މަސްވެރިންނަށް 48 ގަޑިއިރު ތެރޭ ފައިސާ ދޭން ފެށިތާ މަހެއް، މިހާތަނަށް 52 މިލިޔަން ދޫކޮށްފި

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި އިރު އެމަނިކުފާނު މަސްވެރިކަމުގެ ދާއިރާއިން ވެވެޑައިގެންނެވި އެންމެ މުހިންމު އެއް ވަޢުދަކީ މަސްވެރިންނަށް ބާނާ މަހަށް 48 ގަޑިއިރު ތެރޭ ފައިސާ ދިނުމެވެ. މިއަހަރުގެ މަސްވެރިންގެ ދުވަސް ފާހަގަކޮށްފައިވަނީ ވަޢުދު ފުއްދެވުމާއެކުގައެވެ.

މަސްވެރިކަމުގެ ސިނާޢަތުގައި ހަރަކާތްތެރިވާ މަސްވެރިންނާއި އަދި މި ސިނާޢަތުގައި ހަރަކާތްތެރިވާ މަސްވެރި ޢާއިލާތަކުގެ އަބަދުވެސް އޮންނަ އެއް ކަންބޮޑުވުމަކީ ބާނާ މަހަށް ޤަވާއިދުން ފައިސާ ނުލިބުމެވެ. މަސްވެރިންނަށް ޤަވާއިދުން ފައިސާ ލިބުމުގެ ދަތިކަމާއެކު، މީގެ ކުރީގެ ސަރުކާރުތަކުން ގެންގުޅެފައިވާ ސިޔާސަތުތަކުގެ ސަބަބުން މަސްވެރިކަމަށް ނިކުންނަ ދިވެހިންގެ އަދަދު ދިޔައީ ދަށްވަމުންނެވެ.

މި ސަރުކާރު ވެރިކަމާ ހަވާލުވީއިރު، މަސްވެރިން ކިރުވާފައިވާ މަހަށް ގިނަ ޢަދަދެއްގެ ފައިސާ ނުދީ އޮތެވެ. ޔޫރަޕަށް ބޭރުކުރާ މަހު ޑިއުޓީ މަޢާފް ވާނެ ކަމުގެ އިޝާރާތެއް ލިބިފައިވާ ކަމަށް ބުނެ، ރިޔާސީ އިންތިޚާބުގެ ތެރެއިން މަހުގެ އަގަށް ބަދަލު ގެނައެވެ. އޭގެ ކުރިން 17ރ. އަށް މަސްވެރިން އަތުން ގަންނަމުން އައި މަހުގެ އަގު 8ރ. އިތުރުކޮށް 25ރ. އަށް ޖައްސާލިއެވެ. މިކަމުގެ ސަބަބުން މަސްވެރިކަމުގެ ސިނާޢަތުގައި ހަރަކާތްތެރިވަމުން ދިޔަ އަމިއްލަ ކުންފުނިތައް ހުއްޓުމަކަށް އައެވެ. އެފަރާތްތަކަށް މި އަގުގައި މަސް ގަނެވެން ނެތުމެވެ.

މިކަން މިފްކޯއަށްވެސް ދެމެހެއްޓެނިވި ސިޔާސަތަކަށް ވެގެން ނުދިޔައެވެ. މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވީ، މަހުގެ އަގު ބަދަލުކުރުމުގެ ސަބަބުން އަހަރެއްގެ މައްޗަށް މިފްކޯއަށް 1.1 ގެއްލުންވާ ކަމަށެވެ. މީގެ ސަބަބުން ނެތް ލާރިއަކުން ފައިސާ ދޭން ޖެހި މަސްވެރިންނަށް ދޫކުރަމުން ދިޔަ ފައިސާ ދިނުންވެސް ލަސްވެގެން ދިޔައެވެ. މިއާއެކު އަދުގެ ސަރުކާރުން ވެރިކަމާއި ހަވާލުވިއިރު 250 މިލިޔަން ރުފިޔާ މަސްވެރިންނަށް ނުދެވި ހުއްޓެވެ.

ދުވަހުން ދުވަހަށް އިތުރުވަމުންދިޔަ ބިލްތަކަށް ފައިސާ ދެއްކުމަށް ސަރުކާރުން މަހުގެ އަގަށް ބަދަލު ގެނެސް ދުނިޔޭގެ ބާޒާރުގައި މަހުގެ އަގު ހުރި މިންވަރަށް މަހުގެ އަގު ބަދަލު ކުރިއެވެ. އަދި ވެރިކަމުގެ ފުރަތަމަ އަހަރު އެކަނިވެސް މަސްވެރިންނަށް ބިލިޔަނެއްހައި ރުފިޔާ މިފްކޯއިން ވަނީ ދޫކޮށްފައެވެ. އަދި މަސްވެރިންނަށް ދޭން ހުރި ހުރިހާ ފައިސާއެއް ދީ ވަނީ ޚަލާސްކޮށްފައެވެ.

އަދި މި ނިމުނު ޑިސެމްބަރު މަހު ރައީސްގެ ވަޢުދާއިއެއްގޮތަށް މަސްވެރިންނަށް 48 ގަޑިއިރު ތެރޭ ފައިސާ ދޫކުރަން ވަނީ ފަށާފައެވެ. މިފައިސާ ދޫކުރަން ފެށިތާ މިހާރު އެއް މަސް ދުވަސް ވެފައިވާއިރު މަސްވެރިންނަށް ކޮންމެ ދުވަހަކުވެސް ދޫކުރާ ފައިސާގެ ތަފްސީލް މިފްކޯއިން ދަނީ އާންމުކުރަމުންނެވެ. މި ހިސާބުތަކަށް ބަލާއިރު، މިވީ އެއް މަސް ދުވަސްތެރޭ މަސްވެރިންނަށް 52،642،458ރ. ވަނީ ދޫކޮށްފައެވެ. މިިއީ 4،540 މެޓްރިކް ޓަނުގެ މަހަށްވާ ފައިސާއެވެ.

ފާއިތުވީ އެއް މަސްދުވަހަށް ބަލާއިރު އެއް ދުވަސްތެރޭ އެންމެ ގިނަ އަދަދަކަށް ފައިސާ ދޫކޮށްފައިވަނީ މިއަދުއެވެ. އެގޮތުން މިއަދު އެކަނިވެސް 4.8 މިލިޔަން ރުފިޔާ ވަނީ ދޫކޮށްފައިވެއެވެ. މިއީ ޖެނުއަރީ މަހުގެ 6 ވަނަ ދުވަހު ކިރުވާފައިވާ 403 މެޓްރިކް ޓަނުގެ މަހަށްވާ ފައިސާ ކަމަށް މިފްކޯއިން ވިދާޅުވެއެވެ.

މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ޚާއްސަ އިސްކަމެއް ދެއްވައެވެ. އެގޮތުން ރާއްޖޭގައި މަސް ރައްކާކުރުމުގެ ގާބިލްކަން ދެގުނަ ކުރުމާއި ޕްރޮސެސިންގެ ފެސިލިޓީތަކުގެ މަސައްކަތްތައްވެސް އަންނަނީ ކުރަމުންނެވެ. މީގެއިތުރުން މި ސިނާއަތް ސިންދަފާތު ކުރުމަށްވެސް ސަރުކާރުގެ ޕްލޭންތައް ހަދާ މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ ސިނާއަތަށް މަސްވެރިކަން ހެދުމަކީވެސް ސަރުކާރުގެ އަމާޒެކެވެ.