އަންނަ އަހަރު އިނގިރޭސި ޓީމަކާއެކު އެކުވެރިކަމުގެ މެޗުތަކެއް ކުޅެން ތާވަލުކޮށް، ކްރިކެޓް ބޯޑް އޮފް މޯލްޑިވްސް (ސީބީއެމް) އިން އަހަރީ ކަލަންޑަރު އިއުލާންކށްފިއެވެ.
އަންނަ އަހަރު އިނގިރޭސި ވެޓެރެންސި ޓީމުން މާލޭގައި މެޗުތަކެއް ކުޅުމަށް ހަމަޖެހިފައިވަނީ މާޗު މަހުގެ 11 އަދި 13 ވަނަ ދުވަހުއެވެ. މި މެޗުގައި އިނގިރޭސިވިލާތުން ވާދަކުރާނީ ކޯޕަރޭޓިވްއަށް ނިސްބަތްވާ ވެޓެރަންސް ޓީމެކެވެ.
އަންނަ އަހަރުގެ ކްރިކެޓް ކަލަންޑަރުގައި ވަނީ މާލެ އާއި ފުވައްމުލައް ސިޓީގައި ގިނަ ހަރަކާތްތަކެއް އެއް ހަމައެއްގައި ގެންދަން ނިންމާފައެވެ. އެގޮތުން މާލެ ސަރަހައްދު ނެގުމަށްފަހު އަންނަ އަހަރު ކްރިކެޓް އެންމެ ގިނަ ހަރަކާތްތައް ކުރިޔަށްދަނީ ފުވައްމުލައް ސިޓީގައެވެ.
ކްރިކެޓް ބޯޑުން އިއުލާންކުރި އަންނަ އަހަރުގެ ކަލަންޑަރުގައިވާ ގޮތުން ކްރިކެޓް ސީޒަން ހުޅުވާނީ އަންނަ ޖެނުއަރީ މަހުގެ 17 ވަނަ ދުވަހުއެވެ. އޭގެ އެއް ހަފުތާ ކުރިން ކްރިކެޓް ނައިޓް ބޭއްވުމަށް ތާވަލުކޮށްފައިވާއިރު، އަންނަ އަހަރުގެ ފުރަތަމަ މުބާރާތަކަށް އޮންނާނީ ޖެނުއަރީ މަހުގެ 24 ވަނަ ދުވަހު ފެށުމަށް ހަމަޖެހިފައިވާ 50 އޯވަރުގެ ގައުމީ ކްރިކެޓް މުބާރާތެވެ.
އަންނަ އަހަރު ރާއްޖެއިން ވާދަކުރާ ބައިނަލްއަގުވާމީ މުބާރާތްތަކަށް ބަލާއިރު، އޭޕްރީލް މަހުގެ 4 އިން 26 އަށް ކުރިއަށްދާ 50 އޯވަރުގެ އޭސީސީ މެންސް ޗެލެންޖް ކަޕުގައި ވާދަކުރާނެއެވެ. އަދި ރާއްޖޭގެ 16 އަހަރުން ދަށުގެ ޓީމުން މެއި މަހުގެ 16 އިން 24 އަށް ބާއްވާ 50 އޯވަރުގެ އީސްޓް ޒޯން މުބާރާތުގައި ވާދަކުރާނެއެވެ.
އަންނަ އަހަރުގެ ޓީ20 ޗެމްޕިއަންޝިޕް ޖޫން މަހު ފެށުމަށް ތާވަލުކޮށްފައިވާއިރު، މޯލްޑިވްސް ޓީ20 ޕްރިމިއަރ ލީގު ޖުލައި މަހު ފެށުމަށްވެސް ވަނީ ހަމަޖެހިފައެވެ. އަދި އަންނަ އަހަރުގެ ކްރިކެޓް ކަލަންޑަރުގެ އެންމެ ފަހު މުބާރާތަކަށް ތާވަލުކޮށްފައިވަނީ ޑިސެމްބަރު މަހުގެ 21 ގައި ފެށުމަށް ހަމަޖެހިފައިވާ 19 އަހަރުން ދަށުގެ ޕްރެޒިޑެންޓްސް ކަޕެވެ.