވެވަޑައިގެން ކުޅިވަރުގެ ހުރިކަންކަން ހައްލުކުރުމަށްޓަކައި ކުޅުންތެރިންނާއި އެސޯސިއޭޝަންތަކާއި ވަރަށް ގާތުން ވަޒީރު ރާފިޢު ގެންދަވަނީ މަސައްކަތް ކުރަމުންނެވެ.