ޑޮމެސްޓިކް ފަތުރުވެރިކަމަށް ޚާއްސަކޮށްގެން "ރަށު އެކްސްޕޯ" ބާއްވަނީ

ލޯކަލް ކައުންސިލްތަކާއި ދިވެހިންނަށް އަމާޒުކޮށްގެން "ރަށު އެކްސްޕޯ" ގެ ނަމުގައި ޚާއްސަ އެކްސްޕޯއެއް ބޭއްވުމަށް ނިންމައިފިއެވެ. މި އެކްސްޕޯ އޮންނާނީ އަންނަ މަހުގެ 13 އިން 15 އަށް ހުޅުމާލޭ ސެންޓްރަލް ޕާކުގައެވެ.

ރަށު އެކްސްޕޯ އިންތިޒާމްކުރަނީ "ޓްރެވެލް ގާއިޒް" ގެ ފަރާތުންނެވެ. މި އެކްސްޕޯއަކީ ރާއްޖޭގެ ޑޮމެސްޓިކް ފަތުރުވެރިކަމަށް ޚާއްސަކޮށްގެން ބާއްވާ އެކްސްޕޯއެކެވެ.

މި އެކްސްޕޯގައި ރާއްޖޭގެ ހުރިހާ ރަށަކަށް ވަނީ އެކްސްޕޯއަށް އައިސް އެ ރަށްރަށް އިޝްތިހާރުކުރުމަށް ދައުވަތު ދީފައެވެ. އެކްސްޕޯ އިންތިޒާމްކުރާ ފަރާތުން ބުނީ އެކްސްޕޯގެ ތެރެއިން އެ ރަށްރަށާއި، ރަށްރަށުގައި ހުރި ޚާއްސަ ސިފަތަކާއި، ރަށްރަށުގެ ސަޤާފަތް އިޝްތިހާރުކުރުމުގެ ފުރުޞަތު ލިބިގެންދާނެކަމަށެވެ.

ރާއްޖޭގައި އެއް ނަންކިޔާ އެއްރަށަށްވުރެ ގިނަ ރަށްރަށް ހުންނައިރު އެކްސްޕޯގެ ތެރެއިން އެކްސްޕޯއަށް ޒިޔާރަތްކުރާ ފަރާތްތަކަށް މިފަދަ މައުލޫމާތު ލިބިގެންދާނެއެވެ. އަދި ރަށްރަށުގައި ހުރި ގެސްޓްހައުސްތަކުން ދިވެހިންނަށް ޚާއްސަކޮށްގެން ކުރިއަށްގެންދާ ޕެކޭޖްތަކުގެ މަޢުލޫމާތުތައްވެސް ލިބިގެންދާނެއެވެ.

މި އެކްސްޕޯގައި ގާތްގަނޑަކަށް 40 އާއި 60 އާ ދެމެދުގެ އަދަދަކަށް ރަށްރަށުން ބައިވެރިވާނެކަމަށް އެކްސްޕޯ އިންތިޒާމްކުރާ ފަރާތުން ވަނީ ބުނެފައެވެ.