އެޓްމޯސްފިއަރ ފައުންޑޭޝަނަށް 3 އަހަރު: މުޖުތަމަޢުގެ ހުރިހާ ދާއިރާތަކަކުން ގިނަ އެހީތަކެއް

"އެޓްމޯސްފިއަރ ފައުންޑޭޝަން" ގެ ނަމުގައި އަމިއްލަ ޖަމްޢިއްޔާއެއް އުފައްދާ، އެ ޖަމްޢިއްޔާގެ މަސައްކަތްތައް ފެށީ 2021 ވަނަ އަހަރުގެ ޑިސެމްބަރު މަހުއެވެ.

ވޭތުވެދިޔަ 3 އަހަރު ފައުންޑޭޝަންގެ މަސައްކަތްތައް ފުޅާކޮށް، އެކިއެކި ދާއިރާތަކުން ތަފާތު 18 ޕްރޮޖެކްޓެއްވަނީ ހިންގާފައެވެ. މިއިން ކޮންމެ ޕްރޮޖެކްޓަކީ މުޖުތަމަޢުގައި އެންމެ ބޮޑަށް އެހީތެރިކަން ބެނުންވާ ގްރޫޕްތަކަށް ޚާއްސަކޮށް ހިންގި ޕްރޮގްރާމްތަކެވެ.

އެޓްމޯސްފިއަރ ފައުންޑޭޝަންގެ އެންމެ ފުރަތަމަ ޕްރޮޖެކްޓަކީ އިމާދުއްދީން ސްކޫލްގެ ޚާއްސަ އެހީތެރިކަމަށް ބޭނުންވާ ކުދިންގެ "ޖުވެލް ސެންޓަރ"ގައި، ކެއްކުމުގެ ހުނަރު ދަސްކޮށްދިނުމަށް އެ ސެންޓަރުގައި ޤާއިމުކުރި ބަދިގޭގެ މަސައްކަތްތަކެވެ.

އެއަށްފަހު، އަތޮޅުތަކަށްވެސް ފައުންޑޭޝަންގެ ޕްރޮގްރާމްތައް ވަނީ ފުޅާކޮށްފައެވެ.

ތުއްތުކުދިންނަށް ލިޔަންކިޔަން ދަސްކޮށްދިނުމުގައި އިތުރު އެހީދޭނެ ގޮތްތައް ދަސްކޮށްދިނުމަށް މުދަށްރިސުންނާ ބެލެނިވެރިންނަށް ޚާއްސަކޮށް ޕްރޮގްރާމްތައް ފަރުމާކޮށް ދަނީ ހިންގަމުންނެވެ. އަދި ދަޢުލަތުގެ ބެލުމުގެ ދަށުގައި ތިބޭ ކުދިންނަށް ކޮމްޕިއުޓަރާއި، ކިޔަވުމަށް އެހީވުމަށް ބޭނުންވާ ސާމާނުވެސް ހަދިޔާކޮށްފައިވެއެވެ.

މީގެއިތުރުން ދުޅަހެޔޮ ސިއްޙަތަކަށް މަގުފަހިކުރުމަށް މަޢުލޫމާތު ދިނުމާއި ހޭލުންތެރިކުރުމުގެ ޕްރޮގްރާމްތަކުގެ އިތުރުން، 3 ރަށުގައި ހެލްތު ކޭމްޕްވެސް ވަނީ ބާއްވާފައެވެ.

އެޓްމޯސްފިއަރ ފައުންޑޭޝަނަށް 3 އަހަރު ފުރުން ފާހަގަކުރުމަށް ބޭއްވި ހަފްލާގައި އެ ފައުންޑޭޝަންގެ ނައިބުރައީސް ޢަބްދުލްޢަޒީޒް ޢަބްދުލް ޙަކީމް ވިދާޅުވީ، އެ ފައުންޑޭޝަންގެ އެންމެ ބޮޑު ބޭނުމަކީ މުޖުތަމަޢުގެ ހުރިހާ އުމުރުފުރާއެއްވެސް ހިމެނޭހެން ޕްރޮގްރާމްތައް ހިންގުންކަމަށެވެ. ފައުންޑޭޝަންގެ މަސައްކަތްތައް ކާމިޔާބުކަމާއެކު ގެންދެވުމުގެ އެންމެ ބޮޑު ސަބަބަކީ، ޕްރޮގްރާމްތަކުގެ ބައިވެރިންގެ ޝައުގުވެރިކަންކަމަށް ޢަބްދުލްޢަޒީޒް ވިދާޅުވިއެވެ.

