މިއަހަރަކީ ރައްޔިތުން ބާރުވެރިކޮށް، ޤައުމުގެ ސިޔާދަތު ހިމާޔަތްކުރެވުނު އަހަރެއް: ރައީސް
-
ރައްޔިތުންގެ ކަންކަމުގައި ގޮތް ނިންމުމަށް ރައްޔިތުންގެ ބަސް ހޯދަންޖެހޭނެކަމަށް
-
ޤާނޫނުއަސާސީއަށް ގެންނެވި ބަދަލުތަކާއެކު ރައްޔިތުން ބާރުވެރިކުރެއްވި އަހަރެއް
ނިމުނު 2024 ވަނަ އަހަރަކީ ރައްޔިތުން ބާރުވެރިކުރެއްވުނު، އަދި ޤައުމުގެ ސިޔާދަތު ހިމާޔަތްކުރެވުނު އަހަރެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަހަރުގެ ކާމިޔާބީއާ ގުޅޭގޮތުން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ 2024ވަނަ އަހަރަކީ ރައްޔިތުން ބާރުވެރިކުރުވުމުގެ އިތުރުން ގައުމުގެ ސިޔާދަތު ހިމާޔަތްކުރެވުނު އަހަރެއްކަމަށެވެ. އެގޮތުން ޤާނޫނުއަސާސީއަށް ގެންނެވި އިޞްލާހުތަކުގެ ސަބަބުން ޤައުމުގެ މުހިންމު ކަންކަމުގައި ރައްޔިތުންގެ ބަސް ހޯދަންޖެހޭ ކަމަށާއި، އެއީ ރައްޔިތުންގެ އަތްމައްޗަށް ބާރުވެރިކަން ދިނުންކަން އެމަނިކުފާނު ސިފަކުރެއްވިއެވެ.
ރައީސުލްޖުމްހޫރިއްޔާ ވަނީ ރައްޔިތުންގެ މަޖިލީހުން ޤާނޫނު އަސާސީއަށް ގެންނެވި އިސްލާހުތައްވެސް އެމަނިކުފާނުގެ ޕޯސްޓާއެކު ހިއްސާކުރައްވާފައެވެ.
ޤާނޫނުއަސާސީއަށް ގެންނެވި މުހިންމު ބަދަލުތަކުގެ ތެރޭގައި ރާއްޖޭގެ ސަރަޙައްދަށް އެއްވެސް ބަދަލެއް ގެނައުމުގައި އަމަލުކުރާނެ ގޮތް ހިމެނެއެވެ. އެގޮތުން ރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުންނެވެ. މިއާއެކު ރައްޔިތުންގެ ފެންނަ ނުފެންނަ ވޯޓެއްވެސް ނަގަންޖެހެއެވެ.
އެއްބަސްވުމެއްގެ ދަށުން ނުވަތަ އެނޫންވެސް ގޮތަކުން، ރާއްޖެއިން ބޭރުގެ ފަރާތްތަކަށް ރާއްޖޭގެ ސަރަޙައްދުގެ އެއްވެސް ބައެއް އަސްކަރީ ބޭނުމަކަށް ދިނުމުގެ ހުއްދަ ދެވޭ އުސޫލުވެސް ވަނީ ޤާނޫނުއަސާސީން އިސްލާހުކުރައްވާފައެވެ. މި އިސްލާހުގެ ދަށުން އެފަދަ ހުއްދައެއް ދެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްކޮށްގެންކަމަށް އައު އިޞްލާހުގައިވެއެވެ.
މީގެއިތުރުން ޤާނޫނު އަސާސީގައި ރައްޔިތުންގެ ފެންނަ ނުފެންނަ ވޯޓަކަށް ދާން ޖެހޭ މާއްދާ އިސްލާހުކުރާނަމަ، ރައްޔިތުންގެ ރުހުން ހޯދަން ޖެހޭގޮތަށްވެސް ޤާނޫނުއަސާސީއަށް ވަނީ އިސްލާހު ގެންނަވާފައެވެ.
މި އިސްލާހުތަކުގެ ސަބަބުން ކުރިއަށްވުރެ ރަނގަޅަށް ރައްޔިތުންގެ ބާރުވެރިކަން ޔަގީންކުރެވިފައިވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި މިހާރު ރައްޔިތުންގެ ޙައްގުތައް، ރައްޔިތުން ބޭނުންވާގޮތަށް ރައްޔިތުންގެ އަތްމައްޗަށް ލިބިފައިވާކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.