ސޫދާންގެ ރެޕިޑް ސަޕޯޓް ފޯސަސް (އާރުއެސްއެފް) އިންދާފޫރުގައި ހުރި އެމީހުންގެ ހަތިޔާރު މަރުކަޒުގެ ކޮންޓްރޯލް އަނބުރާ ނަގައިފި ކަމަށް އެގްރޫޕުން ބުނެފިއެވެ. ސޫދާންގެ ސިފައިނާއި އާރުއެސްއެފް އާ ދެމެދު ހިނގި ކުރިމަތުލުންތަކެއްގައި އެ މަރުކަޒުގެ ކޮންޓްރޯލް ނަގާފައިވާނެ ކަމަށް ސިފައިން ބުނެފައި ވަނީ ހޮނިހިރު ދުވަހުއެވެ. ނަމަވެސް އޭގެ އެއް ދުވަސް ފަހުން އާރުއެސްއެފުން މިވަނީ އެތަން އަނބުރާ އެމީހުންގެ ބާރުގެ ދަށަށް ގެނަސްފައިވާ ކަމަށް ބުނެފައެވެ.
ސޫދާންގެ އަސްކަރިއްޔާއިން ވަނީ ދާފޫރުގައި ހުރި އާރުއެސްއެފްގެ މަރުކަޒު ހޮނިހިރު ދުވަހު އެމީިހިން ހިފާފައިވާކަމަށް ބުނެ ބަޔާނެއް ނެރެފައެވެ. މި މަރުކަޒަކީ ފާއިތުވި 20 މަސްދުވަހު، އާރްއެސްއެފުން ޗަޑް އަދި ލީބިޔާ ބޯޑަރު ހުރަސްކޮށް ގެންނަމުން ދިޔަ ހަތިޔާރު ރައްކާކޮށް، އެމުއާމަލާތްތައް ކުރުމަށް ބޭނުންކުރި މަރުކަޒެވެ. އެ މަރުކަޒު ހޯދުމަށް ކުރެވުނު މަސައްކަތުގައި އާރްއެސްއެފްގެ ގިނަ ބަޔަކު މަރުވެ އެ ޖަމައާތަށް ބޮޑެތި ގެއްލުންތަކެއް ލިބިފައިވާކަމަށް ވެސް ސޫދާންގެ އަސްކަރިއްޔާގެ ބަޔާނުގައި ވަނީ ބުނެފައެވެ.
ނަމަވެސް، އާރްއެސްއެފުން ވަނީ އަލުން އަނބުރާ އެތަނުގެ ކޮންޓްރޯލް އެމީހުން ނަގާފައިވާކަމަށް ބުނެފައެވެ. އަދި އެސަރަހައްދުގައި ހިންގަމުންދާ ހަމަލާ ބަދަލުކުރުމުގެ ތެރޭގައި ސޫދާންގެ އަސްކަރިއްޔާގެ ސިފައިން އާންމުންނަށް ވެސް ހަމަލާ ދެމުންދާ ކަމަށް އެޖަމާއަތުން ވަނީ ބުނެފައެވެ.
ސޫދާންގެ ސިފައިނާ އާރުއެސްއެފް އާ ދެމެދު ކުރިމަތިލުންތައް ފެށުނީ 2023 ވަނަ އަހަރުގެ އޭޕްރީލް މަހުއެވެ. އަދި ދާފޫރަކީ މި ހަމަލާ ބަދަލުކުރުންތައް އެންމެ ގަދައަށް ހިންގަމުންދާ އެއް ސަރަހައްދެވެ.