ހއ. އިހަވަންދޫގައި ބޭއްވި "ބިއުޓިފުލް ބްލޫ މައި ކަޕް 2024" ގެ ފައިނަލް މެޗުގައި ކުޅިމަގު ބަލިކޮށް މުބާރާތުގެ ޗެމްޕިއަންކަން އެންވީކޭއިން ހޯދައިފިއެވެ.
މުބާރާތުގެ ޗެމްޕިއަންކަން އެންވީކޭ ހޯދީ ރޭ ކުޅުނު ފައިނަލް މެޗުގެ ފުރިހަމަ ވަގުތު ހަމަވިއިރު އެންވީކޭ އަދި ކުޅިމަގު 1-1 ގެ ނަތީޖާއަކުން އެއްވަރުވުމުން، ޕެނަލްޓީ ޝޫޓްއައުޓުގައި 5-6 ގެ ނަތީޖާއަކުން ކުރި ހޯދައިގެންނެވެ.
ބަޑިބޭހުގެ ހަރަކާތްތަކާއެކު ފެށި ފައިނަލް މެޗު ޝަރަފްވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. މީގެ އިތުރުން މުބާރާތް އިންތިޒާމުކުރި ކުލަބު ޕޯލްސްޓާގެ އިސްވެރިންނާއި އިހަވަންދޫ ކައުންސިލްގެ އިސްވެރިންވެސް ވަނީ ބައިވެރިވެވަޑައިގެންފައެވެ.
ރޭ ކުޅުނު މެޗުގެ ފުރަތަމަ ހާފުގެ 12 ވަނަ މިނެޓުގައި އެންވީކޭގެ ނާއިޝް ވަނީ ލަނޑެއް ޖަހައި ލީޑު ނަގާފައެވެ. އެކަމަކު ފަހު ހާފުގެ 15 ވަނަ މިނެޓުގައި ކުޅިމަގު ޓީމުގެ ގާސިމް ސައްމާމް ވަނީ ލަނޑެއް ޖަހައި ނަތީޖާ އެއްވަރުކޮށްދީފައެވެ. ފައިނަލް މެޗްގެ މޮޅު ކުޅުންތެރިއަކަށް ހޮވުނީ ޕެނަލްޓީ ޝޫޓްއައުޓްގައި ދެ ޕެނަލްޓީ މަތަކުރި އެންވީކޭގެ ގޯލްކީޕަރު އިބްރާހީމް އާޒިމެވެ.
މުބާރާތުގެ ފެއާޕްލޭ ކުޅުންތެރިއަކަށް ކުޅިމަގު ޓީމުގެ ސައުދުﷲ އަބްދުލް ރަޝީދު ހޮވުނުއިރު، އެންމެ އުންމީދީ ކުޅުންތެރިއަކަށް ހޮވުނީ އެންވީކޭ ޓީމުގެ ނާއިޝްއެވެ. އެންމެ މޮޅު ޑިފެންސް ކުޅުންތެރިއަކަށް ކުޅިމަގު ޓީމުގެ ގާސިމް ސައްމާމް ހޮވުނުއިރު، އެންމެ މޮޅު ފޯވާޑަށް ހޮވުނީ ކުޅިމަގު ޓީމުގެ އާދަމް ނާއިލްއެވެ.
މި މުބާރާތުގެ އެންމެ ގިނަ ލަނޑު ޖެހި ކުޅުންތެރިއައަށްވެސް ހޮވުނީ އޭނާއެވެ. ނާއިލް ވަނީ މި މުބާރާތުގައި 10 ލަނޑު ޖަހާފައެވެ. އެންމެ މޮޅު މިޑްފީލްޑް ކުޅުންތެރިއައަށް ހޮވުނީ އެންވީކޭ ޓީމުގެ އައިހަމްއެވެ. އަދި މުބާރާތުގެ އެންމެ މޮޅު ގޯލްކީޕަރުގެ މަގާމާއި އެންމެ މޮޅު ކުޅުންތެރިއާގެ މަގާމު ހޯދީ އެންވީކޭގެ ކީޕަރު އާޒިމެވެ.
މުބާރާތުގެ އެންމެ މޮޅު ކޯޗަށް ހޮވުނީ އެންވީކޭގެ ކޯޗު ހަމްޒާ އިބްރާހީމެވެ. އަދި މުބާރާތުގެ ފެއާޕްލޭ ޓީމަކީ ތުރާކުނު ރެކްރިއޭޝަން ކުލަބެވެ. މުބާރާތުގެ ޗެމްޕިއަން ޓީމު ކަމަށްވާ އެންވީކޭއަށް 100،000 ރުފިޔާގެ ފައިސާގެ އިނާމެއް ދީފައިވާއިރު، ރަނަރަޕް ޓީމު ކުޅިމަގަށް ވަނީ 35،000 ރުފިޔާގެ ފައިސާގެ އިނާމެއް ދީފައެވެ.
މިއީ ބޮޑުތިލަދުންމަތީގައި ބާއްވަމުން އަންނަ މި މުބާރާތުގެ ޗެމްޕިއަންކަން އެންވީކޭ ހޯދި ދެވަނަ ފަހަރެވެ. އެންވީކޭގެ އިތުރުން މައި ކަޕްގެ ތަށި ދެ ފަހަރު ކާމިޔާބުކޮށްފައިވަނީ ޖަންގަލް އާއި، މާރަންދޫ ޔޫތު ސޮސައިޓީ އަދި ޔުނައިޓެޑް ޔޫތުންނެވެ. އެންވީކޭ މިމުބާރާތުގެ ޗެމްޕިއަންކަން ފުރަތަމަ ހޯދާފައިވަނީ 2012 ވަނަ އަހަރުއެވެ.