ވީއައިއޭގެ އައު ޓާރމިނަލް ނިންމުމަށް އަބޫދާބީ ފަންޑުން އިތުރު 40 މިލިޔަން ޑޮލަރު

ވެލާނާ އިންޓަރނޭޝަނަލް އެއާޕޯޓު ތަރައްގީކުރުމުގެ މަޝްރޫޢަށް އަބޫދާބީ ފަންޑް ފޯ ޑިވެލޮޕްމަންޓުން އިތުރު 40 މިލިޔަން ޑޮލަރު ނުވަތަ 616 މިލިޔަން ރުފިޔާގެ ލޯނު އެހީއެއް ދީފިއެވެ. މި ފައިސާގެ އެއްބަސްވުމުގައި ސޮއިކުރެއްވީ މާލީ ވަޒީރު މޫސާ ޒަމީރާއި އޭޑީއެފްޑީގެ ޑިރެކްޓަރ ޖެނެރަލް މުޙައްމަދު ސައިފް އައްސުވައިދީއެވެ.

އަބޫދާބީ ފަންޑުން ވެލާނާ އިންޓަރނޭޝަނަލް އެއަރޕޯޓު މަޝްރޫޢު ނިންމުމަށްދިން 40 މިލިއަން އެމެރިކާ ޑޮލަރަކީ 2017 ވަނަ އަހަރު މި މަޝްރޫޢުގެ ފުރަތަމަ މަރުޙަލާތަކަށް ދީފައިވާ 50 މިލިއަން އެމެރިކާ ޑޮލަރުގެ ލޯނަށް އިތުރަށް ދިން ޢަދަދެކެވެ. މި އެއްބަސްވުމުގެ ދަށުން ވެލާނާ އިންޓަރނޭޝަނަލް އެއަރޕޯޓުގެ ހުޅަނގު ފަރާތުގެ ފަސިންޖަރުން ބޭނުންކުރާ ޓާމިނަލް ތަރައްޤީކޮށް، 26 މަތިންދާބޯޓު ބޭއްވޭ ވަރަށް ބޮޑުކުރުމާއި، ބައިނަލްއަޤްވާމީ ފަސިންޖަރުންނަށް އައު އިމާރާތެއް އެޅުން ހިމެނެއެވެ.

މި ރަސްމިއްޔާތުގައި މާލީ ވަޒީރު މޫސާ ޒަމީރު ވަނީ ޔުނައިޓެޑް އަރަބް އެމިރޭޓްސް - ޔޫއޭއީ އަދި އޭޑީއެފްޑީން ދިވެހިރާއްޖޭގައި ދެމެހެއްޓެނިވި ތަރައްޤީ ކުރިއެރުވުމަށް ދެމުންދާ އެހީތެރިކަމަށް ޝުކުރު އަދާކުރައްވާފައެވެ. ވިދާޅުވީ ދިވެހިރާއްޖޭގައި ދެމެހެއްޓެނިވި ތަރައްޤީ ކުރިއެރުވުމަށް ދެފަރާތުން ވެސް އެއްބާރުލުން ދެމުންދާކަމަށެވެ.

"އޭޑީއެފްޑީގެ ފަންޑިންގއަކީ ދުނިޔޭގެ ފެންވަރުގެ ޚިދުމަތްތަކާއި ޓެކްނޮލޮޖީ ހިމެނޭ އިންޓަރނޭޝަނަލް އެއަރޕޯޓެއް ޤާއިމުކުރުމަށް ވަރަށް މުހިންމު އެހީތެރިކަމެއް. މިއީ ދަތުރުފަތުރުގެ ދާއިރާގައި އުމްރާނީ ވަސީލަތްތައް ތަރައްޤީކުރުމާއި، ދަތުރުކުރާ މީހުންނަށް ލިބޭ ތަޖުރިބާ ރަނގަޅުކުރުމާއި، އަދި ޤައުމީ އިޤްތިޞާދުގެ މުހިންމު ތަނބެއް ކަމުގައިވާ ފަތުރުވެރިކަމުގެ އާމްދަނީ އިތުރުކުރުމަށް އަޅުގަނޑުމެންގެ ޤައުމީ ލަނޑުދަނޑިތައް ޙާޞިލުކުރުމުގައި ވަރަށް މުހިންމު މަރުޙަލާއެއް." މާލީ ވަޒީރު މޫސާ ޒަމީރު ވިދާޅުވިއެވެ.

އޭޑީއެފްޑީގެ ޑިރެކްޓަރ ޖެނެރަލް މުޙައްމަދު ސައިފް އައްސުވައިދީ ވިދާޅުވީ، އޭޑީއެފްޑީގެ ޕާޓްނަރ ޤައުމުތަކުގެ އިޤްތިޞާދީ އަދި އިޖްތިމާޢީ ތަރައްޤީ ގެނައުމުގައި ބޮޑެތި ބަދަލުތައް ގެނެސްދޭ އުމްރާނީ މަޝްރޫޢުތަކަށް ފައިސާ ހަމަޖެއްސުމުގައި އޭޑީއެފްޑީން މުޙިއްމު ދައުރެއް އަދާކުރެއެވެ. އަދި ވެލާނާ އިންޓަރނޭޝަނަލް އެއަރޕޯޓު ޒަމާނީކޮށް ތަރައްޤީކުރުމަށް އޭޑީއެފްޑީން ދެވޭ އިތުރު އެހީތެރިކަމުން ދިވެހިރާއްޖޭގައި ކުރިއަރަމުންދާ ފަތުރުވެރިކަމުގެ ޑިމާންޑަށް ފެތޭގޮތަށް ވެލާނާ އެރަޕޯޓްގެ ޚިދުމަތް ދިނުމުގެ ޤާބިލުކަން އިތުރުވެގެންދާނެ ކަމަށްވެސް އައްސުވައިދީ ވިދާޅުވިއެވެ.

