ވާދޫގެ ގިނަ މަޝްރޫޢުތައް މިއަހަރު ނިންމަވާނެކަމަށް ވިދާޅުވެ ރައީސް ދެއްވީ ރައްޔިތުންނަށް އުއްމީދެއް
ރ.ވާދޫގެ ތަރައްޤީއަށް ރާވާފައިވާ ގިނަ މަޝްރޫޢުތައް މިއަހަރު ނިންމަވާނެކަމަށާއި، ދެން އެރަށަށް ވަޑައިގަންނަވާނީ އެމަޝްރޫޢުތަކުގެ ނިމުން ފާހަގަކުރެއްވުމަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ވާދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވާހަކަފުޅު ފެއްޓެވީ އެމަނިކުފާނު ރިޔާސީ އިންތިޚާބުގައި ވެވަޑައިގެންނެވި ވަޢުދުތައް ފުރިހަމަކޮށްދެއްވާނެކަމުގެ ޔަޤީންކަން ދެއްވަމުންނެވެ. އެމަނިކުފާނު ވަޢުދުވީ ފުއްދުމަށްކަމަށާއި، އެއީ ރަށުގެ ތަރައްޤީއަށް ރައްޔިތުންކުރާ އުންމީދުކަމަށް ރައީސް ފާހަގަކުރެއްވިއެވެ. ރ.ވާދޫއަކީ އަބަދުވެސް އަމިއްލަ އިސްނެގުމާއެކު ވަރަށް އުފެއްދުންތެރި ވިސްނުމާއެކު ގިނަ ކަންތައްތަކެއް ކުރާރަށެއްކަންވެސް ރައީސްގެ ވާހަކަފުޅުގައި ފާހަގަކުރެއްވިއެވެ.
"އަޅުގަނޑު ދޭނެ ޔަޤީންކަމަކީ މިސަރުކާރަކީ ތިބޭފުޅުންގެ ތި ތަރައްޤީގެ ވިސްނުމުގައި އަމިއްލައަށް އިސްނަގައިގެން ކުރާ މަސައްކަތަށް ފުރިހަމައަށް އެއްބާރުލުންދޭނެ ސަރުކާރެއްކަން". ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، ވާދޫން ގޯތި ދޫކުރުމުގައި މިވަގުތު އޮތް ދައްޗަކީ އެސަރަހައްދުގައި ހުރި ކުނިކޮށި އެހެން ސަރަހައްދަކަށް ބަދަލުކުރުންކަމަށާއި، ލަސްތަކެއްނުވެ އެކަންކަން އަވަހަށް ހައްލުކޮށް ގޯތި ދޫކުރެވޭނެކަމަށެވެ. އަދި ކުނި މެނޭޖުކުރުމުގެ މަސައްކަތްވެސް ވަރަށް އަވަހަށް ފެށޭނެކަމަށް އެމަނިކުފާނު ވިދާޅުވިއެވެ. މީގެ އިތުރުން އެރަށުގެ ގިރާ ސަރަހައްދުގެ މައްސަލައަށް އަވަސް ޙައްލެއް ބޭނުންވާކަމަށާއި، އެކަމުގައި އެމްޓީސީސީއަށް އޮތް ދައްޗަކީ ބޮޑު ހިލަ ލިބުމުގެ ދަތިކަންކަމަށް ރައީސް ވިދާޅުވިއެވެ. ބޮޑު ހިލަ ސަޕްލައިކުރުމުގައި ދަތިތަކެއް ހުރުމުން، މާލީ ވުޒާރާއާއި އެމްޓީސީސީއާއި އެސްޓީއޯ ގުޅިގެން މަސައްކަތްތަކެއް ފަށާފައިވާކަމަށާއި، ބަލްކުކޮށް ބޮޑުހިލަ ގެނެސް، ވާދޫއާއި އެނޫންވެސް ރަށްރަށުގެ ރަށްގިރުމާއި ބަނދަރު ހެދުމުގެ މަސައްކަތްތައް އަލުން ފަށައިގަނެގެން ކުރިއަށް ގެންދަވާނެކަމަށް ރައީސް ވިދާޅުވިއެވެ. އެގޮތުން ވާދޫގެ ހުއްޓިފައިވާ މަސައްކަތްވެސް ވަރަށް އަވަހަށް ފެށޭނެކަމަށާއި، ވާދޫ ރައްޔިތުން އެދޭގޮތަށް ބަނދަރު ތަރައްޤީކޮށްދެއްވާނެކަމަށްވެސް ރައީސް ވިދާޅުވިއެވެ.
