އިނގިރޭސި ޕްރިމިއަރ ލީގުގައި ރޭ އިޕްސްވިޗް ޓައުންއާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، ތާވަލުގެ ދެވަނަ މަގާމު އާސެނަލުން ހޯދައިފިއެވެ.
އާސެނަލް އިން މި މެޗު ކާމިޔާބު ކުރުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 18 މެޗުން 36 ޕޮއިންޓް ލިބިފަ އެވެ. އެއްވަނައިގައި އޮތް ލިވަޕޫލް އަށް 17 މެޗުން 35 ޕޮއިންޓް ލިބިފައިވާއިރު ތިންވަނައިގައި އޮތް ޗެލްސީ އަށް 18 މެޗުން ލިބިފައިވަނީ 35 ޕޮއިންޓެވެ.
މި މެޗުން ބަލިވި އިޕްސްވިޗް އަށް 18 މެޗުން ލިބިފައިވާ 12 ޕޮއިންޓާއެކު އެ ޓީމު އޮތީ ރެލިގޭޝަން ޒޯނުގައި 19 ވަނައިގަ އެވެ.
ލަންޑަނުގެ އެމިރޭޓްސް ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 23 ވަނަ މިނިޓުގައި އާސެނަލް އަށް ކާމިޔާބު ކޮށްދީފައިވަނީ ކައި ހަވާޓްޒް އެވެ. އަދި މި ލަނޑަށްފަހުވެސް އޭނާއަށް ވަނީ ލީޑު ފުޅާ ކުރަން ރަގަޅު ފުރުސަތެއް ލިބިފަ އެވެ.
އާސެނަލް އިން ގިނައިރު ބޯޅަ ހިފަހައްޓައިގެން ކުޅެފައިވާ މި މެޗުގައި ގެބްރިއަލް ޖިސޫސް އިތުރު ލަނޑެއް ކާމިޔާބު ކުރި ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.