މޫސުން ގޯސްވުމާއެކު ވީއައިއޭގެ އޮޕަރޭޝަންތަކަށް ދަތިތަކެއް!

މޫސުން ގޯސްވުމުގެ ސަބަބުން ވެލާނާ އިންޓަރނޭޝަނަލް އެއަރޕޯޓުގެ އޮޕަރޭޝަންތަކަށް ދަތިތަކެއް ކުރިމަތިވެ، ފްލައިޓްތަކުގެ ދަތުރުތައް ލަސްވެގެންދިޔަކަމަށް މޯލްޑިވްސް އެއަރޕޯޓް ކޮމްޕެނީ ލިމިޓެޑް، އެމްއޭސީއެލުން ވިދާޅުވެއްޖެއެވެ.

ޕީއެސްއެމް ނިއުސްއަށް މައުލޫމާތު ދެއްވަމުން އެމްއޭސީއެލްގެ ޗީފް ކޮމާޝަލް އޮފިސަރ މުހައްމަދު މިހާދު ވިދާޅުވީ، މޫސުން ގޯސްވުމުގެ ސަބަބުން މިއަދު މެންދުރު އެއަރޕޯޓްގެ އޮޕަރޭޝަންތަކަށް ވަރަށް ބޮޑު ދަތިތަކެއް ކުރިމަތިވިކަމަށެވެ.
އެގޮތުން ބައެއް ފްލައިޓްތައް ލަސްވުމާއި، ލަސްވި ފްލައިޓްތައް އެއް ވަގުތަކަކާއި ދިމާކޮށް ޖައްސަން އައުމުން ދަތިތަކެއް ކުރިމަތިވިކަން މިހާދު ފާހަގަކުރެއްވިއެވެ. ނަމަވެސް އެކަންކަމަށް އަވަސް ހައްލުތަކެއް ހޯދުނުކަމަށްވެސް މިހާދު ވިދާޅުވިއެވެ.

މިހާދު ވިދާޅުވީ ވައި ގަދަވުމުގެ ސަބަބުން ސީޕްލޭންގެ އޮޕަރޭޝަންތަކަށް ބުރޫ އަރައި، ބައެއް ފްލައިޓްތައް ލަސްވިކަމަށެވެ.

އެމްއޭސީއެލުން ވިދާޅުވީ، ސްކޫލު ބަންދު ނިމި، ވައިގެ ދަތުރުތައް އިތުރުވެފައިވާއިރު، އުމްރާއަށް ދިޔަ މީހުންވެސް އަންނަން ފެށުމާއެކު އެއަރޕޯޓް ޓާމިނަލްތެރޭގައި ވަރަށް ބޮޑަށް ތޮށްޖެހިގެން ދިޔަކަމަށެވެ. އަދި މާދަމާއަކީވެސް ރާއްޖެއަށް އުމްރާވެރިންގެ އިތުރުން އެތައް ފަތުރުވެރިން އައުމަށް ހަމަޖެހިފައިވާ ދުވަހަކަށް ވުމާއެކު، ވީހާވެސް މަދު ބޭފުޅުން އެއަރޕޯޓަށް ފަސިންޖަރުން ބަލާ ދިއުމަށް އެއަރޕޯޓުން ވަނީ އިލްތިމާސްކުރައްވާފައެވެ.