އަލްހިޖްރަ ކުންފުނީގެ ހުއްދަ ހިފަހައްޓައި، އެއްލައްކަ ރުފިޔާއިން ޖޫރިމަނާކޮށް، ޖިނާޢީ ތަހުޤީގެއް ހިންގަނީ

އުމްރާއަށް މީހުން ގެންގޮސް ހާލުގައިޖެއްސި އަލްހިޖްރަ ގްރޫޕްގެ ހުއްދަ ހިފެހެއްޓުމާއެކު އެއްލައްކަ ރުފިޔާއިން ޖޫރިމަނާކޮށް، އެ ގްރޫޕްގެ މައްސަލަ ތަހުޤީގުކުރުމަށް ފުލުހުންނަށް ހުށަހަޅައިފިއެވެ.

އިސްލާމީ ކަންތައްތަކާބެހޭ ވުޒާރާއިން އަލްހިޖްރަ ގްރޫޕާއި ދެކޮޅަށް ހަރުކަށި ފިޔަވަޅުތަކެއް އަޅަން ނިންމީ އެ ގްރޫޕުން އުމްރާއަށް މީހުން ގެންދިޔުމާއި ބެހޭ އުޞޫލާ ޚީލާފުވުމުންނެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ އަލްހިޖްރަ ޓްރެވަލް އެންޑް ޓުއާރސް ޕްރައިވެޓް ލިމިޓެޑުން މިދިޔަ ޑިސެންބަރުމަހު އެ ގްރޫޕްގެ ހަވާލުގައި އުމްރާއަށް ދިޔަ މީހުންގެ ދެކޮޅު ޓިކެޓު ހަމަނުޖައްސައި، އެކަމަށް ހުރި ފައިސާ އެހެން ކަންކަމަށް ބޭނުންކޮށްފައިވާކަމަށް އެކުންފުނިން އިޢުތިރާފުވެފައިވާކަމަށެވެ.

އުމްރާއަށް ދިޔަ މީހުންގެ ދެކޮޅު ޓިކެޓު ހަމަނުޖައްސައި އޮތުމުން މައްކާއިން ރާއްޖެ އައުމަށް ޓިކެޓު ނެގުމުގެ ދަތިކަން ދިމާވެ، އެ ގްރޫޕްގެ ޙަވާލުގައި އުމްރާއަށް ދިޔަ މީހުން އިސްލާމީ ކަންތައްތަކާބެހޭ ވުޒާރާގެ އެހީތެރިކަމަށް އެދުނުކަމަށް އެ ވުޒާރާއިން ވިދާޅުވެއެވެ. އަދި އުމްރާއަށް ދިޔަ މީހުން އިސްލާމީ ކަންތައްތަކާބެހޭ ވުޒާރާގެ އެހީތެރިކަމަށް އެދުމުން ރާއްޖެ ނާދެވި ތިބި 23 އުމްރާވެރިން މޯލްޑިވްސް ޙައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް މިހާރު ގެންގޮސްފައިވާކަމަށް އެ ވުޒާރާއިން ވިދާޅުވެއެވެ.

އުމްރާއަށް ދިޔަ މީހުން ހާލުގައި ޖެއްސުމުން އިސްލާމީ ކަންތައްތަކާބެހޭ ވުޒާރާއިން ވަނީ އުމްރާއަށް މީހުން ގެންދިޔުމުގެ އުޞޫލުގެ ދަށުން އަލްހިޖްރަ ޕްރައިވެޓް ލިމިޓެޑަށް ބޮޑެތި ފިޔަވަޅުތަކެއް އަޅުއްވާފައެވެ. އެގޮތުން އުމްރާއަށް މީހުން ގެންދިޔުމަށް އެކުންފުންޏަށް ދޫކޮށްފައިވާ ހުއްދަ ވަނީ ހިފަހައްޓާފައެވެ. އަދި އެއްލައްކަ ރުފިޔާއިން ޖޫރިމަނާކޮށް އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށްވެސް ޢުމްރާއަށް މީހުން ގެންދިއުމުގެ ހުއްދަ ނުދިނުމަށް ވަނީ ނިންމަވާފައެވެ. މީގެ އިތުރުން އެ ކުންފުނިން ޢުމްރާއަށް ގެންދިޔަ މީހުން ހާލުގައި ޖައްސާ، އެމީހުން ރާޢްޖެ ގެނައުމަށް އިސްލާމީ ކަންތައްތަކާ ބެހޭ ވުޒާރާއިން ކުރި ޚަރަދު އެ ކުންފިން ހޯދުމަށްވެސް ވަނީ ނިންމަވާފައެވެ. މި ފިޔަވަޅުތަކުގެ އިތުރުން މި މައްސަލަ އިތުރަށް ތަޙުޤީޤުކޮށް ޤާނޫނީ ފިޔަވަޅު އެޅުމަށް ފުލުހުންނަށްވެސް ވަނީ ހުށަހަޅާފައިކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ އަލްހިޖުރަ ކުންފުނީގެ ހަވާލުގައި އުމްރާއަށް ގޮސް ހާލުގައި ޖެހިފައި ތިބި މީހުން ހޮނިހިރުދުވަހު މާލެ ގެނައުމުގެ މަސައްކަތް ކުރައްވަމުންދާކަމަށެވެ. އަދި އެމީހުން ރާއްޖެ އާދެވެންދެން ކެއިންބުއިމާއި ހުރުމުގެ އިންތިޒާމުތައް ޙައްޖު ކޯޕަރޭޝަނުން ހަމަޖައްސަވާދެއްވާނެކަމަށްވެސް އެ ވުޒާރާއިން ވިދާޅުވެއެވެ.

އުމްރާއަށް މީހުން ގެންދިޔުމުގައި އެކި ފަރާތްތަކުން މަކަރާއި ޙީލަތްހަދާ މައްސަލަތައް މީގެކުރިންވެސް ވަނީ ފެންމަތިވެފައިވެއެވެ. މިގޮތުން އިތުރަށް ފައިސާނެގުމުގެ މައްސަލަތަކާއި ޢުމްރާގެ އަޅުކަން އަދާކުރުމަށްފަހު އެނބުރި ރާއްޖެ އައުމުގައި ބައެއް މީހުންނަށް ދަތިތަކާ ކުރިމަތިލާންޖެހިފައި އެބަހުއްޓެވެ.

އިސްލާމީ ކަންތައްތަކާ ބެހޭ ވުޒާރާއިން އެކުލަވާލާފައިވާ ޢުމްރާއަށް މީހުން ގެންދިޔުމުގެ އުޞޫލްގައިވާގޮތުން އެއްބަސްވުމާއި ޚިލާފު ވެއްޖެނަމަ، މައްސަލައިގެ ކުޑަ ބޮޑު މިނަށް ބެލުމަށްފަހު 1000 ރުފިޔާއާއި 1،00،000 އާ ދެމެެދުގެ އަދަދަކުން ޖޫރިމަނާ ކުރުމުގެ އިޚުތިޔާރު އެ ވުޒާރާއަށް ލިބެއެވެ. އަދި ޢުމްރާއަށް ގެންދިޔުމުގެ ހުއްދަ ނެތި އެއްވެސް ބަޔަކު އުމްރާއަށް ގެންގޮސްފިނަމަ އެ ބަޔަކު 1،00،000 އާއި 5،00،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ އުމްރާއަށް މީހުންގެ ގެންދިއުމުގެ އުސޫލުތަކާއި ހިލާފުވާ ފަރާތްތަކާއި ދެކޮޅަށް ފިޔަވަޅު އެޅުމުގައި އިދާރީ ގޮތުންނާއި ޤާނޫނީ ގޮތުން ކުރަންޖެހޭ އެންމެހައި ކަންކަން ފަސްޖެހުމެއްނެތި ކުރާނެކަމަށެވެ.