ނިމިގެންދިޔަ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތަކީ ރަސްމީ ފުޓްބޯޅައިގެ ހަރަކާތްތައް އަލުން ފެށުމަށް ލިބިގެންދިޔަ ހިތްވަރެއް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވިއެވެ. ވަޒީރު މިހެން ވިދާޅުވީ އަންގާރަ ދުވަހުގެރޭ ކުޅުނު ގޯލްޑް ކަޕުގެ ފައިނަލް މެޗަށްފަހު "ޕީއެސްއެމް ސްޕޯޓްސް" އަށް ދެއްވި އިންޓަވިއުއެއްގައެވެ.
ވަޒީރު ވިދާޅުވީ އަތޮޅުތެރޭގެ ރައްޔިތުންގެ މެދުގައި ފުޓްބޯޅައަށް އޮތް ލޯބި މި މުބާރާތުން ހާމަވެގެންދިޔަ ކަމަށެވެ. އަދި ރަސްމީ ފުޓްބޯޅަ މެޗެއް ވަރަށް ގިނަ ދުވަސްތަކަށްފަހު ކުޅެވިގެން ދިޔައިރު، އެ ފޯރި އަލުން ގެނެސް، ދަނޑު ފުރިގެންދިޔުމަކީ ލިބިގެންދިޔަ ވަރަށް ބޮޑު އުއްމީދެއް ކަމަށްވެސް ވިދާޅުވިއެވެ.
"އަޅުގަނޑު އުއްމީދުކުރަނީ މުސްތަގުބަލުގައި މި ކަހަލަ މުބާރާތްތައް އަދި މިއަށްވުރެ މާ ފޯރިގަދަކޮށް އަޅުގަނޑުމެންނަށް ފެނިގެންދާނެ ކަމަށް." ރާފިޢު ވިދާޅުވިއެވެ.
ވަޒީރު ވިދާޅުވީ މިހާރު ރާއްޖޭގައި ރަސްމީ މުބާރާތްތައް ބާއްވަމުން އަންނަ ގަލޮޅު ރަސްމީ ބޯޅަ ދަނޑު މާރާމާތުކުރަން ޖެހޭ ކަމަށް ގަބޫލުކުރައްވާ ކަމަށާއި، ދަނޑުގެ ޖާގައަށް ވުރެ އިތުރަށް މީހުން ދަނޑަށް ވަންނަށް ޑިމާންޑް ކުރުމަކީ ދަނޑު އިތުރަށް މަރާމާތުކޮށް، ތަރައްގީކުރަން ޖެހޭ ސަބަބެއް ކަމަށެވެ. އަދި ރަސްމީ ބޯޅަ ދަނޑާއެކުވެސް ރާއްޖޭގައި ފެންވަރު ރަނގަޅު ބޯޅަ ކުޅޭނެ އިތުރު ދަނޑެއްގެ އޮންނަ ޖެހޭ ކަމަށާއި، އުއްމީދަކީ ހުޅުމާލެ ފޭސް އެކެއްގައި އެފަދަ ދަނޑެއް ގާއިމުވެގެން ދިޔުން ކަމަށްވެސް ވިދާޅުވިއެވެ.
"އައު ދަނޑެއް ހެދެންދެންވެސް ގަލޮޅު ދަނޑު މަރާމާތުކޮށްގެން، ކެޕޭސިޓީ އިތުރުކޮށްގެން އަޅުގަނޑުމެންނަށް މުބާރާތްތައް ކުރިއަށްގެންދެވޭނެ ނިޒާމެއް ގާއިމުކުރެވިގެންދާނެ ކަމަށް އަޅުގަނޑު ގަބޫލުކުރުނީ." ރާފިޢު ވިދާޅުވިއެވެ.
ވަޒީރު ވިދާޅުވީ މުބާރާތުން އެނގި ހާމަވެގެންދިޔައީ އުފާވެރިކަމާއި، އެކުވެރިކަމުގެ މާހައުލަކުން ކުރިން ފުޓްބޯޅައިގެ އޮތް ފޯރި އަލުން އަނބުރާ އައުމުގެ މަންޒަރު ކަމަށެވެ. އަދި ރާއްޖޭގެ ކޮންމެ ހިސާބެއްގައި މިކަހަލަ މުބާރާތެއް ބޭއްވި ނަމަވެސް، މުސްތަގުބަލުގައި ކުޅިވަރު ވުޒާރާގެ ފުރިހަމަ އެއްބާރުލުން ލިބިގެންދާނެ ކަމަށްވެސް ވިދާޅުވިއެވެ.
ރާއްޖޭގެ ފުރަތަމަ ޑިވިޝަނުގެ ކުލަބުތަކުގެ ހަރާކާތްތައް ހުއްޓިފައި އޮންނަތާ އަހަރަކަށް ވުރެ ގިނަ ދުވަސް ވެފަވާއިރު، ސަރުކާރުން އަންނަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ރާއްޖޭގެ ކުލަބުތަކާއެކު މަސައްކަތްކުރަމުންނެވެ. އެގޮތުން ވަޒީރު ވަނީ އިއްޔެ ރާއްޖޭގައި ފުރަތަމަ ޑިވިޝަންގައި ވާދަކުރާ ކުލަބަތަކާ ބައްދަލުކޮށް، ފުޓްބޯޅަ އަލުން ފެށުމަށް ވުޒާރާއިން ފޯރުކޮށްދެވޭނެ އެހީތެރިކަމާއި، މިހާރު ހުރި ދަތިތަކާ ގުޅޭ ގޮތުން މަޝްވަރާކުރައްވާފައެވެ.
ވަޒީރު ކުލަބުތަކާ ބައްދަލުކުރެއްވިއިރު، އެފްއޭއެމްއިން ވަނީ ކުރިއަށް އޮތް ފުޓްބޯޅަ ސީޒަން އަންނަ އަހަރުގެ ފެބްރުވަރީ މަހުގެ 14 ވަަނަ ދުވަހު ފެށުމަށް ތާވަލުކޮށްފައެވެ.