މޯލްޑިވިއަންގެ ވައިޑްބޮޑީ ބޯޓު ގެނައުމުގެ ހަރަކާތުގައި އަގުބޮޑު އިނާމުތަކާއެކު ޚާއްސަ މުބާރާތެއް

މޯލްޑިވިއަންގެ ބޮޑު ބޯޓު ގެނައުން ފާހަގަކުރުމަށް ބާއްވާ ހަރާކާތުގައި އަގުހުރި އިނާމުތަކާއެކު ފޮޓޯ އަދި ވީޑިއޯގްރަފީ މުބާރާތަކާއި ގިނަ އިނާމުތައް ހިމެނޭ ލަކީޑްރޯއެއް އޮންނާނެކަމަށް މޯލްޑިވިއަނުން ވިދާޅުވެއްޖެއެވެ.

އޭ-330ގެ ބޯޓަކީ މޯލްޑިވިއަންގެ ޚިދުމަތަށް ގެންނަ ފުރަތަމަ ވައިޑް ބޮޑީ އެއަރކްރާފްޓެވެ. މި ބޯޓު ރާއްޖެ އަންނާނީ އަންނަ ހޯމަ ދުވަހުއެވެ. ވައިޑްބޮޑީ ފްލައިޓްގެ ޚިދުމަތް މޯލްޑިވިއަނުން ފެށުން ފާހަގަކުރުމަށް އަގުހުރި އިނާމުތަކާއެކު ގިނަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ.

އެގޮތުން ޚިދުމަތް ފެށުން ފާހަގަކުރުމުގެ ރަސްމީ ޖަލްސާ އޮންނާނީ މިމަމުގެ 6 ވަނަ ދުވަހު ވެލާނާ އިންޓަނޭޝަނަލް އެއަރޕޯޓްގައެވެ. އަދި މި އުފަލުގައި އާއްމުން ބައިވެރިކުރުމަށް، މާލެއާއި ހުޅުމާލެ ހިމެނޭހެން ޚާއްސަ އެއަރ ޝޯވ އެ ދުވަހު ބޭއްވުމަށް ވަނީ ހަމަޖެހިފައެވެ.

އެއަރޝޯވ އޮންނާނީ 6 ވަނަ ދުވަހު ހަވީރު 05:00 އިން 05:30 އަށް، މާލޭގެ އުސްފަސްގަނޑު ސަރަހައްދު އަދި ހުޅުމާލެ ފުރަތަމަ ފިޔަވައްސާ ދެވަނަ ފިޔަވަހީގެ އިރުމަތީ ގޮނޑުދޮށް ސަރަޙައްދުގައެވެ.

📸 Prepare your cameras for the skies! ✈️ Don’t miss this airshow! ✨ Join our photo & videography competition and capture the magic in the air. #MaldivianAero pic.twitter.com/cQsl9EuAA6

— MaldivianAero (@MaldivianAero) January 1, 2025

އެއަރ ޝޯވ ކުރިއަށްދާއިރު، އަގުބޮޑު އިނާމުތަކާއެކު ފޮޓޯ/ވީޑިއޯ މުބާރާތެއް ބޭއްވުމަށް ވަނީ ހުޅުވާލާފައެވެ. އެގޮތުން 1 ވަނަ އިނާމެއްގެ ގޮތުގައި ރާއްޖޭގެ 5 ތަރީގެ ރިސޯޓެއްގައި 2 ރޭ ހޭދަކުރުމުގެ ފުރުޞަތު ދެ މީހަކަށް ދިނުން ހިމެނެއެވެ. 2 ވަނަ އިނާމެއްގެ ގޮތުގައި އިންޑިއާ ދެކޮޅު ޓިކެޓު ދެމީހަކަށް އަދި 3 ވަނަ އިނާމެއްގެ ގޮތުގައި ރާއްޖޭގެ މަންޒިލަކަށް ދެ މީހަކަށް ދެކޮޅު ޓިކެޓު ދިނުން ހިމެނެއެވެ.

މި މުބާރާތުގައި ފޮޓޯއާއި ވީޑިއޯ ހުށައެޅޭނީ ސޯޝަލް މީޑިއާ މެދުވެރިކޮށެވެ. ފޮޓޯއާއި ވީޑިއޯ ހުށައެޅުމުގެ ސުންގަޑިއަކީ 9 ވަނަ ދުވަހުގެ 14:00 ކަމުގައި ކަނޑައަޅާފައިވާއިރު، މުބާރާތުގެ ވަނަތަށް އިޢުލާނުކުރާނީ 11 ޖެނުއަރީގައެވެ. މި މުބާރާތުގައި ބައިވެރިވުމާ ގުޅޭ ތަފްސީލްތައް މޯލްޑިވިއަންގެ ސޯޝަލް މީޑިއާ ޕްލެޓްފޯމްތަކުގައި ވަނީ ހިމަނާފައެވެ.

މޯލްޑިވިއަންގެ ވައިޑް ބޮޑީ ޚިދުމަތް ފެށުން ފާހަގަކުރުމާއި ކުންފުނީގެ ޚިދުމަތްތަކުގެ މަޢުލޫމާތު ޙިއްސާކުރުމަށް، ޖެނުއަރީ 11 ވާ ހޮނިހިރު ދުވަހު ހުޅުމާލެ ސެންޓްރަލް ޕާކުގައި ޚާއްސަ އާއިލީ ހަވީރެއް ބޭއްވުމަށް ވަނީ ހަމަޖެހިފައެވެ. މި ހަވީރުގައި އަގުބަޑު އިނާމުތައް ހިމެނޭގޮތަށް 30 ލަކީޑްރޯއެއް ނަގާނެއެވެ. ލަކީޑްރޯގެ އިނާމުގެ ގޮތުގައި ބައިނަލްއަޤްވާމީ އަދި އެތެރޭގެ އުދުހުންތަކުގެ ޓިކެޓްވެސް ހިމެނެއެވެ.

މޯލްޑިވިއަނަށް ގެންނަ ވައިޑް ބޮޑީ މަތިންދާ ބޯޓަކީ އޭ-330 މަރުކާރުގެ، 264 މީހުންގެ ޖާގައިގެ ބޯޓެކެވެ. މި ބޯޓު ރާއްޖެ ގެންނަ ދަތުރުގައި ބައިވެރިވާނީ ހުސް ދިވެހިންކަމަށް މޯލްޑިވިއަންއިން މަޢުލޫމާތުދެއެވެ. މި ބޯޓުގެ ދަތުރުތައް ފުރަތަމަ ފަށާނީ ޗައިނާގެ 3 މަންޒިލަކަށެވެ.