އިންޑިޔާގެ ވެރިރަށް ނިއު ދިއްލީއަށް ކުރިމަތިވެފައިވާ ވައި ތަޣައްޔަރުވުމުގެ މައްސަލަ މިއަދު އިތުރަށް ގޯސްވެ، ވައިގެ އުދުހުންތަކަށް ބުރޫ އަރާފާނެކަމަށް ބުނެ އެއަރލައިންތަކުން ކަންބޮޑުވުންފާޅުކޮށްފިއެވެ.
ނިއު ދިއްލީގެ ވައި ތަޣައްޔަރުވެ، އެއްވެސް ތަނެއް ނުފެންނަ މިންވަރަށް ވައި ނުސާފުވެފައިވާ ކަމަށް އޮފިޝަލުން ދަނީ ބުނަމުންނެވެ.
ނިއުދިއްލީ އަކީ ދުނިޔޭގެ އެންމެ ވައި ތަޣައްޔަރުވެފައިވާ ސިޓީއެވެ.
ވައި ނުސާފުކަމުން އަދި އެއްވެސް ފްލައިޓެއް ކެންސަލް ކުރަންޖެހިފައިނުވި ނަމަވެސް، މި ޙާލަތުގައި މަތިންދާބޯޓު ޖެއްސުމުގެ ޙާއްސަ އާލަތްތައް ނެތް ބޯޓުތަކަށް ދަތިތަކާ ކުރިމަތިވާނެކަމަށް ކަމާގުޅޭ އިދާރާތަކުން ވަނީ ބުނެފައެވެ.
އިންޑިޔާގެ އެންމެ ބޮޑު އިންޑިގޯ އެއަރލައިންސް އާއި ސްޕައިސްޖެޓުން ވެސް ވަނީ ވައި ތަޣައްޔަރުވުމުގެ ސަބަބުން ފްލައިޓުތައް ޑިލޭ ވުމުގެ ފުރުޞަތު އޮތް ކަމަށް ބުނެފައެވެ.
ވައިގެ އުދުހުންތަކުގެ އިތުރުން ރޭލު ދަތުރުތަކަށް ވެސް ބުރޫ އަރާފައިވާ ކަމަށް އިންޑިޔާގެ ބައެއް ނޫސްތަކުން ވަނީ ރިޕޯޓުކޮށްފައެވެ.
ނިއު ދިއްލީގެ އެއަރ ކޮލިޓީ އިންޑެކްސް ނުވަތަ ވައިގެ ކޮލިޓީ ހުރީ 351 ގައެވެ. ވައިގެ ކޮލިޓީ ބަލެމުގައި ގެންގުޅޭ މިންގަނޑަށް ބަލާއިރު، 50 އިން މަތީގެ ކޮންމެ އަދަދަކީ ސިއްޙަތަށް ގެއްލުން ލިބޭނެ ޙާލަތެއްކަމަށް ކަމާގުޅޭ އިދާރާތަކުން ވަނީ ބުނެފައެވެ.