2024: ސިއްޙީ ދާއިރާއިން މުހިއްމު ގިނަ ކަންތައްތަކެއް ކުރެވުނު އަހަރެއް

ސިއްޙީ ދާއިރާއިން 2024ވަނަ އަހަރުގެ ތެރޭގައި މުހިއްމު ގިނަ ކަންތައްތަކެއް ސަރުކާރުން ކުރައްވާފައިވެއެވެ. ސިއްޙީ ދާއިރާގައި ހައްލުނުވެ ގިނަ ދުވަސްވެފައިވާ މުހިއްމު މައްސަލަތަކެއް ހައްލުކުރުމުގެ މަސައްކަތް ވަނީ ފަށާފައެވެ.

އެގޮތުން އާސަންދަ ޚިދުމަތް އެކަމަށް އެންމެ ބޭނުންޖެހިފައިވާ މީހުންނަށް ދެވޭކަން ކަށަވަރުކުރުމާއި ސަރުކާރުން ބޭހުގެ އަގު ކޮންޓްރޯލްކުރުމަށް ނިންމަވައި، އެކަންކުރުމަށް ފިޔަވަޅުތަކެއް ވަނީ އަޅާފައެވެ.

މީގެއިތުރުން ރާއްޖޭގެ މައި ހޮސްޕިޓަލުގެ ގޮތުގައި ދަރުމަވަންތަ ހޮސްޕިޓަލް ހަމަޖައްސަވައި، އިތުރު ޚިދުމަތްތަކާއެކު އެހޮސްޕިޓަލް ޓާރޝަރި ފެންވަރަށްވަނީ ބަދަލުކޮށްފައެވެ. ހަމައެއާއެކު ހުޅުމާލޭ ހޮސްޕިޓަލްވެސްވަނީ އިތުރު ޚިދުމަތްތަކާއެކު ޓާރޝަރީ ހޮސްޕިޓަލަކަށް ބަދަލުކޮށްފައެވެ.

މީގެއިތުރުން ތެލަސީމިއާ ހޮސްޕިޓަލާއި ކެންސަރު ހޮސްޕިޓަލް ހިމެނޭހެން އިތުރު 5 ހޮސްޕިޓަލް ތަރައްޤީކުރުމަށް މިއަހަރުގެ ބަޖެޓުގައިވަނީ ހިމަނާފައެވެ. ކެންސަރަށް ޚާއްސަ ހޮސްޕިޓަލު ތަރައްޤީކުރުމަށް ނިންމާފައިވަނީ ދަރުމަވަންތަ ހޮސްޕިޓަލާ އިންވެގެން އޮތް ބިމުގައެވެ. 25 ބުރީގެ މި ޢިމާރާތް ތަރައްޤީކުރުމުގެ ކޮންސެޕްޓް މަސައްކަތާއި ފުރަތަމަ މަރުޙަލާގެ ޑިޒައިން މަސައްކަތް ވަނީ ނިމިފައެވެ.

ކާބޯތަކެތިގެ ރައްކާތެރިކަން ކަށަވަރުކުރުމަށް، ކާބޯތަކެތީގެ ރައްކާތެރިކަމުގެ ޤާނޫނެއް ފުރަތަމަ ފަހަރަށް ވުޖޫދަށް ގެނެސް މޯލްޑިވްސް ފުޑް އެންޑް ޑްރަގް އޮތޯރިޓީއަށްވަނީ މުހިއްމު ބާރުތަކެއް ދީފައެވެ.

ސަރުކާރުން ކުރައްވާފައިވާ މުހިއްމު އެހެންކަންކަމަށް ބަލާއިރު ނަފްސާނީ ދުޅަހެޔޮކަން ކަށަވަރުކުރުމަށް 24 ގަޑިއިރު ޚިދުމަތްދޭ ނޭޝަނަލް މެންޓަލް ހެލްތު ހެލްޕްލައިން 1677ގެ ޚިދުމަތްވަނީ ފަށްޓަވާފައެވެ. މީގެއިތުރުން ލެބޯޓްރީގެ ޚިދުމަތް ނުލިބޭ 76 ރަށެއްގައި ލެބޯޓްރީގެ ޚިދުމަތްވޭތުވެދިޔަ އަހަރުތެރޭގައިވަނީ ފަށްޓަވާފައެވެ. ހަމައެއާއެކު އާސަންދައިގެ ދަށުން އައިވީއެފް ހެދުމުގެ ފުރުޞަތު ފުރަތަމަ ފަހަރަށް ދޭންވަނީ ފަށާފައެވެ.

2024 ވަނަ އަހަރު ސިއްޙީ ދާއިރާއިން އެޅުއްވި އެންމެ ފާހަގަކޮށްލެވޭ އެންމެ ބޮޑު އެއް ބަދަލަކީ ދުންފަތުގެ ބާވަތްތައް ކޮންޓްރޯލްކުރުމަށް ސަރުކާރުން އެޅުއްވި ފިޔަވަޅުތަކެވެ. މިގޮތުން ރާއްޖެއަށް އެތެރެކުރާ ދުންފަތުން ނަގާ ޓެކްސް ބޮޑުކޮށް، ވޭޕް އެތެރެކުރުންވަނީ މަނާކޮށްފައެވެ. އަދި ރާއްޖޭގައި ދުންފަތުގެ ބާވަތްތައް ވިއްކޭނެ އެންމެ ހަގު ޢުމުރަކީ 21 އަހަރުކަމަށްވެސްވަނީ ކަނޑައަޅާފައެވެ.

އާސަންދަ އިސްލާޙުކުރުމަށް 2024 ވަނަ އަހަރު ކުރެވުނު މަސައްކަތުން ބަލްކް ޕްރޮކިއުމަންޓް އުސޫލުން ރާއްޖެއިން ބޭރުން ބޭސް އެތެރެކުރުމުގެ މަސައްކަތްވަނީ ފައްޓަވާފައެވެ. އަދި ރާއްޖޭގެ އެކި ސަރަހައްދުތަކުން ސިއްޙީ ކުއްލި ޙާލަތްތަކުގައި ފަރުވާއަށް އެއްތަނުން އަނެއް ތަނަށް ބަލި މީހުން އުފުލުމަށް "އެއަރ އެމްބިއުލާންސް"ގެ ޚިދުމަތްވަނީ ފައްޓަވާފައެވެ. މީނޫންވެސް އެތައް ބަދަލުތަކެއް ރާއްޖޭގެ ސިއްޙީ ނިޒާމަށް މިވީ އަހަރެއްގެ ތެރޭގައިވަނީ ގެނެވިފައެވެ.