ލިވަޕޫލްގެ އެއްބަސްވުން ހަމަވާ ތިން ކުޅުންތެރިން ކަމަށްވާ ކެޕްޓަން ވާޖިލް ވެން ޑައިކް އާއި، ފޯވާޑް މުޙައްމަދު ސަލާހު އަދި ޑިފެންޑަރު ޓްރެންޓް އެލެގްޒެންޑަރ-އާނޯލްޑުގެ މައްޗަށް އޭނާއަށް އެއްވެސް ބާރެއް ނެތް ކަމަށް ކޯޗު އާނޭ ސްލޮޓް ބުނެފިއެވެ.
ލިވަޕޫލާއެކު ވެން ޑައިކް އާއި ސަލާހު އަދި ވައިސް ކެޕްޓަން އާނޯލްޑް ހަދާފައިވާ ކޮންޓްރެކްޓް މި ސީޒަން ނިމުމާއެކު ހަމަވާނެ އެވެ. މިހެންވެ މިއަދުން ފެށިގެން އެ ކުޅުންތެރިންނަށް ބޭނުން ކޮންމެ ކުލަބަކާ މަޝްވަރާކުރުމުގެ ފުރުސަތު ވަނީ ހުޅުވިފަ އެވެ. އެއީ ކުޅުންތެރިންގެ ކޮންޓްރެކްޓްގެ ފަހު ހަ މަސް ދުވަހު ކުޅުންތެރިޔާ އަށް އެ ބާރު ލިބޭތީ އެވެ.
މި ކުޅުންތެރިންގެ ތެރެއިން މިދިޔަ ހަފުތާގައި ސަލާހް ބުނެފައިވަނީ ލިވަޕޫލާއެކު އައު ކޮންޓްރެކްޓެއްގައި ސޮއިކުރުން އަދި އުޅެނީ ވަރަށް ދުރުގައި ކަމަށެވެ. މިކަމާ ގުޅިގެން ކޯޗާ ސުވާލު ކުރުމުން އޭނާ ބުނީ ކުޅުންތެރިންގެ އަމިއްލަ ދިރިއުޅުމާމެދު އޭނާ އަށް ބާރެއް ނެތް ކަމަށެވެ.
"އެމީހުން ޓްރޭނިންގައި ދަނޑުމަތީގައި ކުރާ ކަންކަމަށް އަހަރެންނަށް ފުރިހަމައަށް ބާރު އޮވޭ. އަދި މީޓިންއެއްގައި ވެސް އެމީހުންގެ މައްޗަށް އަހަރެންނަށް ބާރު އޮވޭ. އެކަމަކު އެމީހުންގެ އަމިއްލަ ދިރިއުޅުމާ ގުޅުންހުރި ކަންކަމުގައި ގޮތް ނިންމަން އަހަރެންނަށް އެއްވެސް ބާރެއްނެތް. އެއީ އަހަރެންގެ ކޯޗުކަމުގައި މިވީހާތަނަށް ކަންކަން އޮތްގޮތް.އާނޭ ސްލޮޓް - ލިވަޕޫލްގެ ކޯޗު
މި ސީޒަނުގައި ޓީމާ ހަވާލުވި ކޯޗު ބުނީ ކުޅުންތެރިންގެ މަސައްކަތާމެދު އެއްވެސް ޝަކުވާއެއްނެތް ކަމަށެވެ. ނަމަވެސް ކުލަބުގައި ކުޅުންތެރިން ބައިތިއްބުމާމެދު ގޮތެއް ނިންމާނީ އެކަމަށް ކުޅުންތެރިޔާ އާއި ކުލަބުން ވެސް އެއްބަސްވެވޭނަމަ ކަމަށެވެ.
ލިވަޕޫލްގެ ކުޅުންތެރިންގެ ތެރެއިން ވެންޑައިކް މިހާތަނަށް ވަކި އެއްޗެއް ނުބުނެ އެވެ. ސަލާހް އަށް ފްރާންސްގެ ޕީއެސްޖީ އާއި ސްޕޭނުގެ ބާސެލޯނާ ޝައުގުވެރިވެ އެވެ. އަދި އާނޮލްޑް ގަތުމަށް ރެއާލް މެޑްރިޑުން ވަނީ ބިޑްކޮށްފަ އެވެ.