ރައްޔިތުން ބޭނުންވާ ކޮންމެ ވަގުތަކު ދިފާއީ ބާރުން ޚިދުމަތުގައި

ޤައުމީ ދިފާޢީ ބާރާއި ދިވެހި ފުލުހުންގެ ޚިދުމަތުން އަބަދުވެސް މަސައްކަތް ކުރަމުންދަނީ ޤައުމާއި ރައްޔިތުންގެ ޙައްގުގައެވެ. ރައްޔިތުން ބޭނުންވާ ކޮންމެ ވަގުތެއްގައި ރައްޔިތުންގެ ޚިދުމަތުގައި ދެ މުވައްސަސާއިންވެސް ކުރައްވަމުން ގެންދަވަނީ ތައުރީފު ޙައްގު މަސައްކަތްތަކެކެވެ.

މިދިޔަ ހުކުރު ދުވަހު ރާއްޖޭގެ ބޮޑުބަޔަކަށް ކުރި ވިއްސާރައިގައި މާލޭގެ އިތުރުން ބައެއް ރަށްތައްވެސް އޮތީ ފެނު އަޑީގައެވެ. ހުއްޓުމެއްނެތި އެތައް އިރެއްވަންދެން ވެހުނު ވާރޭގައި ފެންބޮޑުވުމުގެ ސަބަބުން އެތައް ގެއަކަށާއި އޮފީސްތަކާއި ފިހާރަ އަދި ކެފޭ ރެސްޓޯރެންޓުތަކަށް ފެންވަދެ ވަނީ ބޮޑެތި ގެއްލުންތަކެއް ލިބިފައެވެ.

މޫސުމާބެހޭ ޤައުމީ އިދާރާއިން ވިދާޅުވިގޮތުގައި ހުކުރު ދުވަހު މާލެއަށް އެކަނި 142.6 މިލިމީޓަރުގެ ވާރޭވަނީ ވެހިފައެވެ. މީގެ ސަބަބުން ހިނގާބިގާވެ ނޫޅެވޭވަރަށް މާލޭގައި ފެންބޮޑުވިނަމަވެސް ހޮނިހިރު ދުވަހުގެ ހެނދުނާ ހަމައަށް އެ ފެނުގެ އަސަރެއްވެސް މަގުތަކުން ފެންނަން ނެތެވެ. މިކަމުގެ ފަހަތުގައިވަނީ 21 ގަޑިއިރު ވަންދެން އެމްއެންޑީއެފުން މެދުކެނޑުމެއްނެތި ކުރެއްވި ބުރަ މަސައްކަތެވެ.

ރާއްޖޭގެމަތީގައި އުފެދެމުން އައި ކޮޅިގަނޑެއްގެ ސަބަބުން މޫސުން ގޯސްވާނެ ކަމަށް މޫސުމާބެހޭ ޤައުމީ އިދާރާއިން ލަފާކުރިއިރުން ފެށިގެން އެމްއެންޑީއެފުން އައީ ފެންބޮޑުވެދާނެކަމަށް ބަލައިގެން ފެންހިންދުމުގެ މަސައްކަތަށް ތައްޔާރުވަމުންނެވެ. އެގޮތުން، ފެންހިންދުމަށް މާލޭގައި އާންމުކޮށް އެންމެ ބޮޑަށް ފެންބޮޑުވާ ހަތް ސަރަހައްދެއްގައި 27 ޕަމްޕު ބަހައްޓައިގެން ވަނީ ފެންހިންދުމުގެ މަސައްކަތް ކޮށްފައެވެ. މި އޮޕަރޭޝަން އެމްއެންޑީއެފުން ފެށީ ހުކުރު ދުވަހުގެ ހެނދުނު 11:37ހާއިރުއެވެ.

