ކާގޯ އެއަރލައިނެއްގެ ޝެޑިއުލް ދަތުރުތައް ފުރަތަމަ ފަހަރަށް ރާއްޖެއަށް

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަޞައްވުރާއި އެއްގޮތަށް ވައިގެ ކާގޯ ޚިދުމަތް ރާއްޖޭގައި ފުޅާކުރުމަށް ކުރަމުންދާ މަސައްކަތުގެ ދަށުން ވެލާނާ އިންޓަރނޭޝަނަލް އެއަރޕޯޓަށް މުދާ އުފުލާ އެއަރލައިިނެއްގެ ޝެޑިއުލް ދަތުރުތައް ފަށައިފިއެވެ. މިއީ ކާގޯ އެއަރލައިނެއްގެ ޝެޑިއުލް ދަތުރުތައް ރާއްޖެއަށް ފެށި ފުރަތަމަ ފަހަރެވެ.

އިންޑިއާގެ އެފްކޮމް ކާގޯ އެއަރލައިންގެ ދަތުރުތައް ރާއްޖެއަށް ފަށާފައިވަނީ މިދިޔަ ހޮނިހިރު ދުވަހުއެވެ. އެގޮތުން ފުރަތަމަ ދަތުރުގައިވެސް ވަނީ އިންޑިއާގެ ޗެންނާއިން ރާއްޖެއަށް 20 ޓަނުގެ މުދާ ގެނެސްފައެވެ. އަދި އެ މުދާ ވަނީ އިއްތިހާދު އެއަރވޭއިސް މެދުވެރިކޮށް އެކްސްޕޯޓްކޮށްފައި ކަމަށް އެމްއޭސީއެލްއިން ވިދާޅުވެއެވެ.

އެފްކޮމް އިން ހަފްތާއަކު ތިން ދަތުރު ރާއްޖެއަށް ކުރާނެއެވެ. މި ދަތުރުތަކާއި ގުޅިގެން އެމްއޭސީއެލްއިން ވިދާޅުވީ، މިހާރުވެސް ރާއްޖެއަށް ކާގޯ އެއަރލައިންތައް ދަތުރުކުރާ ކަމަށެވެ. ނަމަވެސް މިއީ ކާގޯ ޚިދުމަތް ދިނުމަށް ޝެޑިއުލް ދަތުރުތަކެއް އެއަރލައިނަކުން ފެށި ފުރަތަމަ ފަހަރު ކަމަށެވެ. އެމްއޭސީއެލްއިން ވިދާޅުވީ ކުރިމަގުގައި މި ދާއިރާ ފުޅާކުރުމަށް އެކުންފުނިން މަސައްކަތްކުރާނެ ކަމަށެވެ. އެގޮތުން ބޮޑެތި އެއަރލައިންތަކާއި އެކު އެފްކޮމްއިން ކަނެކްޓިން ދަތުރުތައް ބޭއްވުމުގެ އެއްބަސްވުންތައް ގާއިމްކުރާނެ ކަމަށް އެމްއޭސީއެލްއިން ވިދާޅުވިއެވެ.

Breaking new ground at #VelanaAirport! 📦✈️
This morning, we proudly welcomed the inaugural @AfcomCargo flight from Chennai, India, carrying 20 tonnes of cargo. The shipment will seamlessly connect to an Etihad flight scheduled for departure later today.

This achievement marks a… pic.twitter.com/BsBKkuC5i2

— Velana Airport (@VelanaAirport) January 11, 2025

އެފްކޮމްއިން ފެށި ޝެޑިއުލް އެއަރ-ޓު-އެއަރ ކާގޯ ޚިދުމަތާއެކު، ވެލާނާ އެއަރޕޯޓު މެދުވެރިކޮށް ދެމުންދާ ކާގޯ ޚިދުމަތް ފުޅާވެގެންދާނެ ކަމަށް އެމްއޭސީއެލްއިން ފާހަގަކުރެއެވެ. އަދި ދުނިޔޭގެ އެއަރ ކާގޯ ޗެއިންގައި ވީއައިއޭގެ ހިއްސާ އޮތުމަކީ ރާއްޖޭގެ އިޤްތިޞާދަށް މި ދާއިރާއިން ލިބޭ އާމްދަނީ އިތުރުވެގެންދާނެ ކަމެކެވެ.

ވެލާނާ އިންޓަރނޭޝަނަލް އެއަރޕޯޓުގެ ކާގޯ ޚިދުމަތް ފުޅާކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަޞައްވުރެކެވެ. އެގޮތުން މިދިޔަ އަހަރުގެ ޖަނަވަރީ މަހުގެ މެދުތެރޭ އައު ކާގޯ ޓާމިނަލުގެ ޚިދުމަތް ފަށާފައިވާއިރު، މިހާރު އެތަނުގެ ކެޕޭސިޓީއަކީ 120،000 ޓަނެވެ. ސަރުކާރުގެ އަމާޒަކީ އެތަނުގެ ޚިދުމަތް ފުޅާކޮށް 300،000 ޓަނަށް ހޭންޑްލިން ކެޕޭސިޓީ އިތުރުކުރުމެވެ.

ވެލާނާ އިންޓަރނޭޝަނަލް އެއަރޕޯޓުގެ ކާގޯ ޚިދުމަތް ފުޅާކޮށްފައިވާއިރު އެމްޕީއެލްއާއި އެމްއޭސީއެލް ގުޅިގެން ދަނީ ސީ-ޓު-އެއަރ ކާގޯ ޚިދުމަތް ދެމުންނެވެ. މި ޚިދުމަތާއި 11 އެއަރލައިން ވަނީ ގުޅިފައެވެ. އަދި 3 ޤައުމަކުން މިހާރު މުދާ އެތެރެކޮށް ވައިގެ މަގުން ދަނީ އެކްސްޕޯޓް ކުރަމުންނެވެ.