ސަރަހައްދީ ފެންވަރުގައި ރާއްޖެއަށް ވޮލީބޯޅައިން ބޮޑެތި ކާމިޔާބީތައް ކުރިމަގުގައި ހޯދިދާނެ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް ވިދާޅުވެއްޖެއެވެ.
ވޮލީގެ ތަސައްވަރާ ގުޅޭގޮތުން ވާހަކަދައްކަވަމުން ލަތީފް ވިދާޅުވީ އުއްމީދަކީ ކުރިއަށް އޮތް 10 އަހަރުގެ ތެރޭގައި ސާފް ގޭމްސް އާއި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ފައިނަލްގައި ކުޅުން ކަމަށެވެ. އަދި އެ މުއްދަތުގެ ތެރޭގައި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ގެ މުބާރާތް ކާމިޔާބުކުރުމަށް މަސައްކަތް ކުރައްވާނެ ކަމަށްވެސް އެ އެސޯސިއޭޝަނުގެ ރައީސްގެ މަގާމުވެސް އަދާކުރައްވަމުން އަންނަ ލަތީފް ވިދާޅުވިއެވެ.
"މިހާރު ފިރިހެން ޓީމަށް ވުރެން ބޮޑަށް ކުރިއަރައިފި އަންހެން ޓީމު، އަނެއްހެން ބުނާކަމުގަ ވާނަމަ، އަންހެން ޓީމު ވެސް ކާވާގަ މިވަނީ ސިލްވަރ މެޑަލް ހޯދާފަ، އަދި އަޅުގަނޑުމެން ފިރިހެން ޓީމު ވެސް މިވަނީ ސިލްވަރ މެޑަލް ހޯދާފަ." ލަތީފް ވިދާޅުވިއެވެ.
ސާކް ސަރަހައްދުގައި ހިމެނޭ ގައުމުތަކުގެ ތެރެއިން ފރިހެން ޓީމަށް ވުރެ އަވަހަށް ރާއްޖޭގެ ގައުމީ އަންހެން ވޮލީ ޓީމުން ކާމިޔާބު ހޯދާނެ ކަމަށް ގަބޫލުކުރައްވާ ކަމަށް ލަތީފް ވިދާޅުވިއެވެ.
ލަތީފް އިތުރަށް ވިދާޅުވީ ރާއްޖޭގެ ވޮލީގެ ތަފާސްހިސާބުތަކަށް ބަލާއިރު ފރިހެނުންނަށް ވުރެ ގިނައިން އަންހެނުން ވޮލީ ކުޅޭ ކަމަށެވެ. އަދި މި ވަގުތު ރާއްޖޭގައި ކުޅޭ ކުޅިވަރުގެ ތެރެއިން ދެ ޖިންސުގެ މެދުގައި އެންމެ ގިނަ މީހުން ކުޅޭ، އަދި އެންމެ ތާއިދު ބޮޑު, އެންމެ މަގުބޫލު ކުޅިވަރަކީ ވޮލީ ކަމަށް ލަތީފް ވަނީ ވިދާޅުވެފައެވެ.