މި ނިމުނު 2024 ވަނަ އަހަރަކީ އޭގެ ކުރީ އަހަރުތަކަށްވުރެ ގިނަ ޤައުމުތަކުގެ އިޤްތޮޞާދުތައް ހަމައަކަށް އެޅެން ފެށި އަހަރެވެ. ނަމަވެސް ޢާންމުން މި ކަން އެ ގޮތަށް ބަލައިގަންނާކަށް ބޭނުމެއް ނުވިއެވެ. އިންތިޚާބުތަކުން ފުރިފައި އޮތް އަހަރު ނިމުނުއިރު، ރައްޔިތުން ވަނީ އެ މީހުންގެ އުދާސްތައް ވަރަށް ރަނގަޅަށް ދައްކައިފައެވެ.
ފާއިތުވި އަހަރުތަކުގައި އިޤްތިޞާދުތަކަށް އަންނަން ފެށި ލޮޅުމާއެކު ކާބޯތަކެތިން ފެށިގެން ހަކަތައާ ހަމައަށް އުފުލެމުން ދިޔަ އަގުތަކާއެކު، ރުޅިގަދަވެފައި ތިބި ރައްޔިތުން ވަނީ ލިބުނު ކޮންމެ ފުރުޞަތެއްގައި އެ ޤައުމެއްގެ ވެރިކަމުގައި އޭރު ތިބި މީހުންނަށް އެ ނުރުހުން ފާޅު ކޮށްފައެވެ. ތަކެތީގެ އަގު މަތިވުމުގެ ސަބަބުން ދިމާވަމުންދިޔަ ގޮންޖެހުންތަކަށް ބޭނުންވާ ފަދަ ބަދަލެއް ނުލިބުމުން، އިންތިޚާބަކަށް ފަހު އިންތިޚާބެއްގައި ވެރިކަން ކުރާ ޕާޓީތަކަށް ޖެހުނީ ނާކާމިޔާބީއާ ކުރިމަތިލާށެވެ.
ދުނިޔޭގެ އެންމެ ބޮޑު އިޤްތިޞާދުގެ ގޮތުގައި އޮތް އެމެރިކާގެ ޙާލަތު ވެސް އޮތީ ހަމަ މިހެންނެވެ. ދިރުއުޅުމުގެ ޚަރަދުތައް އުފުލި ޢާންމުންނަށް ކުރިމަތިވަމުންދިޔަ ގޮންޖެހުންތަކާއެކު އެ ޤައުމުގެ ގިނަ ރައްޔިތުން ވަނީ ވެރިކަންކުރާ ޑިމޮކްރެޓުންނަށް ނޫނެކޭ ބުނެފައެވެ. އެމެރިކާގެ ވެރިކަން ކުރެއްވި ރިޕަބްލިކަން ޕާޓީގެ ޑޮނަލްޑް ޓްރަމްޕަށް މީގެ ކުރިން ދެ ވަނަ ދައުރެއް ދޭން ނޫނެކޭ ބުނި އެމެރިކާއިން ވަނީ ޓަރަމްޕަށް ދެވަނަ ދައުރެއް ދީފައެވެ.
ތަކެތީގެ އަގާއި އުފުލެމުންދިޔަ ދިރިއުޅުމުގެ ޚަރަދުތަކާއެކު ވެރިކަންކުރާ ޕާޓީތަކަށް އަމާޒުވެގެންދިޔަ ނުރުހުމާއެކު އިނގިރޭސިވިލާތާއި ބޮޓްސްވާނާ، ޕޯޗުގަލް އަދި ޕެނަމާގައި ވެސް ވަނީ އައު ސަރުކާރުތަކެއް އުފެދިގެން ގޮސްފައެވެ. ދެކުނު ކޮރިޔާގެ ރައްޔިތުން ވަނީ އެ ޤައުމުގެ ގާނޫނުހަދާ މަޖިލީހުގެ ބާރު އިދިކޮޅު ޕާޓީތަކަށް ދީ، ސަރުކާރާމެދު ނުރުހޭވަރު ދައްކައިދީފައެވެ. އިންތިޚާބުތަކުގައި ފަރަންސޭސިވިލާތާއި ޖަރުމަންވިލާތާއި ޖަޕާނާއި އިންޑިޔާގެ ވެރިކަންތައް ވެސް ވަނީ ގުޑުވާލާފައެވެ.
