ޣައްޒާއަށް ދޭ ހަމަލާތައް މެދުކަނޑާލަން ނިންމަން މެދުވެރިވެދިން ފަރާތްތަކުގެ އަގު ވަޒަންކުރަން: ރައީސް

ޣައްޒާއަށް ދޭ ހަމަލާތައް މެދުކަނޑާލަން ނިންމި ނިންވެމަށް މަރުހަބާ ވިދާޅުވެ، އެކަމުގައި މެދުވެރި ވެދިން ފަރާތްތަކުން ކުރި މަސައްކަތް ފާހަގަ ކުރައްވައި، އެ ފަރާތްތަކުގެ އަގު ވަޒަންކުރައްވާ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިގޮތަށް ވިދާޅުވީ، ޣައްޒާއަށްދޭ ހަމަލާތައް ހުއްޓާލަން ނިންމުމާއި ގުޅިގެން، އެ މަނިކުފާނުގެ ޝުޢޫރުފާޅުކުރައްވައި ސޯޝަލް މީޑިއާގައި ކުރެއްވި ޕޯސްޓެއްގައެވެ.

މި ޕޯސްޓުގައި އެމަނިކުފާނު ވަނީ، ހަމަލާތައް ހުއްޓާލުމަކީ ހިތްޕުޅަށް ލިބިވަޑައިގަތް ހަމަޖެހުމެއްގެ ގޮތުގައި ސިފަކުރައްވައިފައެވެ.

ހަމަލާތައް ހުއްޓާލުމަށް ނިންމި ނިންމުން ދެމެހެއްޓުމަށާއި، ގެދޮރު ގެއްލިފައިވާ މީހުންނަށް އެމީހުންގެ ވަޒަނަށް އަނބުރާ ދެވޭނެ ފުރުޞަތު ފަހިކޮށްދިނުމަށާއި، އިންސާނީ އެހީ އަށް ފުރުޞަތު ދިނުމަށް، ބައިނަލްއަޤުވާމީ މުޖުތަމަޢުގެ ކިބައިން އެމަނިކުފާނު އެދިވަޑައިގެންނެވިއެވެ. އެމަނިކުފާނު ވަނީ، އިސްރާއީލުން ފަލަޞްޠީނަށް ދިން ހަމަލާތަކުގައި އެ ޤައުމުގެ ރައްޔިތުންނަށް ލިބުނު ގެއްލުމުގެ ބަދަލުދޭން ޖެހޭނޭކަމަށް ވިދާޅުވެފައެވެ. އަދި އިސްރާއީލުން ދިން ހަމަލާތަކުގައި ސުންނާފަތިވެފައިވާ ޢިމާރާތްތަކާއި ބިނާރު، އަލުން އާރާސްތުކުރުމަށް ބޭނުންވާ އަވަސް އެހީ ފަލަޞްޠީނަށް ފޯރުކޮށްދިނުމަށް ވެސް އެމަނިކުފާނު ގޮވައިލެއްވިއެވެ.

ފާއިތުވެ ދިޔަ 15 މަސް ދުވަހުގެ ތެރޭގައި ދިވެހިރާއްޖެއިން ވަނީ، ބައިނަލްއަޤުވާމީ އެކި މަންސަތަކުގައި ފަލަޞްޠީނުގެ އުޚުއްވަތްތެރި ރައްޔިތުންގެ ޙައްޤުގައި ގިނަ މަސައްކަތްތަކެއް ކޮށްފައެވެ. އެގޮތުން، އދގެ ސަލާމަތީ މަޖިލީހުގެ 79 ވަނަ ސެޝަންގައި ތަޤުރީރުކުރައްވަމުން ރައީސުލްޖުމްހޫރިއްޔާ ވަނީ ޤައުމަކުން އިންސާނީ ޙައްޤުތަކަށް އަރައިގަންނަ ހިނދު، އެކަން ތަޙައްމަލުކޮށްގެން ތިބެގެން ނުވާނެ ކަމަށް ވިދާޅުވެފައެވެ. އަދި އެފަދަ ޙާލަތެއްގައި، އެ ޤައުމެއްގެ ކުޑަބޮޑު މިނަކީ ނުވަތަ އެ ޤައުމެއްގެ މުއްސަނދިކަމަކީ ބަހަނާއަކަށް ވެގެން ނުވާނޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ޤާނޫނުގެ ވެރިކަން ނެގެހެއްޓުމުގެ މުހިއްމުކަން ފާހަގަކުރައްވައި، ރައީސުލްޖުމްހޫރިއްޔާ ވަނީ އދ.ގެ ފުރިހަމަ މެންބަރުކަން ފަލަސްޠީނަށް ދިނުމަށް ގޮވާލައްވައިފައެވެ. މީގެ އިތުރުން، ފަލަސްތީނުގައި ހިންގަމުންގެންދިޔަ ޤަތުލުޢާންމު އާ ދެކޮޅަށް ބައިނަލްއަޤުވާމީ ކޯޓުތަކަށް ހުށަހެޅި ބޮޑެތި މައްސަލަތަކުގައި، ފަލަޞްޠީނުގެ ރައްޔިތުންގެ ޙައްޤުގައި ވަކާލާތު ކޮށްދިނުމަށް، ދިވެހިރާއްޖެއިން ވަނީ ތަދައްޚުލުވެފައެވެ.