"ޕްރޮގްރާމެއް ފަށާފައި ދުލެއް ނުކޮށްލަން. ހިނގާ ނުހިނގާ ގޮތް ބަލާ، އޭގެއިން ނަތީޖާއެއް އެބަ ނެރެން. ޕްރޮގްރާމްތައް މިހާ ކާމިޔާބުކޮށް މި ގެންދެވެނީ ބައިވެރިންގެ ފަރާތުން ލިބޭ އެހީއާއި އެ ޝައުގުގެ ސަބަބުން." އެޓްމޯސްފިއަރ ފައުންޑޭޝަންގެ ނައިބުރައީސް ޢަބްދުލްޢަޒީޒް ޢަބްދުލް ޙަކީމް ވިދާޅުވިއެވެ.

އެޓްމޯސްފިއަރ ފައުންޑޭޝަންއިން ދެން އެންމެ އިސްކަމެއް ދޭ އެއްކަމަކީ، ރަށްރަށުގައި ދިރިއުޅޭ އަންހެނުންނަށް، ތަފާތު ހުނަރުތައް ދަސްކޮށްދީ އެމީހުން އަމިއްލައަށް އާމްދަނީ ހޯދޭނެ މަގު ފަހިކޮށްދިނުމެވެ.

އެގޮތުން ހދ. ވައިކަރަދުއާއި ށ. ގޮއިދޫގައި، ސޮފްޓް ޓޯއީސް ހަދަން ދަސްކޮށްދޭ ޕްރޮގްރާމް އަދި އުކާލާ އެއްޗެހިން ތަކެތި ހަދަން ދަސްކޮށްދިނުމުގެ ޕްރޮގްރާމްތައްވެސް ވަނީ ހިންގާފައެވެ. މި ތަކެތި މާކެޓްކޮށް ވިއްކޭނެ މަގުވެސް ދަނީ ފަހިކޮށްދެމުންނެވެ.

އެ ފައުންޑޭޝަންއިން އެންމެ ދިގު މުއްދަތަށް އަދި އެންމެ ބޮޑު ޕްރޮޖެކްޓެއްގެ ގޮތުގައި ހިންގަމުންދަނީ، ރާއްޖޭގައި އޮނު އާލާކުރުމަށް ކުރިއަށްގެންދާ "ބޭމްބޫ ޕްރޮޖެކްޓް"ގެ މަސައްކަތެކެވެ. އޮނަކީ ޖައްވުގައި ވައި ސާފުކޮށްދިނުމަށް އެންމެ ބޮޑަށް އެހީތެރިވެދޭ ވިނައިގެ ބާވަތެކެވެ.

މި ޕްރޮޖެކްޓްގެ ދަށުން ހދ. ވައިކަރަދުއާއި ށ. ގޮއިދޫގައި އޮނު އާލާކުރުމުގެ ޕްރޮގްރާމް ދަނީ ކުރިއަށްގެންދަމުންނެވެ. އެ ފައުންޑޭޝަންގެ އަމާޒަކީ މި މަސައްކަތުގައި، ވީހާވެސް ގިނަ ރަށްތަކަށް އޮނު ގަސް ފޯރުކޮށްދިނުމެވެ.

މީގެއިތުރުން ވައިކަރަދޫގެ ފަރުގެ ސަރަޙައްދާއި ކުޅި ސަރަޙައްދަށް ތިމާވެށީގެ ގޮތުން އަންނަ ބަދަލުތައް ދެނެގަތުމުގެ ދިރާސާއެއްވެސް އެ ފައުންޑޭޝަނުން ދަނީ ކުރިއަށްގެންދަމުންނެވެ.

އެޓްމޯސްފިއަރ ފައުންޑޭޝަންގެ ޕްރޮޖެކްޓްތައް ވަކިވަކި ފަރުދުންނާ، ސްކޫލް، ޖަމްޢިއްޔާ ޖަމާޢަތްތައް އަދި ކައުންސިލްތަކަށް އަމާޒުކޮށް ކުރިއަށްގެންދެއެވެ.