ރާއްޖޭގައި ޗުއްޓީ ހޭދަކުރުމަށް 52 ދަތުރުލިބޭ އެމްއެމްޕީއާރުސީގެ ބޮޑު ކެމްޕެއިނެއް

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މިއަހަރުގެ އެންމެ ބޮޑު ބައިނަލްއަޤްވާމީ ކެންޕެއިން ފަށައިފިއެވެ. މި ކެންޕެއިން ކުރިއަށްގެންދަނީ "ވޯލްޑްސް ބިގޭސްޓް ގިވްއަވޭ"ގެ ނަމުގައެވެ.

އެމްއެމްޕީއާރުސީން މި ކެންޕެއިން ލޯންޗްކޮށްފައިވަނީ ނިމުނު ޑަބްލިއުޓީއެމް ލަންޑަން ފެއަރގެ ތެރެއިންނެވެ. ސޯޝަލް މީޑިއާ މެދުވެރިކޮށް ކޮންމެ މަހަކު ބާއްވާ މި މުބާރާތްތަކުގެ ނަސީބުވެރި ފަރާތްތަކަށް ކޮންމެ ހަފްތާއަކުވެސް ރާއްޖޭގައި ޗުއްޓީ ހޭދަކޮށްލުުމުގެ ފުރުސަތު ލިބިގެންދާނެއެވެ. އެގޮތުން ޖުމްލަ 52 ޗުއްޓީ ދަތުރު ދިނުމަށް ހަމަޖެހިފައިކަމަށް އެމްއެމްޕީއާރުސީން ވިދާޅުވެއެވެ.

ކޮންމެ މުބާރާތެއްގައިވެސް ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ޤުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ތަފާތު ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެއެވެ. އަދި ލަގްޒަރީ، ފެމިލީ، ޑައިވިން އަދި އެހެނިހެން ހިތްގައިމު ތަފާތު ސެގްމެންޓްތަކަށް އަލިއަޅުވާލެވިގެންދާނެއެވެ.

"ދަ ވޯލްޑްސް ބިގެސްޓް ގިވްއަވޭ" ކެމްޕޭންގެ މައިގަނޑު މަޤްސަދަކީ ސޯޝަލް މީޑިއާގެ ޒަރީއްޔާއިން ބައިނަލްއަޤްވާމީ ފަރާތްތަކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުގުވެރިކުރުވުންކަމަށް އެމްއެމްޕީއާރުސީން ވިދާޅުވެއެވެ.

މި މުބާރާތްތަކުގައި ބައިވެރިވުމުން ފަތުރުވެރިންނަށް ރާއްޖޭގެ ތަފާތު ހިތްގައިމުކަން ދެނެގަނެ، ލިބޭ ތަފާތު ތަޖުރިބާތައް ހިއްސާކޮށް، ރާއްޖެ އަކީ އަހަރުގެ ކޮންމެއިރަކުވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރު ކުރުންވެސް ހިމެނެއެވެ. އަދި ރާއްޖެއަކީ އެންމެ މަޤްބޫލު ފަތުރުވެރިކަމުގެ މަންޒިލްގެގޮތުގައި ޕްރޮމޯޓުކޮށް، ރާއްޖޭގެ ފަތުރުވެރިކަމުގެ އަގުހުރި މައުލޫމާތުތައް މިހަރަކާތުގެ ތެރެއިން ފޯރުކޮށްދެވޭނެއެވެ.

އެމްއެމްޕީއާރުސީއިން ވިދާޅުވީ، އެ ކުންފުނިން މަސައްކަތްކުރަމުން ދަނީ ރާއްޖެއަށް ލިބިފައިވާ ވޯލްޑްސް ލީޑިން ޑެސްޓިނޭޝަންގެ މަގާމު ދެމެހެއްޓުމަށްކަމަށެވެ.