މަސްވެރިކަމުގެ މާކެޓިން ކުންފުނީގެ ޗެއަރޕަރސަންގެ މަޤާމަށް އަހުމަދު ޝަރީފް

ސަރުކާރުގެ މަސް ކުންފުނި، މިފްކޯގެ ޗެއާޕަރސަންގެ މަގާމުގައި ހުންނެވި އަހުމަދު ޝަރީފް މަގާމުން ވަކިކޮށް، މަސްވެރިކަން އިޝްތިހާރު ކުރުމަށް ސަރުކާރުން އުފެއްދި ކުންފުންޏަށް ބަދަލުކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީން ވިދާޅުވީ ގދ. ތިނަދޫ، ސޯމާ އަހުމަދު ޝަރީފް މިފްކޯގެ ޗެއާޕަރސަންގެ މަގާމުން ވަކިކުރުމަށްފަހު ބަދަލުކޮށްފައިވަނީ މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓުން އެންޑް ޕްރޮމޯޝަން ކޯޕަރޭޝަން، އެމްފޯމްޕީސީގެ ޑިރެކްޓަރުންގެ ބޯޑަށާއި ޗެއާޕަރސަންގެ މަގާމަށް ކަމަށެވެ.

އެމްފޯމްޕީސީއަކީ މަސްވެރިކަމުގެ ސިނާއަތުގެ ކުރިއެރުވުމުގެ ގޮތުން ދިވެހިރާއްޖޭގައި ބާނާ މަސް ގަންނާނެ އިތުރު ބާޒާރުތައް ހޯދައި މާކެޓްކޮށް، ޕްރޮމޯޓް ކުރުމަށް އުފެއްދި ހާއްސަ ކުންފުންޏެކެވެ. މި ކުންފުންޏަކީ، ރައީސުލްޖުމްހޫރިއްޔާއަށް ކުންފުނީގެ ޤާނޫނުގެ ދަށުން ލިބިވަޑައިގަންނަވާ ބާރުގެ ދަށުން އުފެއްދެވި ކުންފުންޏެކެވެ. މި ކުންފުންޏަކީ ދަރަންޏަށް ޒިންމާވާންޖެހޭ މިންވަރު ކަނޑައެޅިފައިވާ، ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންޏެކެވެ.

ސަރުކާރުން ވިދާޅުވީ މި ކުންފުނި އުފެއްދެވުމުގެ އެންމެ ބޮޑު މަޤްޞަދަކީ ރާއްޖޭގެ މަސްވެރިކަމުގެ ސިނާއަތު އިތުރަށް ފުޅާކޮށް މުޖުތަމަޢަށް އެ ޞިނާޢަތުން ލިބިދޭ މަންފާ އިތުރުކުރުންކަމަށެވެ. އެގޮތުން އެކުއަރކަލްޗަރ އާއި މެރިކަލްޗަރ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން، ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަޤްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުމުގެ މަސައްކަތް މި ކުންފުނިން ކުރިއަށް ގެންދަވާކަމަށް ސަރުކާރުން ވިދާޅުވެއެވެ.

މީގެއިތުރުން އެ ވިޔަފާރިން ލިބޭ މަންފާ އިތުރު ކުރުމަށްޓަކައި ރާއްޖޭގެ މަސްވެރިކަމަށް ޚާއްޞަ ބްރޭންޑެއް ތަޢާރަފުކޮށް، ޤައުމީ ބާޒާރާއި ބައިނަލްއަޤްވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުމަކީވެސް ކުންފުނީގެ މަގްސަދެއްކަމަށް ސަރުކާރުން ވިދާޅުވެއެވެ.