ފާއިތުވި 15 މަސް ދުވަހު ފަލަސްޠީނުގެ ޣައްޒާގައި ކުރަމުންދާ ހަނގުރާމަ ހުއްޓާލައި އަސީރުން ބަދަލު ކުރުމަށް ޔަހޫދީ ދައުލަތާއި ޣައްޒާގައި ވެރިކަންކުރާ ޙަމާސް ޖަމާޢަތުން އެއްބަސްވުމާއެކު ޣައްޒާގެ މުސްލިމުން ނަސްލުހޭދު ކުރުމަށް ޔަހޫދީ ދައުލަތުން ހިންގަމުންދާ ލާއިންސާނީ ޢުދުވާން ނިމުމަކަށް އަންނާނެ ކަމުގެ އުންމީދު ވަނީ އައު ވެފައެވެ.

ޔަހޫދީ ފައުޖުން ޣައްޒާގައި ޢުދުވާން ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޢުދުވާން ފަށާފައި ވަނީ އެ ސަހަރުގައި ވެރިކަން ކުރާ ޙަމާސް ޖަމާޢަތް ނައްތައިލުމުގެ ނަމުގައެވެ. ޣައްޒާގެ މުސްލިމުން ޝަހީދުކޮށް ނެތިކޮށްލުމަށް ޢުދުވާނީ ޙަމަލާތައް ފަށާފައި ވަނީ، އެ ދުވަހު ޙަމާސްގެ މުޖާހިދުން ޒަޔަނިސްޓުންނަށް އަމާޒުކޮށް ޖިހާދީ ޙަމަލާތަކެއް ދިނުމާ ގުޅިގެންނެވެ. އެއީ، ޔަހޫދީންގެ އަޅުވެތިކަމާއި އިސްތިޢުމާރީ ވެރިކަމަށް ކެތް ނުކުރެވިގެން ޙަމާސްގެ މުޖާހިދުން ދީފައިވާ ޙަމަލާއެކެވެ. އެ ދުވަހު ޙަމާސުން ވަނީ 250އެއްހާ މީހުން ރަހީނުކޮށްފައެވެ.

ހަމަލާ ހުއްޓައިލުމާ ގުޅޭގޮތުން ޙަމާސްގެ މުޖާހިދުންނާއި ޔަހޫދީންނާ ދެމެދު ކުރަމުންދާ މަޝްވަރާތަކުގައި މެދުވެރިންގެ ގޮތުގައި ބައިވެރިވެ، މަޝްވަރާތައް ވިލަރެސް ކުރަމުން ދަނީ ޤަޠަރާއި މިޞްރު ގުޅިގެންނެވެ. އެ މަޝްވަރާތަކުގައި ޔަހޫދީންގެ އެންމެ ބޮޑު މަދަދުގާރު، އެމެރިކާއިން ވެސް ބައިވެރިވެއެވެ. ފާއިތުވި ދުވަސްތަކުގައި މަޝްވަރާތަކުގައި ބޮޑެތި ކުރިއެރުންތައް ލިބި, ޙަމަލާ ބަދަލުކުރުން ހުއްޓާލައި އަސީރުން ބަދަލުކުރުމުގެ އެއްބަސް ވުމަކާ ހަމައަށް އާދެވިފައި މި ވަނީ އެމެރިކާގެ އިންތިޚާބީ ރައީސް ޑޮނަލްޑް ޓްރަންޕު މަޤާމާ ޙަވާލުވެވަޑައިގަތުމަށް ފަސް ދުވަހަށް ވެފައި ވަނިކޮށެވެ. ޓްރަންޕު ވަނީ އޭނާ މަޤާމާ ޙަވާލުވުމުގެ ކުރިން އަސީރުން މިނިވަން ކުރުމަށް ޙަމާސުން ދެކޮޅު ހަދާ ނަމަ، ޙަމާސަށް ނަރަކައާ އެއް ފަދަ ހާލަތާ ކުރިމަތިލާން ޖެހޭނެ ކަމަށް ވިދާޅުވެ ނުރައްކާތެރި އިންޒާރެއް ދެއްވާފައެވެ.

ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 46,584އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 109,731 މީހުން ޒަޚަމު ކޮށްލާފައެވެ.