މުޙައްމަދު ސައިފް އައްސުވައިދީ ވިދާޅުވީ، އޭޑީއެފްޑީން ދިވެހި ސަރުކާރާއެކު އޮންނަ ގުޅުން ބަދަހިކުރުމަށް މަސައްކަތްކުރަމުންދާ ކަމަށާއި ދިވެހި ރައްޔިތުންގެ އުންމީދުތައް ޙާޞިލުކޮށްދީ، ވަޒީފާގެ ފުރުޞަތުތައް އުފައްދައި، ދެމެހެއްޓެނިވި ތަރައްޤީ ގެނެސްދޭ މުހިންމު މަޝްރޫޢުތަކުގައި އެއްބާރުލުން ދެއްވާނެ ކަމަށެވެ.

އަބޫދާބީ ފަންޑު ފޯރ ޑިވެލޮޕްމަންޓުން 1976 ވަނަ އަހަރުން ފެށިގެން ދިވެހިރާއްޖޭގައި ގިނަ މުހިންމު މަޝްރޫޢުތަކަށް އެހީތެރިކަން ފޯރުކޮށްދީ ފައިނޭންސްކޮށްދީފައިވެއެވެ. މި މަޝްރޫޢުތަކުން ދަތުރުފަތުރާއި، ހަކަތައާއި، ފަތުރުވެރިކަމާއި، ބޯހިޔާވަހިކަމުގެ ފަދަ މުހިންމު ދާއިރާތައް ތަރައްޤީކޮށް، ރައްޔިތުންގެ ދިރިއުޅުމުގެ ފެންވަރު ރަނގަޅުކުރުމުގައި މުހިންމު ދައުރެއް އަދާކޮށްފައިވެއެވެ.

އޭޑީއެފްޑީއަކީ އަބޫދާބީ ސަރުކާރުގެ މިލްކިއްޔާތުގައިވާ އިޤްތިޞާދީ ތަރައްޤީއަށް އެހީތެރިކަން ފޯރުކޮށްދޭ މުހިންމު ޤައުމީ މުއައްސަސާއެކެވެ. 1971 ގައި އުފެދުނު މި މުއައްސަސާގެ މަޤްޞަދަކީ ދެމެހެއްޓެނިވި ތަރައްޤީގެ މަޝްރޫޢުތަކަށް ލުއި ލޯނު ދިނުމާއި، ދިގު މުއްދަތުގެ އިންވެސްޓްމަންޓްތައް ހިންގުމާއި، ކުރިއަރަމުން އަންނަ ޤައުމުތަކަށް އެހީތެރިވުމެވެ.

ވެލާނާ އިންޓަނޭޝަނަލް އެއާޕޯޓުތަރައްގީ ކުރުމުގެ މަޝްރޫއުގެ މަސައްކަތް އަވަހަށް ނިންމާ ހުޅުވުމަށް ސަރުކާރުން ވަނީ އަމާޒު ވަނީ ހިފާފައެވެ.

ވީ.އައި.އޭގައި މިހާރު ބޭނުންކުރާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިޔަން ފަސިންޖަރުންނަށް ޚިދުމަތް ދެވޭވަރުގެ ޓާރމިނަލެކެވެ. އެހެންނަމަވެސް އލަަށް ތަރައްޤީކުރާ 78 ހާސް އަކަ މީޓަރުގެ އައު ޓަރމިނަލަކީ އަހަރަކު 7 މިލިޔަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ.

އައު ފަސިންޖަރ ޓާރމިނަލް ތަރައްޤީ ކުރެވޭނީ އެންމެފަހުގެ ޒަމާނީ ވަސީލަތްތަކާއެކުއެވެ. އެގޮތުން އެއިރޯ ބޯޑިން ބްރިޖްތަކާއި، އެންމެ ފަހުގެ ޒަމާނީ ބެގޭޖް ހޭންޑްލިން ސިސްޓަމްތައް ޓަރމިނަލްގައި ހުންނާނެއެވެ. އައު ޓަރމިނަލް އިމާރާތުގެ ސަބަބުން މިހާރު ހުރި ޓަރމިނަލަށް ދިމާވެފައިވާ ޖާގައިގެ ދަތިކަން ފިލުވައިދީ، އެފް އެންޑް ބީގެ ގިނަ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތަކާއި އެހެނިހެން ޚިދުމަތްތައް އެތަނުގައި ގާއިމަށްވަނީ ނިންމާފައެވެ.