އިނގިރޭސި ޕްރިމިއަރ ލީގުގައި ރޭ ނިއުކާސަލް ޔުނައިޓެޑާއި ދެކޮޅަށް ކުޅުނު މެޗުން 2-0 ގެ ނަތީޖާއަކުން މެންޗެސްޓާ ޔުނައިޓެޑް ބަލިވެއްޖެއެވެ.
އޯލްޑް ޓްރެފަޑްގައި ކުޅުނު މި މެޗުން ނިއުކާސަލް ޔުނައިޓެޑް މޮޅުވެފައިވާއިރު މިއީ 1972 ވަނަ އަހަރަށްފަހު މި ދަނޑުގައި ނިއުކާސަލް ޔުނައިޓެޑް މޮޅުވި ދެވަނަ ފަހަރެވެ. އަދި މެންޗެސްޓަރ ޔުނައިޓެޑް މި މެޗުން ބަލިވުމާއެކު އެ ޓީމު ވަނީ އަމިއްލަ ދަނޑުގައި އެންމެ ފަހުން ކުޅުނު ތިން މެޗުންވެސް ބަލިވެފަ އެވެ. މިއީ 1945 ވަނަ އަހަރަށްފަހު އަމިއްލަ ދަނޑުގައި ޖެހިޖެހިގެން ތިންވަނަ މެޗުން އެ ޓީމު ބަލިވި ފުރަތަމަ ފަހަރެވެ.
މި މެޗުން މޮޅުޗުމާއެކު ނިއުކާސަލް ޔުނައިޓެޑް ވަނީ 19 މެޗުން ލިބިފައިވާ 32 ޕޮއިންޓާއެކު ތާވަލުގެ ފަސްވަނަ މަގާމަށް އަރާފަ އެވެ. މެންޗެސްޓަރ ޔުނައިޓެޑް އޮތީ 22 ޕޮއިންޓާއެކު ތާވަލުގެ 14 ވަނައިގަ އެވެ.
ނިއުކާސަލް އިން ވަނީ މި މެޗު ފެށުނުތާ ހަތަރުވަނަ މިނިޓުގައި ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ އެލެކްޒެންޑަރ އިސާކް އެވެ. މިއީ އޭނާ މި ސީޒަނުގައި ޖެހި 12 ވަނަ ލަނޑެވެ. އަދި އޭނާ ވަނީ އެންމެ ފަހުން ކުޅުނު ހަ މެޗުގައި އަށް ލަނޑު ޖަހާފަ އެވެ.
އަދި އޭގެ ފަނަރަ މިނިޓު ފަހުން ޖޮއެލިންޓަން ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
އަމޮރިމްގެ ޓީމުން ފުރުސަތު ގެއްލިފައިވާ މާކަސް ރަޝްފޯޑް ބެންޗުން ފެނުނު ނަމަވެސް މި މެޗުގައި އޭނާއަށް ކުޅުމުގެ ފުރުސަތު ދީފައެއް ނުވެއެވެ.