މެލޭޝިޔާގެ ރިސޯޓު ރަށެއް ކަމަށްވާ ލަންގްކާވީގެ ގޮނޑުދޮށަށް ގިނަ ޢަދަދެއްގެ މިޔަންމާގެ ރެފިއުޖީން ދަތުރުކުރި ބޯޓެއް ގާތްކުރުމާ ގުޅިގެން އެ ފަދަ އިތުރު ބޯޓުތައް ހޯދުމަށް މެލޭޝިޔާގެ ކަނޑުގެ ސަރަޙައްދުގައި ޙަރަކާތްތެރިވާ ކޯސްޓުގާޑުގެ ޢަދަދު އިތުރު ކޮށްފިއެވެ.
ހުކުރު ދުވަހު މެލޭޝިޔާގެ ފުލުހުން ވަނީ ލަަންގްކާވީއާ ގާތްކުރި ބޯޓެއްގައި ތިބި މިޔަންމާގެ 196 ރައްޔިތުން ހައްޔަރު ކޮށްފައެވެ. އެ މީހުންގެ އަތުގައި މެލޭޝިޔާއަށް އެތެރެވުމަށް ބޭނުންވާ ލިޔެކިޔުންތަކެއް ނެތެވެ. އެ މީހުންގެ ފަރާތުން ލިބުނު މައުލޫމާތުން އެ ފަދަ އިތުރު ދެ ބޯޓު ވަނީ އެ ސަރަޙައްދަށް މިސްރާބު ޖަހައިފައިކަން އެނގިފައިވާ ކަމަށް މެލޭޝިޔާގެ ކޯސްޓުގާޑުން ވަނީ ބުނެފައެވެ. ނަމަވެސް އެ ބޯޓުތައް ދަތުރުކުރަމުންދާ ސީދާ ސަރަޙައްދެއް ނޭނގޭ ކަމަށް ކޯސްޓުގާޑުން ބުނެއެވެ.
މެލޭޝިޔާގެ ކޯސްޓުގާޑުގެ ޑިރެކްޓަރ ޖެނެރަލް ރޮސްލީ ޢަބްދުالله ވިދާޅުވީ ލަންގްކާވީ ކައިރީ އޮންނަ މެލޭޝިޔާގެ އުތުރުގެ ކަނޑުގެ ސަރަޙައްދުތަކާއި ސަރަޙައްދީ ރޮނގުތަކުގެ ކައިރި ބޯޓުތައް ފެނޭތޯ ހޯދަމުންދާ ކަމަށެވެ. އެ ސަރަޙައްދުތައް ވައިގެ މަގުން ބެލުމަށް ވެސް ހަމަޖެހިފައި ވެއެވެ. ރޮސްލީ ވިދާޅުވީ ބޯޓުތައް ހޯދުމުގެ މަސައްކަތުގައި ތައިލޭންޑުގެ އިދާރާތަކުގެ އެހީއަށް ވެސް އެދިފައިވާ ކަމަށެވެ.
ބައެއް ނޫސްތަކުން ބުނެފައި ވަނީ ލަންގްކާވީގެ ގޮނޑުދޮށަށް ގާތްކުރި ބޯޓުގައި ތިބީ ރޮހިންޔާއަށް ނިޞްބަތްވާ މީހުން ކަމަށެވެ. ރޮހިންޔާ މީހުންނަކީ ބުދުދީން އޮންނަ މިޔަންމާގައި ދިރިއުޅޭ ބައިމަދު މުސްލިމު އާބާދީއެކެވެ. ނަމަވެސް ކޯސްޓުގާޑުން މި ކަން ކަށަވަރު ކޮށްދީފައެއް ނުވެއެވެ.
2017ވަނަ އަހަރުގެ އޮގަސްޓު މަހުން ފެށިގެން މިޔަންމާގެ ސަރުކާރުން ދަނީ ރޮހިންޔާ މުސްލިމުން ނައްތައިލުމަށް މަސަައްކަތް ކުރަމުންނެވެ. އދން ވަނީ މިޔަންމާގައި ރޮހިންޔާ މުސްލިމުން ނައްތައިލަން ކުރާ މަސައްކަތަކީ ބައިމަދު އާބާދީއެއް ނަސްލުހޭދު ކުރުމަށް ކުރަމުންދާ މަސައްކަތެއްގެ ގޮތުގައި ސިފަ ކޮށްފައެވެ.
މެލޭޝިޔާއަކީ މިޔަންމާގެ ސަރުކާރުގެ ލާއިންސާނީ އަނިޔާތަކުން ސަލާމަތްވުމަށް ޤައުމު ދޫކޮށްދާ މީހުންނަކީ ރެފިއުޖީންގެ ގޮތުގައި ބަލައިގަންނަ ޤައުމެއް ނޫނެވެ. ރޮހިންޔާގެ މުސްލިމުން ޢާންމު ގޮތެއްގައި ހިޖުރަ ކުރަނީ އަވަށްޓެރި ބަންގްލަދޭޝަށެވެ. ނަމަވެސް މެލޭޝިޔާއަކީ ވެސް ގިނަ ބަޔަކު އެ ޤައުމަކަށް ހިޖުރަ ކުރަން ބޭނުންވާ ޤައުމެކެވެ.
ފާއިތުވި އަހަރުތަކުގައި ރޮހިންޔާގެ ރެފިއުޖީން ދަތުރުކުރާ ބޯޓުތައް މެލޭޝިޔާއިން ވަނީ އަނބުރާ ފޮނުވާލައިފައެވެ. 2010ވަނަ އަހަރާއި 2024ވަނަ އަހަރާ ދެމެދު މެލޭޝިޔާގެ އިދާރާތަކުން ވަނީ ޤާނޫނާ ޚިލާފަށް މެލޭޝިޔާގައި ދިރިއުޅޭ 2,089 ރޮހިންޔާ މުސްލިމުން ޙައްޔަރު ކޮށްފައެވެ.