ފިޔޯރީގައި ޤާއިމްކުރާ މަސްކިރާ ކާރުހާނާގެ އެއްބަސްވުމުގައި އަންނަމަހު ސޮއިކޮށް، 2 މަސް ތެރޭގައި މަސައްކަތް ފެށޭނެ: ރައީސް

ފިޔޯރީގައި ޤާއިމްކުރާ މަސްކިރާ ކާރުހާނާގެ އެއްބަސްވުމުގައި އަންނަމަހު ސޮއިކޮށް، 2 މަހެއްހާދުވަހުގެ ތެރޭގައި އަމަލީ މަސައްކަތް ފެށޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ފިޔޯރީގައި މަސްކިރާ ކާރުހާނާއެއް ޤާއިމްކުރެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދެކެވެ.

ހުވަދު އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ.ފިޔޯރީއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އެ ރަށުގެ ތަރައްޤީއަށް ކުރައްވަން ނިންމަވާފައިވާ ކަންކަތައްތަކަށް އަލިއަޅުއްވާލައްވާފައެވެ.

ރައީސުލްޖުމްހޫރިއްޔާ ވިދާޅުވީ ފިޔޯރީ ސްކޫލަށް ބޭނުންވާ ކަންކަން ކޮށްދެއްވުމުގެ އިތުރުން އޭޓީއެމްގެ ޚިދުމަތް ތައާރަފްކޮށް، ކުނި މެނޭޖްކުރެވޭނެ އިންތިޒާމްތައްވެސް ހަމަޖައްސައިދެއްވާނެކަމަށެވެ.

ރައީސުލްޖުމްހޫރިއްޔާ ވިދާޅުވީ ފިޔޯރީ ރައްޔިތުންނަކީ ހިވާގި މަސައްކަތް ތެރި ބައެއް ދިރިއުޅޭ ރަށެއްކަމަށާއި އެގޮތުން މަސްވެރިކަމަކީ އެ ރަށާއި އެ ސަރަހައްދަށްވެސް އެންމެ މުހިންމު ސިނާއަތްކަމަށެވެ. އަދި ރިޔާސީ އިންތިޚާބުގައި ކެމްޕެއިންގައި ވައުދުވެވަޑައިގެންނެވި ގޮތަށް ފިޔޯރީގައި މަސްކިރާ ކާރުހާނާގެ މަސައްކަތް ކުރިއަށް ގެންދަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ފިޔޯރީގައި ގާއިމްކުރައްވާ މަސްކިރާ ކާރުހާނާގައިި 100 ޓަނުގެ ދަޅުމަސް ބަންދުކުރުމުގެ ކެޕޭސިޓީއާއި 3000 ޓަނުގެ މަސް ފިނިކުރާ ކޯލްޑް ސްޓޯރޭޖް ހުންނާނެކަމަށެވެ. އަދި 100 ޓަނުގެ ފިޝް މީލް އަދި 50 ޓަނުގެ އައިސް ޕްލާންޓެއްވެސް ކާރުހާނާގައި ހުންނާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ޗައިނާގެ ކުންފުންޏަކާއި ގުޅިގެން މަސައްކަތް ފެށުމަށް ތައްޔާރުވަމުންދާކަމަށެވެ. އެގޮތުން އެންމެ ލަސްވެގެން އަންނަ ފެބްރުއަރީމަހު އެއްބަސްވުމުގައި ސޮއިކުރެވޭނެކަމަށް އެމަނިކުފާނު ވިދާޅުވިއެވެ.

"ޗައިނާ ކުންފުންޏަކާއި ގުޅިގެން މަސައްކަތް ފެށުމަށް މަސައްކަތް ކުރަނީ. އެންމެ ލަސްވެގެން ފެބްރުއަރީ މަހުގެތެޔެރޭގައި އެގްރިމަންޓުގައި ސޮއިކުރެވޭނެ. އޭގެ 2 މަސްފަހުން ޢަމަލީ މަސައްކަތް ފެށޭނެ. ނަތީޖާ އަކަށްވާނީ މިސަރަޙައްދަށް މަސްވެރިކަމަށް ބޮޑު ކުރިއެރުމެއް ލިބިގެންދާނެ" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މަސްވެރިކަމުގެ ސިނާއަތަކީ އެމަނިކުފާނު އެންމެ އިސްކަމެއް ދެއްވާ އެއް ސިނާޢަތްކަމަށާއި، އެއީ ދިވެހި އެތައް ޢާއިލާއަކާއި ގުޅިފައިވާ ސިނާއަތެއްކަމަށެވެ. ނަމަވެސް މަސްވެރިކަމުގެ ސިނާއަތް ކުރިއަރުވަން އެކި ސަރުކާރުތަކުން އެތައް ވަޢުދެއްވިނަމަވެސް، އެކަންކަން ފުރިހަމަނުވެ އޮތްކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ އެމަނިކުފާނު ވެރިކަމާއި ހަވާލުވެވަޑައިގަތުމަށްފަހު މަސްވެރިިކަމުގެ ސިނާޢަތް ކުރިއަރުވަން ވެވަޑައިގެންނެވި ވަޢުދުތައް ފުއްދެވުމުގެ މަސައްކަތް ކުރައްވަމުން ގެންދަވާކަމަށެވެ. އެގޮތުން މަސްވެރިންނަށް މިފްކޯއިން ދޭންޖެހޭ ހުރިހާ ފައިސާއެއް ދީ ޚަލާސްކުރުމަށްފަހު، ރިޔާސީ ވަޢުދާއި އެއްގޮތަށް މަސްކިރާތާ 48 ގަޑިއިރު ތެރޭގައި މިހާރު މަސްވެރިންނަށް ފައިސާ ދެމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ.