ފުޓްސަލް ކޮމްޕްލެކްސްގެ މަސައްކަތް މި މަހު ފަށާނެ: ވަޒީރު
-
ކޮންޓްރެކްޓަރާއި ބިމާއި ބަޖެޓު ވަނީ ހަމަޖެހިފައި
-
ފުޓްސަލް ކޮމްޕެލްސް އަޅަނީ ފޭސް 2 ގައި
ބައިނަލްއަގްވާމީ މެޗުތައް ބޭއްވޭ ގޮތަށް ސްޓޭޓް އޮފް ދަ އާޓް މަލްޓި ސްޓޯރީ އިންޑޯ ފުޓްސަލް ކޮމްޕްލެކްސް އެއް ބިނާކުރުމުގެ އަމަލީ މަސައްކަތް މި މަހު ފަށާނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
ކުޅިވަރު ވުޒާރާއިން ކުރަމުންދާ މަސައްކަތްތަކުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ރާފިއު ވިދާޅުވީ، ރާއްޖެއިން ފުރަތަމަ ފަހަރަށް ފުޓްސަލްގައި ހޯދި ބައިނަލްއަގްވާމީ ކާމިޔާބީއާއެކު ފުޓްސަލްގެ އިންޑޯ ޕިޗެއް ނެތްކަމުގެ ވާހަކައާއި ސަރުކާރުން އެފަދަ ޕިޗެއް ގާއިމްކުރުމަށް ކުރަމުންދާ މަސައްކަތުގެ ވާހަކަ ވަރަށް ގަދަޔަށް ދެކެވެމުންދާ ކަމަށެވެ.
ވަޒީރު ވިދާޅުވީ، ފުޓްސަލް ކޮމްޕްލެކްސްގެ މަސައްކަތް ފެށުމަށް ބޭނުންވާ އެންމެހާ ކަންކަން މިހާރު ހުރީ ހަމަޖެފައި ކަމަށެވެ. ﷲ ގެ އިރާދަފުޅާއެކު މި މަސް ތެރޭގައި އެތަނުގެ މަސައްކަތް ފެށިގެންދާނެކަމަށް ވަޒީރު ރާފިއު ވިދާޅުވިއެވެ.
"ފޭސް 2 ގައި ހެދޭ ފުޓްސަލް އިންޑޯ ކޮމްޕްލެކްސްގެ މަސައްކަތް އިރާދަކުރެއްވިއްޔާ ވަރަށް އަވަހަށް އަޅުގަނޑުމެންނަށް ފެށިގެންދާނެ. އެކަމަށް ބޭނުންވާ ހުރިހާ ކަމެއް މިހާރު މިވަނީ ނިމިފައި. ބަޖެޓާއި، އެކަން ކުރެވޭނެ ފަރާތްތަކާއި މި ހުރިހާ ކަމެއް މިވަނީ އަޅުގަނޑުމެންނަށް ހަމަޖެހިފައި. ﷲ އިރާދަކުރެއްވިއްޔާ މި މަސް ތެރޭގައި އެ މަސައްކަތް އަޅުގަނޑުމެންނަށް ފެށިގެންދާނެކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު
މި އަހަރުގެ ރިޔާސީ ބަޔާން އިއްވަވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ، މަލްޓި ސްޓޯރީ އިންޑޯ ފުޓްސަލް ކޮމްޕްލެކްސްގެ މަސައްކަތް އެޕްރީލް މަހުގެތެރޭގައި ފައްޓަވާނެ ކަމަށް ވިދާޅުވެފައެވެ.
މި މަސައްކަތް މިހާރު ތާވަލު ކުރެވިފައި މިވަނީ އެއަށްވުރެ ވެސް އަވަހަށެވެ.
ރައީސް ވިދާޅުވީ އިންޑޯ ފުޓްސަލް ކޮމްޕްލެކްސްގެ މަސައްކަތް ފައްޓަވާނީ ފުޓްސަލް ސްޓޭޑިއަމެއް ހިމެނޭހެން އިތުރު ހަތަރު ޓްރެއިނިންގ ޕިޗް ހިމެނޭ ގޮތަށް ކަމަށެވެ. މިއީ ރާއްޖޭގައި ބައިނަލްއަގްވާމީ މުބާރާތްތައް ބޭއްވޭ ފެންވަރުގެ ތަނަކަށް ވެގެންދާނެ ކަމަށް ރައީސް ވިދާޅުވިއެވެ.
ރާއްޖޭގައި އިންޑޯ ފުޓްސަލް ޕިޗެއް ނެތުމުގެ ކަންބޮޑުވުމަކީ ގިނަ އަހަރުތަކެއް ވެފައިވާ ފުޓްސަލް ކޮމިއުނިޓީގެ ޝަކުވާއެކެވެ. ފުޓްސަލް ޕިޗްތަކާއެކު ރާއްޖޭގައި ގާއިމުކުރާ ފުޓްސަލް ކޮމްޕްލެކްސްގެ ސަބަބުން ގައުމީ ފުޓްސަލް ޓީމުގެ ފެންވަރު މަތިކުރުމާއި ބައިނަލްއަގްވާމީ ފެންވަރުގެ މުބާރާތްތައް ރާއްޖެއަށް ގެނައުމަސް މަގުފަހިވެގެންދާނެއެވެ. ޒަމާނީ ފުޓްސަލް ކޮމްޕްލެކްސްގެ ސަބަބުން ރާއްޖޭގައި ބާއްވާ މުބާރާތްތަކުގެ ފެންވަރު މަތިވެ ބައިނަލްއަގްވާމީ މުބަރާތްތަކަސް ޓީމުތައް ތައްޔާރުކުރުމަށްވެސް ފަސޭހަތަކެއް ލިބިގެންދާނެއެވެ.
ސަރަހައްދީ ފުޓްސަލްގައި ރާއްޖެއަކީ އެންމެ ވަރުގަދަ ޓީމެވެ. އެގޮތުން ރާއްޖެއިން ވަނީ ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތަށި އުފުލާލާފައެވެ.