ފެނަކައިގެ ކުރީގެ ވެރީންނަށް ތުހުމަތުކުރެވޭ ކޮރަޕްޝަންގެ ބޮޑެތި މައްސަލަތަކެއް!

ފެނަކަ ކޯޕަރޭޝަންގެ ކުރީގެ ވެރިންގެ މައްޗަށް ތުހުމަތުކުރެވޭ ސީރިއަސް ގިނަ މައްސަލަތަކެއްގައި ދައުވާކުރުމާމެދު ގޮތެއް ނިންމެވުމަށް މަޝްވަރާކުރަމުންދާކަމަށް އެންޓި ކޮރަޕްޝަން ކޮމިޝަން، އޭސީސީން ވިދާޅުވެއްޖެއެވެ.

އޭސީސީން މިހެން ވިދާޅުވެފައި މިވަނީ ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރާއި، އެ ކުންފުނީގެ އިސްވެރިއެއްގެ މައްޗަށް ކްރިމިނަލް ކޯޓުގައި ދައުވާ އުފުލާފައިވާ ދަނޑިވަޅެއްގައެވެ.

އެންޓި-ކޮރަޕްޝަން ކޮމިޝަން އޭސީސީ، ވިދާޅުވީ ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރާއި އިސް ވެރިއެއްގެ މައްޗަށް ދަޢުވާކުރުމަށް ކޯޓަށް ހުށަހަޅާފައިވާއިރު މި މައްސަލައިގެ އިތުރުންވެސް ފެނަކައިގެ ކުރީގެ ވެރިންނަށް ތުހުމަތުކުރެވޭ ސީރިއަސް ގިނަ މައްސަލަތަކެއް ބަލަމުންދާކަމަށެވެ. އަދި އެ މައްސަލަތަކުގައި ދަޢުވާކުރުމާއި މެދު ގޮތެއްނިންމަން ޕޮރޮސެކިއުޓަރ ޖެނެރަލް އޮފީހާއިއެކު މަޝްވަރާ ކުރަމުންދާކަމަށްވެސް އޭސީސީން ވިދާޅުވިއެވެ.

ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރާއި، އެ ކުންފުނީގެ އިސްވެރިއެއްގެ މައްޗަށް ކްރިމިނަލް ކޯޓުގައި ދައުވާ އުފުލާފައިވަނީ ފެނަކައާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ޤާއިމްކޮށްފައިވާ އެއްބަސްވުމެއްގެ މައްސަލާގައެވެ. އޭސީސީން ތަހުޤީޤުކުރި މި މައްސަލާގައި ތުހުމަތު ކުރެވެނީ ބްލޭޒަން އިންކް ޕްރައިވެޓް ލިމިޓެޑާއި ހަވާލުކުރި މަސައްކަތެއް ފުރިހަމަ ކޮށްފައިނުވަނީސް އަދި މަސައްކަތް ނިންމިކަން ކަށަވަރުކުރުމެއް ނެތި، އެ މަސައްކަތަށްވާ ފައިސާ ދޫކޮށް، އެ ކުންފުންޏަށް ނާޖާއިޒު މަންފާ ހޯދައިދީފައިވާ ކަމަށެވެ. މި ޢަމަލުގެ ސަބަބުން 9 ލައްކައަށްވުރެ ގިނަ ރުފިޔާގެ ގެއްލުން ފެނަކަ ކޯޕަރޭޝަނަށް ލިބިފައިވާކަމަށް އޭސީސީން ވިދާޅުވެއެވެ.

މި މައްސަލާގައި ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދު އަދި ކުރީގެ ޕްރޮކިއުމަންޓް ހެޑް މަރްޔަމް ދީނާ ޞާލިޙުގެ މައްޗަށް ވަނީ ޤާނޫނުލްޢުޤޫބާތުގެ 513 ވަނަ މާއްދާގެ (ށ) ގެ ދަށުން، ރަސްމީ ޚައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ އުފުލާފައެވެ.

އޭސީސީން ވިދާޅުވީ މި މައްސަލާގައި ފެނަކައަށް ގެއްލިފައިވާ ފައިސާ ހޯދުމަށް އެންގުމަށްވެސް ނިންމާފައިވެއެވެ.