ވިއްސާރައިގައި މާލޭން ގެއްލުން ލިބުނު 137 ގެއެއްގެ އެސެސްމަންޓު ހަދައިފި

މިދިޔަ ހުކުރު ދުވަހު މާލެއަށް ކުރި ވިއްސާރައިގައި ފެންވަދެގެން ގެއްލުން ލިބުނު ހުރިހާ ގެއެއްގެ "ޑެމޭޖް އެސެސްމަންޓު" ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭ އިން ހަދައިފިއެވެ.

ޑިޒާސްޓަރ މެނޭޖްމަންޓް އޮތޯރިޓީން ވިދާޅުވީ މާލެއަށް ކުރި ވިއްސާރައިގައި 137 ގެއަކަށް ފެން ވަދެ، އެކި ވަރުގެ ގެއްލުން ލިބިފައިވާކަމަށެވެ. އެގޮތުން 2 ދުވަހެއްގެ މަތިން އެގެތަކަށް ޒިޔާރަތްކޮށް އެސެސްމަންޓް ހަދާ ނިންމާލައިފައިވާކަމަށް އެއޮތޯރިޓީން ވިދާޅުވެއެވެ. މިގެތަކަށް ލިބިފައިވާ ގެއްލުންތަކުގެ ތެރޭގައި ހިފާގެންގުޅޭ ތަކެއްޗައް ލިބިފައިވާ ގެއްލުން ފާހަގަކުރެވޭކަމަށް އެންޑީއެމްއޭއިން ވިދާޅުވެއެވެ.

އެންޑީއެމްއޭއާއެކު މިމަސައްކަތުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި މޯލްޑިވްސް ރެޑް ކްރެސެންޓުން ބައިވެރިވިއެވެ.

މާލޭގެ ގޭބީސީތަކުގެ އިތުރުން އަތޮޅު ތެރޭގެ ގެތަކަށް ލިބިފައިވާ ގެއްލުން ދެނެގަތުމަށް އެސެސްމަންޓު ހެދުމުގެ މަސައްކަތްވެސް ދަނީ ކުރަމުންނެވެ. އެންޑީއެމްއޭއިން ވިދާޅުވީ ރައްޔިތުންނަށް ލިބިފައިވާ ގެއްލުން ދެނެގަތުމަށްފަހު އެފަރާތްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ކުރިއަށްދާނެކަމަށް އެންޑީއެމްއޭއިން ވިދާޅުވެއެވެ.

ރާއްޖެ މަތީގައި އުފެދުނު ކޮޅިގަނޑެއްގެ ސަބަބުން މިދިޔަ ހަފްތާގައި ރާއްޖޭގެ ބޮޑު ބަޔަކަށް ވަނީ ވިއްސާރަކޮށްފައެވެ. މިވިއްސާރައިގައި އެކިވަރުގެ ގެއްލުން ލިބިގެން އަތޮޅު ތެރޭގެ 6 ރަށަކުން ރިޕޯޓުކޮށްފައިވެއެވެ. އަދި މާލޭގައި ފެންބޮޑުވެގެން އެކިއެކި އެހީތަކަށް އެދި 774 ތަނަކުން އެންޑީއެމްއޭ އަށް ރިޕޯޓުކުރިއެވެ.

އޭގެ ތެރެއިން 554 ރިކުއެސްޓް ލިބުނީ ވެލިބަސްތާ ޖަހައިދިނުމަށްކަމަށާއި އަދި 36 ގޭބިސީއަކުން 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ވެސް ހަމަޖައްސައިދޭން ޖެހުނުކަމަށް އެންޑީއެމްއޭއިން ވިދާޅުވިއެވެ.