ރާއްޖެފަދަ ކުޑަ ޤައުމެއްގެ ފަތުރުވެރިކަމަކީ ދުނިޔެއަށް މިސާލެއް: ވަޒީރު ފައިޞަލް

ރާއްޖެ ފަދަ ކުޑަ ޤައުމެއްގެ ފަތުރުވެރިކަމަކީ މިހާރު ދުނިޔެއަށް މިސާލެއް ކަމަށް، ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ފަތުރުވެރިކަމާ ބެހޭ ވަޒީރު މިހެން ވިދާޅުވީ، ފަތުރުވެރިކަމުގެ ކާމިޔާބީ ފާހަގަކޮށް އާ އަހަރު ހަރަކާތްތަކުގައި ބައިވެރިވެވަޑައިގެން ޕީއެސްއެމްއަށް ދެއްވި ބަސްތީގަތުމެއްގައެވެ.

ފަތުރުވެރިކަމުގެ ކާމިޔާބީ ފާހަގަކުރުމަށް ހުޅުމާލޭ ސެންޓްރަލް ޕާކުގައި ވަނީ ގިނަ ހަރަކާތްތަކެއް ބާއްވާފައެވެ. މި ހަރަކާތްތަކުގައި ބައިވެރިވަޑައިގެން ޕީއެސްއެމްއާ ވާހަކަފުޅުދައްކަވަމުން ވަޒީރު ފައިޞަލް ވަނީ މިދިޔަ އަހަރު ފަތުރުވެރިކަމުން، ހޯދި ކާމިޔާބީތައް ފާހަގަކުރައްވާފައެވެ. އެގޮތުން މިދިޔަ އަހަރު ފެބްރުއަރީ މަހަކީ ރާއްޖެއަށް އެންމެ ގިނަ ފަތުރުވެރިން އައި މަސްކަން ފާހަގަކޮށް ވަޒީރު ވަނީ މިދިޔަ އަހަރުގެ ޑިސެމްބަރު މަހަކީ ދެވަނައަށް އެންމެ ގިނަ ފަތުރުވެރިން އައި މަސްކަން މިހާރު ހުރި ހިސާބުތަކުން ދައްކާކަމަށް ވިދާޅުވެފައެވެ.

ވަޒީރު ވަނީ ރާއްޖޭގެ ފަތުރުވެރިކަމުގެ ސިނާޢަތުން މިދިޔަ އަހަރު ދުނިޔޭގެ އެންމެ މަޤުބޫލު މަންޒިލުގެ އެވޯޑު 5 ވަނަ ފަހަރަށް ހޯދާފައިވާކަން ފާހަގަކޮށްފައެވެ. އަދި މިހާރު ދުނިޔޭގެ ޤައުމުތަކުން ރާއްޖެ މިސާލަކަށް ބަލަމުންދާކަމަށް ވަޒީރު ވިދާޅުވިއެވެ.

"އަޅުގަނޑަށް ޤަބޫލުކުރެވޭ ދިވެހި ރާއްޖޭގެ ފަތުރުވެރިކަމަށް އޮތީ އުފާ ފާގަތި މުސްތަޤުބަލެއްކަން. ޗެލެޖެސް ތަކެއް އެބަހުރި. އެކަމަކު ވޯލްޑް ލީޑިންގް ޑެސްޓިނޭޝަން އެވޯޑު 5 ފަހަރު ދެމެހެއްޓޭނީ ދުނިޔޭގެ ފަތުރުވެރިންގެ ސަމާލުކަން ދިވެހިރާއްޖެއަށް ހުރީމަ. މޯލްޑިވްސްއަކީ މިހާރު ބްރޭންޑެއް. މި ކޮޕީ އެބަކުރޭ ވަރަށް ގިނަ ޤައުމުތަކުން. އެއީ ރާއްޖެއަށް ލިބޭ ޝަރަފެއް " ވަޒީރު ފައިޞަލް ވިދާޅުވިއެވެ.

ފަތުރުވެރިކަމުގެ ސިނާޢަތުން މިދިޔަ އަހަރު ހޯދާފައިވާ ކާމިޔާބީތަކަކީ މި ސިނާޢަތުގައި ހަރަކާތްތެރިވާ ފަރާތްތަކުން ހޯދާފައިވާ މުހިންމު ކާމިޔާބީތަކެއް ކަމަށް ވަޒީރު ފާހަގަކުރެއްވިއެވެ. އެގޮތުން، ރައީސުލްޖުމްހޫރިއްޔާގެ އެއްބާރުލުމާއެކު، ހޯދި މި ކާމިޔާބީއަށް ސިނާޢަތަށް ޝުކުރު ހައްޤު ކަމަށް ވަޒީރު ވިދާޅުވިއެވެ.

"2 މިލިއަން ފަތުރުވެރިންގެ މި ޓާގެޓް އަޅުގަނޑުމެންނަށް ހާސިލްކުރެވުނީ މުޅި އިންޑަސްޓްރީގެ އެއްބާރުލުމާއި ރިސޯޓުތަކުގެ މާކެޓިން ޓީމާއި، އެމްއެމްޕީއާރްސީގެ ހީވާގި މުވައްޒަފުންނާއި، ޓުއަރިޒަމް މިނިސްޓްރީގެ މުވައްޒަފުންނައީ އަދި ރައީސް ސަރުކާރުތެރެއިން އަޅުގަނޑުމެންނަށް ފޯރުކޮށްދިން ފުރުސަތުގެ ސަބަބުން." ވަޒީރު ފައިޞަލް ވިދާޅުވިއެވެ،

ރާއްޖޭގެ ފަތުރުވެރިކަމުގެ ސިނާޢަތުން މިދިޔަ އަހަރު ކުރިއެރުންތަކެއް ހޯދާފައިވާއިރު، ވަޒީރު ވަނީ މިއަހަރު އެންމެ ބޮޑު އިސްކަމެއްދޭނީ ރިސޯޓުތަކުގެ އޮކިއުޕެންސީ ރަނގަޅު ކުރުމަށް ވިދާޅުވެފައެވެ. އެގޮތުން ފަތުރުވެރިކަމުގެ އޮކިއުޕެންސީ ރަނގަޅުކޮށް، މިއަހަރު މިދިޔަ އަހަރަށް ވުރެ 15 އިންސައްތަ އިތުރަށް ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ.