މިއަހަރުގެ ފިތުރު ޒަކާތުގެ ގޮތުގައި މާލެއިން ލިބުނު ފައިސާ މާލޭގައި ފަޤީރުންގެ ގޮތުގައި ނަންނޯޓްކޮށްފައިވާ މީހުންނަށް މިއަދު ބައްސަވަން ފަށްޓަވައިފިއެވެ.
އިސްލާމިކް މިނިސްޓްރީން ވިދާޅުވީ، ޒަކާތުގެ ފައިސާ މިއަދާއި މާދަމާ ހެނދުނު 10:30 ން ފެށިގެން ދޫކުރެއްވުމަށް ހަމަޖެހިފައިވާކަމަށެވެ. މާލެ، ވިލިމާލެ އަދި ހުޅުމާލޭގައި ދިރިއުޅޭ ފަރާތްތަކުގެ ތެރެއިން ފަޤީރުންގެ ގޮތުގައި ނަންނޯޓްކޮށްފައިވާ ފަރާތްތަކަށް ފައިސާ ދޫކުރައްވާނީ އިސްލާމިކް މިނިސްޓްރީންނެވެ.
އިސްލާމިކް މިނިސްޓްރީން ވިދާޅުވީ ފައިސާއާ ޙަވާލުވުމަށް ބަދަލުގައި އެހެން މީހަކު ފޮނުވާނަމަ، ފަޤީރުންގެ ލިސްޓްގައި ރަޖިސްޓްރީވެފައިވާ ފަރާތުގެ އައިޑީކާޑު ގެނައުމުން އެފަރާތަކަށް ފައިސާ ދޫކުރައްވާނެކަމަށެވެ. އަދި ޒަކާތު ފައިސާއާ ޙަވާލުވާން އަންނައިރު ފަޤީރުންގެ ލިސްޓްގައި ހިމެނިފައިވާކަމުގެ ސްލިޕްކޮޅާއި ފައިސާއާ ޙަވާލުވާ މީހާގެ އައިޑީކާޑު ގެންނަންޖެހޭކަމަށް އެމިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން ވިދާޅުވީ ކަނޑައެޅިފައިވާ މުއްދަތުގެ ތެރޭގައި ފައިސާ ނުގެންދާ ފަރާތްތަކަށް އެމުއްދަތުގެ ފަހުން ފައިސާ ދޫކުރައްވާގޮތަށް ހަމަޖެހިފައި ނުވާކަމަށެވެ.
އަތޮޅުތަކުގައި ޒަކާތުގެ ފައިސާ ދޫކުރެއްވުން އޮންނާނީ ކައުންސިލްގެ އިދާރާތަކުންނެވެ.
މިހިނގާ 1437 ވަނަ އަހަރު މާލެ، ވިލިމާލެ، ހުޅުމާލޭގައި ފަޤީރުންގެ ގޮތުގައި ފަސްހާސް ނުވަސަތޭކަ މީހުން ރަޖިސްޓްރީކޮށް ލިސްޓް ކޮށްފައިވާކަމަށް އިސްލާމިކް މިނިސްޓްރީން ވިދާޅުވެއެވެ.