ފަލަސްޠީނުގެ މިނިވަންކަމަށް ޖިހާދުކުރާ ޙަމާސް ޖަމާޢަތުން ރަހީނުކޮށްފައި ތިބި ޔަހޫދީ އަސީރުން، ޣައްޒާ ޤަތުލުޢާންމުގެ ފުރަތަމަ ދުވަސްކޮޅު މިނިވަން ކުރުމަށް އެ ޖަމާާޢަތުން ހުށަހެޅި ކަމަށާއި، ނަމަވެސް ޔަހޫދީ ދައުލަތުގެ ހައްދުފަހަނައެޅި ބޮޑުވަޒީރު ބެންޖަމިން ނަތަންޔާހޫ އެ ކަމަށް އިންކާރުކޮށްފައިވާ ކަން ހާމަވެއްޖެއެވެ. މި ކަން ހާމަކޮށްފައި ވަނީ، އަސީރުން މިނިވަން ކުރުމުގެ މަޝްވަރާތަކުގައި ޔަހޫދީ ފައުޖު ތަމްސީލު ކުރި ކުރީގެ އިސް ޖެނެރަލެއް ކަމުގައިވާ ނިޓްޒާން އަލޯންއެވެ.
އެމެރިކާގެ ވޮޝިންގޓަންގައި ހުންނަ ތިންކް-ޓޭންކަކުން އިންތިޒާމުކުރި ޕެނަލް ޑިސްކަޝަނެއްގައި ވާހަކަދައްކަމުން އަލޯން ބުނީ، އެއްވެސް އިސްތިރާޖީ ގެއްލުމަކާ ނުލައި މީގެ އަހަރެއްހާ ދުވަސް ކުރިން ޤަތުލުޢާންމު ހުއްޓައިލައި، ގިނަ ބައެއްގެ ފުރާނަ ސަލާމަތްކުރުމުގެ ފުރުސަތު ނަތަންޔާހޫއަށް ލިބުނު ކަމުގައެވެ. ނަމަވެސް، އޭނާ އެ ކަމަށް އިންކާރު ކޮށްފައިވާ ކަން އަލޯން ހާމަކުރިއެވެ.
2023 އޮކްޓޫބަރުގައި ޙަމާސުން ދިން ޖިހާދީ ހަމަލާއާ ގުޅުވައި ނަތަންޔާހޫ ފެށި ޤަތުލުޢާންމުގައި ޣައްޒާއިން 74,000 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަލޯން ބުނީ، އެއްބަސްވުމަކަށް އައުމުގެ ކުރިން ފުރިހަމަ ކާމިޔާބީ ހޯދަންޖެހޭނެ ކަމަށް ބުނެ ނަތަންޔާހޫ ހަދާފައި ވަނީ ކަނޑައެޅިގެން ދޮގުތަކެއް ކަމުގައެވެ. އަދި، 2025 އޮކްޓޫބަރުގައި ޤަތުލުޢާންމު ހުއްޓައިލަން އެއްބަސްވުމެއް ހެދުމުގެ ކުރިން އެ ކަމަށް އެއްބަސްވި ނަމަ، ދެ ފަރާތުން ވެސް ގިނަ ޢަދަދެއްގެ ބަޔެއްގެ ފުރާނަ ސަލާމަތް ކުރެވުނިސް ކަން އަލޯން ފާހަގަކުރިއެވެ.
ޔަހޫދީ ދައުލަތުގެ ކުރީގެ ޑިޕްލޮމެޓެއް ކަމުގައިވާ އަލޯން ޕިންކްސް ވެސް ބުނީ، ޤަތުލުޢާންމު ހުއްޓައިލުމަށް ނަތަންޔާހޫ ގަސްދުގައި ހުރަސްއަޅާފައިވާ ކަމަށާއި، މިއީ ހަމައެކަނި ގެއްލުނު ފުރުސަތެއް ނޫން ކަމުގައެވެ. ޤަޠަރުގެ ބޮޑުވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލް-ޘާނީ ވެސް ވަނީ، ޤަތުލުޢާންމުގެ ކުރީކޮޅު އަސީރުން ބަދަލުކުރުމަށް ޙަމާސުން ހުށަހެޅި ހުށަހެޅުމަށް ޔަހޫދީންގެ އޮފިޝަލުން ދެކޮޅުހެދި ކަމުގައި ވިދާޅުވެފައެވެ.
މި ހިނގާ އޮކްޓޫބަރު މަހުގެ 27 ގައި ޔަހޫދީ ދައުލަތުގައި ބާއްވާ ޤާނޫނުހަދާ މަޖިލީހުގެ އިންތިޚާބާ ކައިރިވެފައިވާ މި ދަނޑިވަޅުގައި މި ވާހަކަތައް މީޑިއާއަށް ތިލަވި ނަމަވެސް، މީގެ ސަބަބުން އިންތިޚާބުގެ ނަތީޖާއަށް ބަދަލެއް އަންނާނެ ކަމަށް ޤަބޫލުނުކުރެވޭ ކަމަށް މަސްރަޙު ދިރާސާކުރާ ފަރާތްތަކުން ބުންޏެވެ. ސަބަބަކީ، ޙަމާސްގެ ޖިހާދު ހުއްޓުވަން ނަތަންޔާހޫގެ ސަރުކާރު ފޭލުވުމެވެ. އެ ކަމާމެދު ޔަހޫދީ ޢާންމުންގެ މެދުގައި ނަތަންޔާހޫއާއި އޭނާގެ ސަރުކާރަށް އޮތް ރުޅިވެރިކަން ވަނީ ބޮޑުވެފައެވެ.
މީގެ އިތުރުން، ޙަމާސުން ހަމަލާއެއް ދޭން އުޅޭ ކަމުގެ ޖާސޫސީ މަޢުލޫމާތު އެކުވެރި ޢަރަބި ޢިމާރާތުގެ (ޔޫއޭއީ) ރައީސް ޝައިޚް މުޙައްމަދު ބިން ޒާޔިދު އަލް-ނަހްޔާން، 2023 އޮކްޓޫބަރުގެ ކުރިން ނަތަންޔާހޫއާ ޙިއްޞާކުރެއްވި ކަމުގައި އިސްރާއީލުގެ ނޫސްތަކުން ވަނީ ރިޕޯޓުކޮށްފައެވެ. މި ކަމާ ގުޅިގެން ވެސް، ނަތަންޔާހޫގެ ސަރުކާރާ މެދު ޔަހޫދީ ޢާންމުންގެ މެދުގައި އޮތް ނުތަނަވަސްކަން ވަނީ އިތުރުވެފައެވެ. ޙަމާސްގެ ޖިހާދީ ހަމަލާގެ މަޢުލޫމާތު ކުރިން ނަތަންޔާހޫއަށް އެނގުނުކަމަށް ކޮށްފައިވާ ރިޕޯޓުތައް އޭނާ ވަނީ ދޮގުކޮށްފައެވެ. އަދި، ދާދިފަހުން ސިއްރުން ޔޫއޭއީއަށް ކުރި ދަތުރުގައި، އެއީ ދޮގެއް ކަމަށް މީޑިއާގައި ބުނުމަށް އޭނާ ޔޫއޭއީގެ ރައީސަށް ބާރުއެޅި ކަމުގައި ވެސް ބައެއް ރިޕޯޓުތައް ބުނެއެވެ.