ބިންވެރިޔާ އަދި ގެދޮރުވެރިޔާ ސްކީމްގެ މައްސަލައިގެ ތަހުގީގަށް ޕޯޓަލް މެދުވެރިކޮށް 16 ފަރާތަކުން މައުލޫމާތު ހުށަހަޅައިފި

ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭގޮތުން ކުރިއަށްގެންދާ ތަޙުގީގަށް އެހީތެރިވުމަށް ބޭނުންވާ ފަރާތްތަކަށް މަޢުލޫމާތު ހުށަހެޅުމަށް ގާއިމްކުރި ޕޯޓަލް މެދުވެރިކޮށް މިހާތަނަށް 16 ފަރާތަކުން މައުލޫމާތު ހުށަހަޅާފައިވާކަމަށް ފުލުހުންގެ ޚިދުމަތުން ވިދާޅުވެއްޖެއެވެ.

ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގަށް މައުލޫމާތު އެއްކުރުމަށް ޕޯޓަލްއެއް ގާއިމްކޮށް މަޢުލޫމާތު ހުށަހެޅުމުގެ ފުރުޞަތު ފުލުހުންގެ ޚިދުމަތުން ހުޅުވާލީ މިމަހުގެ 21 ވަނަ ދުވަހުން ފެށިގެންނެވެ.

ފުލުހުން ވިދާޅުވީ އެޚިދުމަތުން މިހާރު ހިންގަމުން ގެންދާ، ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް މައުލޫމާތު އެއްކުރުމަށް ގާއިމްކުރި ޕޯޓަލްއަށް މިހާތަނަށް ޖުމުލަ 16 ފަރާތަކުން މައުލޫމާތު ހުށަހަޅާފައިވާކަމަށާއި، އޭގެ ތެރެއިން 4 ފަރާތަކުން ގުޅުންހުރި ލިޔެކިޔުންތައްވެސް ހިއްސާކޮށްފައިވާކަމަށެވެ.

މި ޕޯޓަލް މެދުވެރިކޮށް މައުލޫމާތު ހިއްސާ ކުރުމުގެ ފުރުޞަތު އަދިވެސް ހުޅުވިފައިވާކަން ފާހަގަކުރައްވައި ފުލުހުން ވިދާޅުވީ މައުލޫމާތު ހުށަހެޅުމަށް evidence.police.gov.mv އަށް ވަޑައިގެން މަޢޫލޫމާތު ހިއްސާކުރެވޭނެކަމަށެވެ. އެގޮތުން މައުލޫމާތާއި ހެކި ހިއްސާކުރާއިރު، އަމިއްލަ މައުލޫމާތު ހާމަނުކޮށްވެސް ހުށަހެޅޭނެއެވެ. ނުވަތަ ތަހުގީގުގައި ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެއްވިދާނެކަމަށް ފުލުހުންގެ ޚިދުމަތުން ވިދާޅުވިއެވެ.

ގެދޮރުވެރިޔާ ސްކީމާއި ބިންވެރިޔާ ސްކީމާ ގުޅޭގޮތުން މި ޕޯޓަލް މެދުވެރިކޮށް މައުލޫމާތު ހުށަހަޅުއްވާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަން ދިވެހި ފުލުހުންގެ ޚިދުމަޔުން ވަނީ ދެއްވާފައެވެ.

ފުލުހުން ވަނީ އެސްކީމްތަކާއި ގުޅޭގޮތުން ކުރިއަށްގެންދާ ތަޙުގީގަށް ބޭނުންވާކަމަށް ބެލެވޭ އެއްވެސް މަޢުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް މަޢުލޫމާތެއް އެނގޭ ފަރާތްތަކުން ޕޯޓަލް މެދުވެރިކޮށް އެމަޢުލޫމާތު ޙިއްސާކޮށްދެއްވުމަށް އެދިވަޑައިގެންފައެވެ.

ގެދޮރުވެރިޔާ އަދި ބިންވެރިޔާ ސްކީމާއި ގުޅިގެން ދިވެހި ފުލުހުންގެ ޚިދުމަތާއި ކަމާއި ގުޅުންހުރި ހުރިހާ އިދާރާއަކުން މިހާރު ގެންދަވަނީ ތަޙުގީގުކުރައްވަމުންނެވެ. ބިންވެރިޔާ ސްކީމްގެ ގޯތި ނުލިބޭ ބަޔަކަށް ގޯތި ލިބުނުކަމުގެ ލިޔުން ދޫކުރި މައްސަލާގައި ހައުސިން ޑިވަލޮޕްމެންޓް ކޯޕަރޭޝަން، އެޗްޑީސީގެ މުވައްޒަފުންތަކެއް ވަޒީފާއިން ވަކިކުރައްވާފައެވެ.

އެޗްޑީސީގެ ކުރީގެ މެނޭޖިންގ ޑިރެކްޓަރު ހިމެނޭހެން އެކުންފުނީގެ ޑިރެކްޓަރުންގެ ބޯޑު އެއްކޮށް ޕީސީބީން ސަސްޕެންޑުކޮށްފައިވަނިކޮށް މިނިވަން ތަހުގީގަކަށް ފުރުޞަތުދެއްވުމަށް ކަމަށް ވިދާޅުވެ، އެޗްޑީސީގެ މެނޭޖިންގ ޑިރެކްޓަރުކަމުގެ މަޤާމުން އިބްރާހީމް ފަޒުލް ރަޝީދު ވަނީ އިސްތިއުފާދެއްވާފައެވެ. އަދި އޭގެ ފަހުން އިބްރާހީމް ފަޒުލް ރަޝީދު ދިރިއުޅެމުންދާ ގެ ބަލާފާސްކޮށް، ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވެއެވެ.

މީގެ އިތުރުން މި މައްސަލާގައި އޭސީސީން ކުރިއަށްގެންދާ ތަހުޤީޤާއި ގުޅިގެން ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ހިމެނޭހެން އެ މިނިސްޓްރީގެ ކުރީގެ 4 އޮފިޝަލެއްގެ ޕާސްޕޯޓު ކޯޓު އަމުރެއްގެ ދަށުން ހިފަހައްޓައި އެމައްސަލައިގަ ދައުވާކުރުމާމެދު ގޮތެއްނިންމުމަށް ޑިއުޓީ ޕްރޮސިކިއުޝަން މަރުހަލާ ފަށާފައިވާކަން އޭސީސީން ވަނީ ހާމަކުރައްވާފައެވެ.