އާސަންދަ މެދުވެރިކޮށް ޔޫއޭއީން ކިޑްނީ ޓްރާންސްޕްލާންޓް ކުރެވޭނެ އިންތިޒާމު ހަމަޖައްސަވައިފި

އާސަންދަ މެދުވެރިކޮށް ކިޑްނީ ޓްރާންސްޕްލާންޓްގެ ޚިދުމަތް ޔޫއޭއީގައި ލިބޭނެ އިންތިޒާމު ސަރުކާރުން ހަމަޖައްސަވައިފިއެވެ.

އާސަންދައިގެ ޚިދުމަތް ފުޅާކޮށް، ޔޫއޭއީއާއި ތައިލެންޑުން ބޭސްފަރުވާގެ ޚިދުމަތް ރައްޔިތުންނަށް ލިބޭނެ އިންތިޒާމު ހަމަޖައްސަވައިދެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ މުހިންމު ރިޔާސީ ވައުދުފުޅެކެވެ.

އާސަންދައިން ވިދާޅުވީ، ރައީސުލްޖުމްހޫރިއްޔާގެ މި ވަޢުދުފުޅުގެ ދަށުން އާސަންދަ މެދުވެރިކޮށް ޔޫއޭއީގައި ހަމަޖައްސާފައިވަނީ ކިޑްނީ ޓްރާންސްޕްލާންޓް ކުރަން ބޭނުންވެފައިވާ މިހުންގެ ތެރެއިން އެފުރުސަތު ފަހިވެފައި ނެތް މީހުންނަށް އެކަން ކުރެވޭނެ އިންތިޒާމުކަމަށެވެ.

އާސަންދައިން ވިދާޅުވީ "ފަސްޓް ޑިގްރީ" ނުވަތަ ޢައިލާގެ ތެރެއިން މައިންބަފައިންނާއި ދަރިންނާއި އެއްބަނޑު އެއްބަފާ ފަރާތެއްގެ ކިޑްނީ ޓްރާންސްޕްލާންޓްކުރުމަށް ކްރޮސްމެޗު ދިމާނުވާ ޙާލަތްތަކުގައި ތިބި ގިނަ ބަޔަކު ރާއްޖޭގައި ތިބިކަން ފާހަގަވެފައިވާކަމަށެވެ. އަދި މިވަގުތު ދިވެހީން ކިޑްނީ ޓްރާންސްޕްލާންޓްކުރުމަށް ދާޤައުމުތަކުގައި ފަސްޓްޑިގްރީ ޑޯނާއާއި ކްރޮސްމެޗު ދިމާނުހާނަމަ ކިޑްނީ ޓްރާންސްޕްލާންޓު ކުރެވޭނެ ނިޒާމެއް އެޤައުމުތަކުގެ ޤާނޫނު ހުރިގޮތުން ނެތްކަމަށް އާސަންދައިން ވިދާޅުވެއެވެ.

އެހެންނަމަވެސް ޔޫއޭއީގައި މިކަމަށް އޮންނަ ޚާއްސަ ބޯޑެއްގެ ބެލުމުގެ ދަށުން އިތުރު ތިމާގެ މިހަކަށްވެސް ކިޑްނީ ޑޯނޭޓްކުރެވޭނެ އިންތިޒާމު އޮންނަކަމަށާއި އެކަން ކުރުމުގައި އެޤައުމުން ބަލާ މައިގަނޑު އުސޫލުތަކުގެ ތެރޭގައި މުސްލިމަކަށް ވުމާއި ދިވެއްސަކަށްވުން ހިމެނޭކަމަށް އާސަންދައިން ފާހަގަކުރައްވައެވެ.

އެހެންކަމުން އާސަންދައިން ޔޫއޭއީގެ ހޮސްޕިޓަލަކާއި ގުޅިގެން މިހާރު އެޤައުމުގައި ދިވެހީންނަށް ކިޑްނީ ޓްރާންސްޕްލާންޓްކުރެވޭނެ އިންތިޒާމު ހަމަޖެހިފައިވާކަމަށް އާސަންދައިން ވިދާޅުވެއެވެ. އަދި މިވަގުތު އެއްބަސްވުމެއް އެކުލަވާލާފައިވަނީ އެއް ހޮސްޕިޓަލާއެކުގައިނަމަވެސް އިތުރު ހޮސްޕިޓަލް ޗެއިންތަކާއެކު މަޝްވަރާތައް ކުރިއަށްދާކަމަށް އާސަންދައިން ވިދާޅުވެއެވެ. އަދި ފުރަތަމަ އިސްކަންދޭނީ ފަސްޓް ޑިގްރީ ނުވަތަ ޢާއިލާތެރެއިން ޑޯނަރުން ހަމަނުޖެހުމުގެ ސަބަބުން އެކަމުގެ ވޭން ތަޙައްމަލުކުރަމުންދާ ފަރާތްތަކަށްކަމަށް އާސަންދައިން ވިދާޅުވެއެވެ.

