އެމެރިކާގެ ޚާރިޖީ ވަޒީރު އެންތޮނީ ބްލިންކަން ދެކުނު ކޮރެޔާއަށް ކުރައްވަމުންދާ ދަތުރާ ދިމާކޮށް އުތުރު ކޮރެޔާއިން ބެލިސްޓިކް މިސައިލެއް ތަޖުރިބާ ކޮށްފިއެވެ. ދެކުނު ކޮރެޔާގެ އަސްކަރިއްޔާއިން ބުނެފައި ވަނީ އުތުރު ކޮރެޔާއިން ތަޖުރިބާކޮށްފައި ވަނީ މެދު ރާސްތާގެ ބެލިސްޓިކް މިސައިލެއް ކަމަށާއި އެ މިސައިލް 1،100 ކިލޯމީޓަރަށް ދަތުރުކުރި ކަމަށެވެ.
އުތުރު ކޮރެޔާއިން ބެލިސްޓިކް މިސައިލެއް ތަޖުރިބާ ކުރުމުން ބްލިންކަން ވިދާޅުވީ އެއީ އެމެރިކާއިން ދެކުނު ކޮރެޔާއާއި ޖަޕާނާ އެކު އޮންނަ ގުޅުން ބަދަހި ކުރަން ޖެހޭ ކަމުގެ ހެއްކެއް ކަމަށެވެ. އެ ގޮތުން އެމެރިކާއާއި ދެކުނު ކޮރެޔާއާއި ޖަޕާނާ ދެމެދު މަޢުލޫމާތު ބަދަލުކޮށް އަސްކަރީ ތަމްރީން ހިންގުމުގެ މުޙިންމު ކަމުގެ މައްޗަށް ބްލިންކަން ވަނީ އަލިއަޅުއްވާލައްވައިފައެވެ.
އެމެރިކާއިން ވަނީ ދެކުނު ކޮރެޔާއާއި ޖަޕާނާ ދެމެދު އުފެދިފައިވާ ޒަމާންވީ ޙިޔާލު ތަފާތުވުންތަކަށް ޙައްލެއް ގެނެސް އެކުގައި މަސައްކަތް ކުރެވޭނެ މާޙައުލެއް ޤާއިމުކޮށްފައެވެ. ނަމަވެސް އެމެރިކާގެ ވެރިކަމާ ޑޮނަލްޑް ޓްރަންޕް ޙަވާލުވެވަޑައިގަތުމުން އެ ގުޅުމަށް ކުރާނެ އަސަރެއް ވަޒަން ކުރަން އުނދަގުލެވެ. އޭގެ އިތުރުން ދެކުނު ކޮރެޔާގެ ސިޔާސީ މަޞްރަހް ހަލަބޮލިވުމުގެ ސަބަބުން ވެސް އުތުރު ކޮރެޔާއާ ކުރިމަތިލުމުގައި ފަހަތަށް ފިޔަވަޅުތަކެއް އެޅުމަށް މަޖުބޫރުވެފައިވާ ކަމަށް ބެލެވެއެވެ. ދެކުނު ކޮރެޔާގެ މިހާރުގެ ސަރުކާރަކީ ޖަޕާނާ ގުޅުންބަދަހި ކުރުމަށް އިސްކަންދޭ ސަރުކާރެކެވެ. ނަމަވެސް އެއީ އެ ޤައުމުގެ ގިނަ ރައްޔިތުން ހިތްހަމަޖެހޭ ކަމެއް ނޫނެވެ.
މިދިޔަ އަހަރުގެ ނޮވެމްބަރު މަހުގެ 5ވަނަ ދުވަހުގެ ފަހުން އުތުރު ކޮރެޔާއިން ވަނީ ކުރު ރާސްތާގެ ހަތް މިސައިލެއް ތަޖުރިބާކޮށްފައެވެ. އުތުރު ކޮރެޔާއިން ވަނީ ދިފާޢީ ނިޒާމުތަކަށް ނުހުއްޓެވޭ އަދި ދުވެލި ބާރު ޒަމާނީ މިސައިލުތަކެއް އުފައްދަން ފަށައިފައެވެ.