މޫސުން ގޯސްވެ އުތުރުގެ ބައެއް ރަށްތަކަށް އުދައަރައި، ފެންބޮޑުވުމުގެ ޙާދިސާތަކެއް
-
އުދައަރައި ފެންބޮޑުވެގެން މިހާތަނަށް 6 ރަށަކުން ރިޕޯޓްކޮށްފައިވޭ
-
ގޭގެއަށް ފެންވަދެގެން ހިފައި ގެންގުޅޭ ތަކެއްޗަށް ވަނީ ގެއްލުންލިބިފައި
-
މިއަދާއި މާދަމާވެސް ބޮޑު ބަޔަކަށް މޫސުން ގޯސްވާނެ
ރާއްޖެއަށް މިހާރު ކުރަމުންދާ ވިއްސާރައިގައި އުތުރުގެ ބައެއް ރަށްތަކުގައި ފެންބޮޑުވުމާއި އުދެއެރުމުގެ ޙާދިސާތައް ހިނގައިގެން ރިޕޯޓްކޮށްފައިވާކަމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ވިދާޅުވެއްޖެއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އެންޑީއެމްއޭއިން ވިދާޅުވީ، ރެއިން ފެށިގެން ރާއްޖޭގެ ބައެއް ރަށްތަކަށް އުދަ އަރަމުންދާކަމަށާއި، ބޯކޮށް ވާރޭ ވެހުމުގެ ސަބަބުން ބައެއް ރަށްރަށުގައި ފެން ބޮޑުވަމުންދާކަމަށް މައުލޫމާތު ލިބެމުންދާކަމަށެވެ. އަދި ގެދޮރަށް ގެއްލުންތަކެއް ވެގެން މިހާތަނަށް ބައެއް ރަށްރަށުން ރިޕޯޓުކޮށްފައިވާކަމަށްވެސް އެންޑީއެމްއޭއިން ވިދާޅުވިއެވެ.
އެންޑީއެމްއޭއިން ވިދާޅުވިގޮތުގައި ބޯކޮށް ވާރޭ ވެހުމާއި އުދަ އެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެގެން ވަނީ ރިޕޯޓްކޮށްފައެވެ. މީގެ ތެރެއިން އުދައަރައިގެން ރިޕޯޓްކޮށްފައިވަނީ ށ. ނަރުދޫ އަދި ރ. އިނގުރައިދޫއިންނެވެ. އަދި ވާރޭ ވެހި ފެންބޮޑުވެގެން ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫއިން ވަނީ ރިޕޯޓްކޮށްފައެވެ.
އެގޮތުން އުދަ އެރުމުގެ ސަބަބުން ށ. ނަރަދޫއަށް ގެއްލުންތައް ލިބިފައިވާ ކަމަށާއި އެރަށުގެ ބައެއް ގެދޮރުތަކަށް ގެއްލުން ވެގެން މިހާތަނަށް 4 ގެޔަކުން ރިޕޯޓްކޮށްފައިވާކަމަށް އެންޑީއެމްއޭއިން ވިދާޅުވެއެވެ. އެ ރަށަށް އުދައަރައި ރަށުތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދިނުމުގައި، އެމްއެންޑީއެފް ނޮދަން އޭރިއާ ކޮމާންޑު ސިފައިންވެސް ދަނީ ހަރަކާތްތެރިވަމުންނެވެ.
މިހާރު ކުރަމުންދާ ވިއްސާރައިގެ ސަބަބުން ދ. އަތޮޅުގެ ދެ ރަށެއްގައި ފެން ބޮޑުވުމުގެ މައްސަލަ ރިޕޯޓްކޮށްފައިވާކަމަށް އެންޑީއެމްއޭއިން ވިދާޅުވިއެވެ. އެގޮތުން ދ. ކުޑަހުވަދޫއާއި ދ. މީދޫގައި ފެން ބޮޑުވެ 10 އަކަށްވުރެ ގިނަ ގެއަށް ފެންވަދެގެން ހިފައި ގެންގުޅޭ ތަކެއްޗަށް ގެއްލުން ލިބިފައިވާކަމުގެ ރިޕޯޓްކޮށްފައިވެއެވެ. އެހެންނަމަވެސް އެއްވެސް ގެއަކުން މީހުން ނެރެންޖެހޭފަދަ ހާލަތަކަށް ގޮސްފައިނުވެއެވެ. އަދި މިވަގުތު ރަށުގެ އެކި ދިމަދިމާލުން ކޯރު ކަނޑައިގެން ފެން ބޭރުކުރުމުގެ މަސައްކަތް ދަނީ ކުރަމުންނެވެ.
މީގެ އިތުރުން ފ. ނިލަންދޫއަށާއި އދ. މާމިގިއްޔަށްވެސް ބޯކޮށް ވާރޭވެހި ބައެއް ގޭގޭގައި ފެން ބޮޑުވެގެން، އެހީތެރިކަން ފޯރުކޮށްދިނުމުގައި އެމްއެންޑީއެފްއިން ދަނީ ހަރަކާތްތެރިވަމުންނެވެ.