އާސަންދައިން ވިދާޅުވީ، ފަސްޓް ޑިގްރީގައި ނުހިމެނޭ ތިމާގެ މީހުން ޑޯނަރުންގެ ގޮތުގައި ތިބި 3 ޕޭޝަންޓުން ކިޑްނީ ޓްރާންސްޕްލާންޓުކުރުމަށް އެދި މިވަގުތުވެސް އާސަންދައިގައި ރަޖިސްޓަރކުރެވިފައިވާކަމަށެވެ. އަދި އާސަންދައިގެ ޚިދުމަތް ޔޫއޭއީއަށް ފުޅާކުރެވުމާއެކު މިފަދަ އެތައް ބަޔަކަށް ދުޅަހެޔޮ ދިރިއުޅުމެއް އުޅުމުގެ ފުރުސަތު ފަހިވެގެންދާނެކަމަށް އާސަންދައިން ފާހަގަކުރައްވައެވެ.

މީގެއިތުރުން ރައީސުލްޖުމްހޫރިއްޔާގެ ވަޢުދުފުޅާއެކު ތައިލެންޑުންވެސް ދިވެހީންނަށް ބޭސްފަރުވާކުރެވޭނެ އިންތިޒާމުވަނީ ހަމަޖައްސަވާފައެވެ. މިގޮތުން އާސަންދައިގެ އެހީގައި އެހެން ޤައުމުތަކުން ދާއިމީ ބޮޑެތި ބަލިތަކަށް ފަރުވާ ހޯދަމުންދާ ފަރާތްތަކަށް ބައްޔަށް ކުރިއެރުމެއް ނާންނަކަމުގައިވާނަމަ އިތުރު ޑޮކްޓަރުންގެ ޚިޔާލު ނުވަތަ އޮޕީނިއަން ހޯދުމުގެ މަގު ތައިލެންޑުގެ ހޮސްޕިޓަލުތައް މެދުވެރިކޮށް ފަހިވެގެންދާނެކަމަށް އާސަންދައިން ވިދާޅުވެއެވެ. އަދި މިނޫނަސް، ރާއްޖެއިން ބޭރުން ބޭސްފަރުވާ ހޯދުމަށް ޑޮކްޓަރުން ރިފަރކުރާ ބަލި މީހުން ފަރުވާއަށް ބޭރަށް ފޮނުވޭނެ ޤައުމުތައް އިތުރުވުމަކީ އާސަންދައިގެ ޚިދުމަތް އިތުރަށް ފުޅާކުރެވިގެންދިޔަކަމެއްކަމަށް އެކުންފުނިން ވިދާޅުވެއެވެ.

އާސަންދައިން ވިދާޅުވީ މިދެޤައުމުގައި އާސަންދަ ދިނުމުގައިވެސް މިހާރުވެސް އާސަންދައިގެ އުސޫލުގެ ދަށުން ފޯރުކޮށްދޭ ބޭހުގެ ޚަރަދާއި، ޓިކެޓު އަދި ހުރުމާއި ކެއިންބުއިމުގެ ޚަރަދުތައް ލިބޭނެކަމަށެވެ. ހަމައެއާއެކު ޔޫއޭއީއަށް ކިޑްނީ ޓްރާންސްޕްލާންޓް ކުރުމަށްދާ ޑޯނާއަށްވެސް ޓިކެޓާއި ހުރުމުގެ ޚަރަދު ހަމަޖެހިގެންދާނެކަމަށް އާސަންދައިން ވިދާޅުވެއެވެ. އަދި މިއީ މިހާރުވެސް އޮންނަ އުސޫލުގެ ތެރެއިން ޢަމަލުކުރަމުންދާ ގޮތްކަމަށާއި ޚިދުމަތަށް އިތުރު ބަދަލެއް ނުގެނަކަމަށް އާސަންދައިން ވިދާޅުވެއެވެ. އެހެންކަމުން ޚިދުމަތް ލިބިގެންދާނީ މިހާރު އޮންނަ އުސޫލުގެ ތެރެއިން ޑޮކްޓަރުގެ ލިޔެކިޔުމައި ބަލީގެ ތަފްސީލު ހުށައެޅުމުން، އާސަންދައިގެ އޮންނަ ކައުންސިލުން ބެލުމަށްފަހުގައިކަމަށް އާސަންދައިން ވިދާޅުވެއެވެ.

ދާއިމީ ބޮޑެތި ބަލީގެ ތެރެއިން ކިޑްނީގެ ބަލިތަކަކީ ރާއްޖޭގައި ކަންބޮޑުވާ މިންވަރަށްވަނީ އިތުރުވެފައެވެ. އެހެންކަމުން ގިނަ ބަޔަކު ކިޑްނީ ބަލީގެ ވޭން ތަޙައްމަލުކުރަމުންދާއިރު އާސަންދައިގެ ދަށުން ފަހިވި މިފުރުސަތާއެކު ގިނަ ބަޔަކަށް އުއްމީދެއް ލިބިގެންދާނެކަމަށް އާސަންދައިން ޤަބޫލުކުރެއެވެ.