"އިރާދަކުރެއްވިއްޔާ ސްކޫލަށް ބޭނުންވާ އިތުރު ކޮމްޕިއުޓަރ ލެބާއި ސްޓާފްރޫމް ހެދުމަށް މަގުފަހިކޮށްދިނުމަށް ސަރުކާރުގެ ވުޒާރާތައް މެދުވެރިކޮށް ކޮށްދޭނަން. ކައުންސިލް އަދި ރައްޔިތުން ބޭނުންވާގޮތަށް ފުރިހަމަ އެއްބާރުލުން ދޭނަން. ސްކޫލަށް ޖާގަ އިތުރުކުރުންކަމަށްވިޔަސް ވަސީލަތް އިތުރުކުރުންވެސް ކުރިއަށްދާނެ. ހަމަ އެހެންމެ ސިއްޙީ ދާއިރާއަށްވެސް. ހުރިހާ ރަށަކަށް ލެބޯރެޓަރީ އިތުރުކޮށް ޚިދުމަތްދޭ ވަގުތު އިތުރުކޮށްދިނުން އެއީ އަޅުގަނޑު ވެފައިވާ ވަޢުދެއް. އެކަން ކުރިއަށްދާނެ". ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ އެމަނިކުފާނު ރަށްރަށަށް ދަތުރުކުރައްވަނީ ރައްޔިތުން ބޭނުންވާ ކަންކަންކޮށްދިނުމުގެ ޔަޤީންކަން ދެއްވުމަށްކަމަށެވެ. އަދި ވަޒީރުންވެސް އެމަނިކުފާނުގެ އަރިހުގައި ދަތުރުކުރައްވަނީ ރައްޔިތުން ބޭނުންވާގޮތަށް މަޝްރޫޢުތައް ހިންގައި ނަތީޖާ ނެރެދިނުމަށްކަމަށް ރައީސް ވިދާޅުވިއެވެ.
ރައީސް ވިދާޅުވީ ވާދޫގައިވެސް ހުރިހާ ދާއިރާއަކުން ކުރަން ހުރި މަސައްކަތްތައް އަމަލީގޮތުން ހިނގައި މިއަހަރު ބައެއް މަޝްރޫޢުތައް ނިމޭނެކަމަށެވެ.
ވާދޫއަށް ބިން އިތުރުކުރުމަށް ރައްޔިތުން ބޭނުންވާކަން ފާހަގަކުރައްވާ ރައީސް ވިދާޅުވީ މިއަހަރު ނުވަތަ އަންނަ އަހަރު ބިން ހިއްކުމުގެ މަސައްކަތް ކުރިއަށްގެންދަވާނެކަމަށެވެ. އަދި ފުލުހުންގެ ޚިދުމަތް ފުޅާކުރުމަށްވެސް މަޝްރޫޢެއް ފަށާފައިވާކަމަށާއި، ހުރިހާ ރަށަކަށް ބޭނުންވާ މިންވަރަށް އަދި ސައިޒަށް ފުލުހުންގެ މަރުކަޒު ޤާއިމްކުރައްވާނެކަމަށް ރައީސް ވިދާޅުވިއެވެ. މިއަހަރުގެ ނިޔަލަށް ރާއްޖޭގެ ހުރިހާ ރަށެއްގައި އެރަށަކަށް އެކަށީގެންވާ މިންވަރަށް ފުލުހުންގެ އަމިއްލަ ޢިމާރާތުގައި ޚިދުމަތް ފަށާނެކަމަށާއި، އޭގެތެރޭގައި ވާދޫވެސް ހިމެނޭކަން ރައީސް ފާހަގަކުރެއްވިއެވެ.
ކަރަންޓުގެ މައްސަލައަށްވެސް ހައްލު ގެނައުމަށް މަޝްރޫޢެއް ފަށްޓަވާފައިވާކަމަށާއި، ރޯދައިގެ ކުރިން ހުރިހާ ރަށަކަށް އެ މައްސަލަ ޙައްލުކޮށްދިނުމަށް މަސައްކަތްކުރައްވާކަމަށް ރައީސް ވިދާޅުވިއެވެ.
ވާދޫއަކީ އަމިއްލައަށް އިސްނަގައިގެން އިއާދަކުރަނިވި ހަކަތައިގެ މަސައްކަތް ކުރާރަށެއްކަން ފާހަގަކުރައްވާ ރައީސް ވަނީ އެކަމަށް ހިތްވަރުދެއްވާ މަރުހަބާ ދަންނަވާފައެވެ.
2028 ވަނަ އަހަރުގެ ނިޔަލަށް މުޅި ރާއްޖޭގެ ކަރަންޓުގެ ޚިދުމަތުގައި މަދުވެގެން ތިންބައިކުޅަ އެއްބައި ނުވަތަ %33 އިއާދަކުރަނިވި ހަކަތައަށް ބަދަލުކުރުމަށް ކުރާ މަސައްކަތުގެ ދަށުން ވާދޫގެ ހުރިހާ ހަކަތައެއް އިއާދަކުރަނިވި ހަކަތައަށް ބަދަލުކުރަން ބޭނުންވާކަމަށް ރައީސް ވިދާޅުވިއެވެ. އެކަމަށް ރައްޔިތުން ބޭނުންވާނަމަ ގެތަކާއި ސަރުކާރުގެ ޚިދުމަތްދޭ ތަންތަން އިއާދަކުރަނިވި ހަކަތައަށް ބަދަލުކުރެވޭނެކަމަށް އެމަނިކުފާނު ވިދާޅުވިއެވެ.
ސަރުކާރު އޮންނާނީ ރައްޔިތުންގެ ފަޅީގައިކަމަށާއި، ތަރައްޤީއަށް ފުރިހަމަ އެއްބާރުލުން ދެއްވާނެކަމަށް ރައީސް ތަކުރާރުކުރެއްވިއެވެ.
އަދި ދެން ވާދޫއަށް ވަޑައިގަންނަވާނީ ގިނަ މަޝްރޫޢުތަކެއް ނިމި އެކަން ފާހަގަކުރުމަށްކަމަށް އުންމީދުކުރައްވާކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.