އުރީދޫގެ 2025 ކަލަންޑަރު: ޒަމާނީ ޓެކްނޮލޮޖީއާއެކު ފުލޯކު ވާހަަކަތަކަށް އައު ދިރުމެއް

އުރީދޫ މޯލްޑިވްސްއިން އެކުންފުނީގެ 2025 ވަނަ އަހަރުގެ ކަލަންޑަރު ތަޢާރަފުކޮށްފިއެވެ.

މިއީ ރާއްޖޭގެ މަޝްހޫރު ފުލޯކު ވާހަކަތަކުގެ ކެރެކްޓަރުތައް ހިމެނޭގޮތައް އާޓިފިޝަލް އިންޓެލިޖެންސް (އޭ.އައި) ޓެކްނޮލޮޖީ ބޭނުންކޮށްގެން އުފައްދާފައިވާ ޚާއްޞަ ކަލަންޑަރެކެވެ. މި ކަލަންޑަރު ރަސްމީކޮށް ތަޢާރަފުކޮށްދެއްވީ އުރީދޫގެ މައި އޮފީހުގައި ބޭއްވި ޚާއްޞަ ރަސްމިއްޔާތެއްގައި، ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާނެވެ.

އުރީދޫގެ 20 ވަނަ އަހަރީ ދުވަސް ފާހަގަކުރަމުންދާއިރު، މި އައު ކަލަންޑަރުގައި ހިމަނައިފައިވަނީ ދިވެހިންގެ މެދުގައި ޒަމާނުއްސުރެ މަޝްހޫރުވެފައިވާ ފުލޯކު ވާހަކަތަކުގެ މުހިންމު ކެރެކްޓަރުތަކެވެ. ކޮންމެ މަހަކަށް ވަކި ކެރެކްޓަރެއް ޚާއްޞަކޮށްގެން ފަރުމާކޮށްފައިވާ މި ކަލަންޑަރު ތައްޔާރުކުރުމުގައި ޒަމާނީ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ވަނީ ބޭނުންކޮށްފައެވެ.

ކަލަންޑަރު ތަޢާރަފުކުރުމުގެ ރަސްމިއްޔާތުގައި ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވަނީ މުވާސަލާތީ އަދި ޑިޖިޓަލް ޓެކްނޮލޮޖީގެ ދާއިރާ ރާއްޖޭގައި ކުރިއަރުވައި، އާންމުން އެކަމަށް އަހުލުވެރިކުރުވުމުގައި އުރީދޫއިން ކުރަމުންދާ މަސައްކަތްތައް ފާހަގަކުރައްވާފައެވެ.
އަދި ދިވެހިންގެ މެދުގައި ޒަމާނުއްސުރެ މަޝްހޫރުވެފައިވާ ފުލޯކު ވާހަކަތަކުގެ ކެރެކްޓަރުތައް އޭއައި ޓެކްނޮލޮޖީ މެދުވެރިކޮށް ހިމަނާފައިވުމުން، ދިވެހިންގެ ތާރީޚާއި ސަޤާފަތްވެސް މި ކަލަންޑަރުން ދައްކުވައިދޭކަމަށްވެސް ވަޒީރު ވިދާޅުވިއެވެ.

"މިފަދަ ތާރީހީ ދިރުވާލުމެއް އަޅުގަނޑުމެންގެ ތެރެއަށް އަލުން އަންބުރާ ގެނައުމަށް އަދި އަޅުގަނޑުމެންގެ ތެރޭގައި ދިރިހުރި އެއްޗަކަށް ހެދުމަށް އަޅުގަނޑުމެންގެ ޓެކްނޮލޮގީ ކުންފުންޏަކުން، އަޅުގަނޑުމެންގެ ސާރވިސް ޕްރޮވައިޑާއަކުން މިފަދަ ކަމެއް އިނީޝިއޭޓްކޮށް ހެދުމަކީ އަޅުގަނޑު ދަންނަވާނީ ދިވެހި ރާއްޖެ ސްމާޓް ނޭޝަންއަކަށް ބަދަލުކުރުމަށްޓަކައި އާޅުގަނޑުމެން އެންމެން ގުޅިގެން މިކުރާ މަސައްކަތުގެ ވަރަށް މުހިންމު ކަމެއް." ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވިއެވެ.

ވަޒީރު އިޙްސާން ވިދާޅުވީ މި ކަލަންޑަރުގެ ސަބަބުން ގޭގޭގައި ފުލޯކު ވާހަކަތައް އަލުން ދެކެވި، ޚާއްޞަކޮށް ކުޑަކުދިންގެ މެދުގައި ޝައުޤުވެރިކަން އުފެދޭނެ އެއްޗަކަށް ވެގެންދާނެކަމަށާއި، މުޖުތަމަޢުގެ ތެރޭގައި މި ވާހަކަތަކާ ގުޅޭ އިތުރު މަޢުލޫމާތު ހޯދައި، މި ރާއްޖޭގެ ތާރީހު ދިރުވާ އާލާކުރެވިގެންދާނެކަމަށެވެ.

އުރީދޫއިން ވިދާޅުވީ މިއީ ރާއްޖޭގެ ފުރަތަމަ އެން.އެފް.ސީ އިންޓަގްރޭޓަޑް ކަލަންޑަރު ކަމަށެވެ. އެގޮތުން މި ކަލަންޑަރުގައި ދިވެހިން ޒަމާނުއްސުރެ އަޑުއަހަމުން އައި ފުލޯކު ވާހަކަތައް ކަމަށްވާ "ފޫޅުދިގު ހަންޑި"އާއި "ސަފަރު ކަތްދަ" ފަދަ 12 ކެރެކްޓަރ ހިމެނޭނެއެވެ. މިވާހަކަތަކަކީ ދިވެހިންގެ ސަގާފަތުގެ، ދިވެހިންގެ ތަރިކައިގެ މުހިންމު ބަޔަކަށްވާއިރު، އެޑްވާންސް އޭއައި ޗެޓްބޮޓް ޓެކްނޮލޮޖީ މެދުވެރިކޮށް ކަސްޓަމަރުންނަށް މިހާރު މި ކެރެކްޓާތަކާ ސީދާ ވާހަކަދައްކާލެވޭނެއެވެ. ކޮންމެ ކެރެކްޓާއަކުން ވެސް ވާހަކަތައް ހިއްސާކޮށް، ސުވާލުތަކަށް ޖަވާބު ދީ، އެ މީހުންގެ ދުނިޔެއާ ބެހޭ ގޮތުން މައުލޫމާތު ފޯރުކޮށްދީ، މީގެ ކުރިން ހީވެސް ނުކުރާ ފަދަ ގޮތަކަށް ފޯކްލޯރ ތަޖުރިބާ ކުރުމުގެ ފުރުސަތު ލިބިގެންދާނެއެވެ. އަދި ކޮންމެ މަހަކު ވެސް ކަސްޓަމަރުން ޗެޓް ކުރުމަށް އާ ކެރެކްޓާއެއް އަންލޮކް ވެގެންދާނެކަމަށް އުރީދޫއިން ވިދާޅުވެއެވެ.