ބާސެލޯނާއިން މި ސީޒަނުގައި ގަތް ސްޕެއިންގެ މިޑްފީލްޑަރު ޑެނީ އޮލްމޯ ރަޖިސްޓަރީ ކުރެވިފައިނުވާ މައްސަލައިގައި ގޯހެއް ނެތް ކަމަށް ބުނެ، އެ މައްސަލަ ބާސެލޯނާއާ ދެކޮޅަށް ސްޕެއިންގެ ކޯޓުން ނިންމައިފިއެވެ.
ޖަރުމަނުގެ ލައިޕްޒިގް އިން 65 މިލިއަން ޑޮލަރަށް މިދިޔަ އޮގަސްޓް މަހު ބާސެލޯނާ އިން އޮލްމޯ ގަނެފައިވާއިރު އޭނާ ރަޖިސްޓްރީ ކުރުމަށް ލަލީގާއިން ވަނީ ފުރަތަމަވެސް ދެކޮޅު ހަދާފަ އެވެ. އެގޮތުން އޭނާ އާއިއެކު އެކްލަބުން ހަދާފައިވާ ހަ އަހަރު ދުވަހުގެ ތެރޭގައި އޭނާއަށް މުސާރަ ދިނުމުގައި އެ ކްލަބުގެ މާލީ ހާލަތު ތަން ނުދޭކަމަށް ބުނެ އޮލްމޯ ރަޖިސްޓްރީ ކޮށްދީފައިވަނީ މި އަހަރުގެ ނިޔަލަށެވެ.
ކޯޓުން މި މައްސަލަ ބާސެލޯނާ އާއި ދެކޮޅަށް ނިންމާފައިވާއިރު މަތީ ކޯޓުގައި ހޯމަ ދުވަހު އެ މައްސަލަ ބާސެލޯނާއިން އިސްތިއުނާފު ކުރާނެކަމަށް މީޑިޔާ ރިޕޯޓްތައް ވަނީ ބުނެފަ އެވެ.
ބާސެލޯނާއަށް ލަލީގާއިން ދީފައިވާ ވަގުތީ ހުއްދައިގެ ދަށުން މި އަހަރުގެ ނިޔަލަށް އޮލްމޯ އަށް އެ ކްލަބަށް ކުޅެވުނު ނަމަވެސް ރަޖިސްޓްރީގެ މައްސަލަ ހައްލު ނުކުރެވޭނަމަ 1 ޖެނުއަރީ 2025 އިން ފެށިގެން އޭނާއަށް ބާސެލޯނާއަށް ނުކުޅެވޭނެ އެވެ.
އަދި މި މައްސަލައަށް ހައްލެއް ހޯދުމަށް ބާސެލޯނާއިން އެ ކްލަބުގެ އާމްދަނީ އިތުރު ކުރުމުގެ ގޮތުން ވީއައިޕީ ބޮކްސް ވިއްކާލުމަށް ނިންމާފައިވާކަމަށްވެސް މީޑިޔާ ރިޕޯޓްތައް ވަނީ ބުނެފަ އެވެ. ބާސެލޯނާއިން ލަފާ ކުރާ ގޮތުގައި އެ ކްލަބުގެ ވީއައިޕީ ބޮކްސް ހަތަރު އަހަރު ދުވަހަށް ވިއްކާލައިގެން އެ ކްލަބަށް އާމްދަނީގެ ގޮތުގައި އިތުރު 100 މިލިއަން ޑޮލަރު ހޯދިދާނެކަމަށް ވަނީ ލަފާ ކޮށްފަ އެވެ.