ބޯހިޔާވަހިކަމުގެ ހުރިހާ މަޝްރޫޢެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދަން މިމަހު އިޢުލާންކުރާނަން: ރައީސް

ސަރުކާރުން ހިންގެވުމަށް ކަނޑައަޅުއްވާފައިވާ ބޯހިޔާވަހިކަމުގެ ހުރިހާ މަޝްރޫޢެއްގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދަން މިމަހު އިޢުލާންކުރައްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ކ.ގުޅިއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ މިއަހަރަކީ ތަރައްޤީގެ މަސައްކަތާއެކު، މުއްސަނދިކަން ރައްޔިތުންނަށް އިހްސާސްކޮށްދިނުމުގެ އަމަލީ މަސައްކަތް ފެށިގެންދާނެ އަހަރެއްކަމަށެވެ.

ރައީސުލްޖުމްހޫރިއްޔާ ވިދާޅުވީ މިއަހަރު އެކި ދާއިރާތަކުން ޢުމްރާނީ ތަރައްޤީގެ ގިނަ މަޝްރޫޢުތަކެއްގެ ޢަމަލީ މަސައްކަތް ފެށިގެންދާނެކަމަށެވެ. އެގޮތުން އެންމެ ބޮޑު އިސްކަމެއް ދެއްވާނީ މީގެތެރެއިންވެސް ދޭނީ ގޯތިގެދޮރު ބިނާކުރުމާއި ބޯހިޔާވަހިކަމާއި ގުޅޭ މަޝްރޫޢުތަކަށްކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މިއީ ތަރައްޤީގެ ޢަމަލީ އަހަރުކަމަށާއި މި އަހަރު ވެގެންދާނީ މިހާތަނަށް ރާއްޖޭގައި ބޯހިޔާވަހިކަމުގެ އެންމެ ގިނަ މަސައްކަތްތައް ހިނގާ އަހަރަށްކަމަށެވެ. މީގެތެރެއިންވެސް އަތޮޅުތަކުގައި ހިންގަން އެމަނިކުފާނު ވަޢުދުވެވަޑައިގެންނެވި މަޝްރޫޢުތައް ކޮންޓްރެކްޓަރުންނާ ހަވާލުކުރުމުގެ މަސައްކަތްތައް މި މަހު ފައްޓާވާނެކަމަށް ވިދާޅުވިއެވެ.

"ކެމްޕެއިން ތެރޭގައި އަދި މެނިފެސްޓޯގައި ހިމަނާފައިވާ ހުރިހާ ހައުސިން މަޝްރޫޢުތަކުގެ، ޢަމަލީ މަސައްކަތް ފެށުމަށް ކޮންޓްރެކްޓަރުން ހޯދުމަށް މިމަހުގެ ތެރޭގައި އިޢުލާނުކުރާނަން. މިއަހަރު ވެގެންދާނީ އެއް އަހަރުތެރޭ ގެދޮރުވެރިކަމާގުޅޭ އެންމެ ގިނަ މަސައްކަތްތައް ކުރެވޭ އަހަރަށް." ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަޢުދުތަކުގެ ތެރޭގައި ރާއްޖޭގެ އުތުރުގައި 20000 ހައުސިން ޔުނިޓް އަދި ދެކުނުގައި 20000 ހައުސިން ޔުނިޓްގެ މަޝްރޫޢު ހިންގެވުން ހިމެނެއެވެ. އެގޮތުން މިއަހަރުގެ ބަޖެޓުގައި ބޯހިޔާވަހިކަމާ ގުޅޭ މަސައްކަތްތަކަށް 2.5 ބިލިއަން ރުފިޔާ ވަނީ ހިމަނާފައެވެ. މީގެތެރެއިން 1 ބިލިއަން ރުފިޔާ ހިމަނާފައި ވަނީ އުމްރާނީ މަސައްކަތްތަކަށެވެ.

ރައީސުލްޖުމްހޫރިއްޔާ ވިދާޅުވީ މާލެ ސަރަޙައްދުގެ ބޯހިޔާވަހިކަމުގެ މުހިންމު މަޝްރޫޢުތައްވެސް މިއަހަރު ކުރިއަށްގެންދަވާނެކަމަށެވެ. އެގޮތުން އެމަނިކުފާނުގެ އެންމެ ބޮޑު ތަޞައްވުރު، "ރަސްމާލެ" މަޝްރޫޢުގެ ބިން ހިއްކުމުގެ މަސައްކަތްވެސް އެތައް ގުނައެއް އަވަސްކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

"ބިން ހިއްކުމުގެ މަސައްކަތް އަވަސްކުރުމަށް އިތުރު ކޮންޓްރެކްޓަރުން ހޯދުމުގެ މަސައްކަތް މިދަނީ ކުރަމުން. އޭރުން އެއްފަހަރާ ގިނަ ޑްރެޖަރުތައް ބޭނުންކޮށް މަސައްކަތްތައް ފެށި، ބިން ހިއްކުން 2 ގުނަ ނުވަތަ 3 ގުނައަށް އަވަސްކުރެވޭނެ." ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ސަރުކާރުން މިހާރު ހުޅުވާލާފައިވާ "ހިޔާވަހި" ލުއި ލޯނު ސްކީމްގެ ދަށުން، އަމިއްލައަށް ގެދޮރު އިމާރާތްކުރުމަށް ބޭނުންވާ ފަރާތްތަކަށް މާލީ އެހީ ދިނުމުގެ މަސައްކަތްވެސް މި އަހަރު ފަށާނެކަމަށެވެ. މީގެއިތުރުން ސަރުކާރުން އަމިއްލަ ކޮންޓްރެކްޓަރުންނަށް ދޭންޖެހޭ ހުރިހާ ފައިސާއެއް ދައްކާ ޚަލާސްކުރުމަށް، ކުރިއަށް އޮތް ދެމަސްތެރޭ ފައިސާ ދޫކުރައްވާނެކަމަށެވެ. އަދި މިކަމުގެ ސަަބަބުން ކުންފުނިތަކުގެ މާލީ ޙާލަތު ރަނގަޅުވެ، ކުންފުނިތައް އަލުން ހިނގައިގަތުމަށް އެހީއަކަށް ވެގެންދާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.