އާ އަހަރުގެ ފުރަތަމަ ފަސް ދުވަހުވެސް މޫސުން ގޯސްވާނެ

މި ފެށޭ އައު އަހަރުގެ ފުރަތަމަ ފަސް ދުވަހުވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ލަފާކުރައްވައިފިއެވެ.

މޫސުން ގޯސްވާނެކަމުގެ އިންޒާރު ދެއްވާ މޫސުމާބެހޭ ޤައުމީ އިދާރާއިން ޢާންމުން ސަމާލުވުމަށް ކުރެއްވި އިލްތިމާސްގައި ވިދާޅުވީ، ސްރީލަންކާގެ އިރު ދެކުނުގަ އުފެދިފައިވާ ކޮޅިގަނޑާއި، އެކޮޅިގަނޑާ ގުޅިފައިވާ ލޯޕްރެޝާރ ޓްރަފުގެ ސަބަބުން އައު އަހަރުގެ ބަންދުގައި ރާއްޖެއަށް ވަރަށް ބޮޑަށް ވިއްސާރަކުރާނެކަމަށެވެ.

އެގޮތުން ޖެނުއަރީ ފުރަތަމަ ދުވަހުން ފެށިގެން ފަސްވަނަ ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭވެހި ވަޔާއި ކަނޑުތައް ގަދަވާނެކަމަށް އެއިދާރާއިން ވިދާޅުވިއެވެ. އަދި ބައެއް އަތޮޅުތަކަށް އުދަ އެރުމުގެ ފުރުޞަތުވެސް އެބައޮޮތްކަމަށް މޫސުމާބެހޭ ޤައުމީ އިދާރާއިން ވިދާޅުވިއެވެ.

ވައި ޖެހޭނީ އުތުރާއި މެދުރާއްޖޭގެ އަތޮޅުތަކަށް، އުތުރާއި އިރުއުތުރުން، ދެކުނުގެ އަތޮޅުތަކަށް ހުޅަނގާއި، ހުޅަނގު އުތުރުން ގަޑިއިރަކު 15 މެލާއި 25 މޭލާ ދެމެދުގެ ބާރުމިނުގިކަމށާއި، ވިލާގަނޑުގައި ގާތްގަނޑަކަށް 50 މޭލަށް ވައިގަދަވެ، ކަނޑުތައްވެސް ގަދަވާނެކަމަށް މޫސުމާބެހޭ ޤައުމީ އިދާރާއިން ވިދާޅުވިއެވެ. އެހެންކަމުން ޢާންމުކޮށް ވައި ގަދަވާނެކަމަށްވެސް އެ އިދާރާއިން ވިދާޅުވިއެވެ.

މޫސުން ގޯސްވާނެކަމަށް ލަފާކުރެވޭނީ ޚާއްޞަކޮށް ކަނޑު ދަތުރުކުރާ ފަރާތްތަކުން އަދި ޢާންމުކޮށް ހުރިހާ އެންމެންވެސް މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.