މެދުކެނޑުމެއްނެތި ވާރޭވެހުމުގެ ސަބަބުންނާއި ކާނުގަނޑުތެރޭގައި ކުނި ހަރުލާފައި ހުރުމުން ފެން ހިންދުމަށް އެމްއެންޑީއެފުން ކުރައްވަމުން ގެންދެވި މަސައްކަތަށް ބުރޫއެރިއެވެ. ނަމަވެސް ފެންހިންދުމާއެކު ފެންބޮޑުވުމުގެ ސަބަބުން ގެއްލުން ލިބެމުންދިޔަ އާންމުންނަށްވެސް އެމްއެންޑީއެފުން ދިޔައީ އެހީތެރިކަން ފޯރުކޮށްދެމުންނެވެ.

އެމްއެންޑީއެފުން ކުރިއަށްގެންދިޔަ އޮޕަރޭޝަނާ ގުޅޭގޮތުން ލެފްޓިނަންޓް ކާނަލް ފާއިޒް ރަޝާދު ވިދާޅުވީ ފެން ހިންދުމުގެ މަސައްކަތުގެ އިތުރުން ގެތަކުގައި ވެލިބަސްތާ ޖެހުމުގައިވެސް ސިފައިން ހަރަކާތްތެރިވި ކަމަށެވެ. އަދި ފެންބޮޑުވި އިތުރު ރަށްރަށުގައިވެސް ސިފައިން ހަރަކާތްތެރިވިކަމަށް ވިދާޅުވިއެވެ.

"އަޅުގަނޑުމެންގެ އޭރިއާތަކުން ވަރަށް ބޮޑަށް އެއްބާރުލުން އެބައޮތް ދީފައި ރަށްރަށުގައި ފެންބޮޑުވެގެން ޓީމުތައް ފޮނުވައިގެން. މިގޮތުން، މާލެ އޭރިއާއިން އެކަނިވެސް ވަނީ 5 ރަށަކަށް ހަރަކާތްތެރިވެފައި އަޅުގަނޑުމެންގެ ޓީމުތައް. އޭގެއިތުރަށް ނޮދަން އޭރިއާގެ އެއް ރަށަށް ހަމަ ފެންބޮޑުވި ރަށަކަށް އަދި ސެންޓްރަލް އޭރިއާގެ 3 ރަށަކަށް ފޮނުވިފައިވަނީ،" ލެފްޓިނަންޓް ކާނަލް ފާއިޒް ވިދާޅުވިއެވެ.

އެމްއެންޑީއެފުން ކުރި މަސައްކަތުން ހޮނިހިރު ދުވަހުގެ ހެނދުނާ ހަމައަށް އޮޕަރޭޝަން ނިންމާލިއިރު 30،569 ޓަނުގެ ފެން ވަނީ ހިންދާފައެވެ.

އެމްއެންޑީއެފްގެ އިތުރުން ދިވެހި ފުލުހުންގެ ޚިދުތަމާއި ސަރުކާރު ހިއްސާވާ ކުންފުނިތަކުންނާއި އާންމުންގެ ގިނަ ބަޔަކުވެސް ވަނީ ފެންހިންދުމާއި ފެންބޮޑުވި ގެތަކަށް އެހީތެރިވުމުގައި ހަރަކާތްތެރިވެފައެވެ. މި މަސައްކަތްތަކުގެ ނަތީޖާއަކަށްވީ ވާރޭ ހުއްޓާލިތާ މާގިނަ ވަގުތުތަކެއް ނުވަނީސް މާލެއާއި ރަށްތަކުގައި ފެން ހިންދައި އާންމު ހާލަތަށް ގެނެވުމެވެ.

ރާއްޖެއަށް ދިމާވާ މިފަދަ ކޮންމެ ކަމެއްގައިވެސް ފެނިގެންދަނީ ދިފާޢީ ބާރުތަކުންނާއި ރައްޔިތުން ގުޅިގެން އެކުގައި މަސައްކަތްކުރާ މަންޒަރެވެ. އެހެންކަމުން، މިފަދަ ހާލަތްތަކުގައި ސިޔާސީ ފިކުރު އެއްކިބާކޮށް ކޮންމެ ރައްޔިތަކުވެސް މަސައްކަތްކުރަންވީ އެއްބައިވަންތަކަމާއެކުގައެވެ.