އިންތިޚާބުތަކާއެކު ދުނިޔޭގެ އެކި ކަންކޮޅުތަކުން ވެރިކަންތައް ބަދަލުވަމުންދިޔައިރު، ބަދަލު ނުވި އެއް ސަރުކާރަކީ ރަޝިޔާގެ ރައީސް ވުލެޑިމިއަރ ޕުޓިންގެ ސަރުކާރެވެ. ޕުޓިން ވަނީ ރައްޔިތުންގެ %88 ވޯޓާއެކު އަނެއްކާވެސް އިތުރު ދައުރަކަށް އިންތިހާބުވެ ވަޑައިގަންނަވާފައެވެ. އަދި އެ ޤައުމުން ވަނީ ޔޫކްރެއިނާ ދެކޮޅަށް ކުރަމުންދާ ހަނގުރާމާގައި ވެސް ފާހަގަކޮށްލެވޭ ކާމިޔާބީތަކެއް ހޯދާފައެވެ. މިހާރު އުފެދޭ ސުވާލަކީ އެމެރިކާގެ ވެރިކަމަށް އެނބުރި ވަޑައިގެން ކުރިން ވިދާޅުވެފައިވާ ގޮތަށް އެއް ދުވަސް ތެރޭގައި އެ ހަނގުރާމަ ޓްރަމްޕް ހުއްޓުވާނެތޯއެވެ. އަދި މިއީ ރަޝިއާއިން ބޭނުންވާ ފަދަ ނިންމުމަކަށް ވެދާނެކަމުގެ ބިރު ޔޫކްރެއިނާ ހުޅަނގުގެ ޤައުމުތަކުން ދަނީ ފާޅުކުރަމުންނެވެ.
މެދުއިރުމަތީގައި ޔަހޫދީން ވަނީ 2024 ވަނަ އަހަރު ވެސް ހުއްޓުމެއްނެތި ޤަތުލްޢާންމުތައް ކުރިއަށް ގެންގޮސްފައެވެ. ފަލަސްޠީނުގެ ޣައްޒާއަށް ދެމުންދާ ޙަމަލާތަކަށް ހުއްޓުމެއް އައިސްފައެއް ނުވެއެވެ. ފަލަސްޠީނުގެ ހުޅަނގު އައްސޭރީގައި ޔަހޫދީން ހިންގަމުންދާ ލާއިންސާނީ ޢަމަލުތައް ވެސް ހުއްޓުމަކަށް އައިސްފައެއް ނުވެއެވެ. މުޅި ސަރަހައްދަށް ޔަހޫދީންގެ އަނިޔާވެރިކަން ފުޅާކުރުމަށް ކުރަމުންދާ މަސައްކަތް ބޭނުންވާ ގޮތަށް ކާމިޔާބުވަމުން ނުދިޔަ ނަމަވެސް ލުބުނާނުގެ ހިޒްބުﷲއާއި ދެކޮޅަށް ދެމުންދާ ޙަމަލާތައް ފުޅާކޮށް، އެ ޤައުމުގެ ޢާންމުންނަށް ގެއްލުންވާނެގޮތަށް އެ ޤައުމަށް ވެސް ޔަހޫދީން ވަނީ ހަމަލާދީފައެވެ. އަދި ދިގުދެމިގެން ދިޔަ ދާޚިލީ ހަނގުރާމައަކަށް ފަހު ސޫރިޔާގެ ހަނގުރާމަވެރި ޖަމާޢަތްތަކުން އެ ޤައުމުގެ ރައީސް ބަޝާރް އަލް-އަސަދުގެ ވެރިކަން ވައްޓައިލައި އައު ވެރިކަމެއް ޤާއިމުކުރުމަށް މަސައްކަތްފެށި ވަގުތު ބަލައި، އެ ޤައުމުގެ ސަރަހައްދުތަކަށް ވެސް ޔަހޫދީން ވަނީ ވެރިވެގަންނަން ފަށާފައެވެ.
2024 ވަނަ އަހަރު ނިމިގެން ދިޔައީ ސިޔާސީ ގޮތުންނާއި އިޤްތިޞާދީ ގޮތުން ވެސް ހަލަބަލި ކޮށެވެ. ގިނަ ހަނގުރާމަތަކަކާއެކު އަހަރު ނިމުނުއިރު، ތިން ވަނަ ބޮޑު ހަނގުރާމައެއް ނުވަތަ ނިއުކްލިއަރ ހަނގުރާމައެއް ފެށިދާނެ ކަމުގެ ބިރުވެސް އޮތީ މާ ދުރަކު ނޫނެވެ.