އެޗްޑީސީގެ ހިންގުމަށް، އެކުންފުނީގެ ތަޖުރިބާހުރި ވަރުގަދަ މާލިމީއެއް

ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރުގެ މަޤާމަށް ޢައްޔަންކުރެއްވި މުޙައްމަދު މަޢުރޫފް ޖަމީލަކީ، ރާއްޖޭގެ ތަރައްޤީގައި މުހިންމު މަސައްކަތްތަކެއް ކުރައްވާފައިވާ ޚިދުމަތްތެރި ބޭފުޅެކެވެ. މަޢުރޫފް ވަނީ އެޗްޑީސީއާއި ކުރީގެ ހުޅުމާލޭ ޑިވެލޮޕްމަންޓް ކޯޕަރޭޝަންގެ ބޯޑުގައި ހުންނަވައި ހުޅުމާލޭގެ ތަރައްޤީއަށް ގިނަގުނަ މަސައްކަތްތަކެއް ކުރައްވާފައެވެ.

މުޙައްމަދު މަޢުރޫފް ޖަމީލުވަނީ ދައުލަތުގެ އިސް މަޤާމުތަކެއް އަދާކުރައްވައި، 19 އަހަރަށްވުރެ ގިނަ ދުވަހު ދައުލަތަށް ޚިދުމަތްކުރައްވާފައެވެ. އެގޮތުން ކުރީގެ ރައީސް މައުމޫން ޢަބްދުލްޤައްޔޫމްގެ ސަރުކާރުގައި ކޮންސްޓްރަކްޝަން މިނިސްޓަރުކަމުގެ އިތުރުން، ރާއްޖޭގެ ޢުމްރާނީ ތަރައްޤީގެ ދާއިރާއާއި ގެދޮރުވެރިކަން ކުރިއެރުވުމަށް ސަރުކާރުން ކުރެއްވި މަސައްކަތްތަކުގައި އިސްކޮށް ބައިވެރިވެވަޑައިގެންފައިވެއެވެ.

އާދައިގެ ޑިޒައިނާއެއްގެ ވަޒީފާއިން ޚިދުމަތަށް ނުކުންނަވައި، އެންމެ ފުރަތަމަ ކުރެއްވި ބައެއް މަސައްކަތްތަކުގެ ތެރޭގައި ހުޅުމާލޭ ޑިވެލޮޕްމަންޓް ކޯޕަރޭޝަނާއި، ހައުސިންގ ޑިވެލޮޕަމަންޓް ފައިނޭންސް ކޯޕަރޭޝަން އުފެއްދެވުމުގައި އިސްދައުރެއް އަދާކުރެއްވިއެވެ. މަޢުރޫފް ވަނީ ރާއްޖޭގެ އާކިޓެކްޗަރ އެސޯސިއޭޝަންގެ ރައީސްގެ މަޤާމުވެސް ފުރުއްވާފައެވެ. މިވޭތުވެދިޔަ އަހަރުތަކުގައި ޑިޒައިންކުރުމާއި، މެނޭޖްކުރެއްވުމުގައި 100 އަށްވުރެ ގިނަ މަޝްރޫޢުތަކުގައި ޢަމަލީގޮތުންވެސް މަޢުރޫފް ވަނީ މަސައްކަތްކުރައްވާފައެވެ.

މަޢުރޫފް ޖަމީލުގެ ޤައުމީ ޚިދުމަތްތަކުން ފެންނަ އެންމެ މުހިންމު އެއް ޚިދުމަތަކީ ހުޅުމާލޭ ފުރަތަމަ ފިޔަވަހީގެ ތަރައްޤީއެވެ. އެގޮތުން ހުޅުމާލޭގައި ފުރަތަމަ މީހުން އާބާދުކުރުމަށްޓަކައި ޢަމަލީގޮތުން ގިނަގުނަ މަސައްކަތްތަކެއް މަޢުރޫފްވަނީ ކުރައްވާފައެވެ. އޭގެތެރޭގައި ހުޅުމާލޭ ފުރަތަމަ ފިޔަވަހީގައި ބިނާކުރި ފުރަތަމަ މިސްކިތް ތަރައްޤީކުރެއްވުމާއި، ސްކޫލްތަކާއި ހުޅުމާލޭ ހޮސްޕިޓަލު ތަރައްޤީކުރުމުގެ މަސައްކަތް ފާހަގަކޮށްލެވެއެވެ.

އާކިޓެކްޗަރ ދާއިރާއިން މަތީ ތަޢުލީމު ޙާސިލުކުރައްވާ، މިނިވަން ރިސަރޗަރއެއްގެގޮތުގައި މިހާރުވެސް އެކި ގޮތްގޮތުން މަޢުރޫފް ގެންދަވަނީ ޤައުމަށް ޚިދުމަތް ކުރައްވަމުންނެވެ. ރާއްޖޭގެ ތަރިކަ ޙިމާޔަތްކުރުމުގައި ކުރަންޖެހޭ ދިރާސާތަކުގައި މުހިންމު ގިނަ މަސައްކަތްތަކެއް ކުރައްވަމުންގެންދަވާ މަޢުރޫފްވަނީ އާކިޓެކްޗަރގެ ދާއިރާއިން ޤައުމީ ޔުނިވަރސިޓީގައި ލެކްޗަރާއެއްގެ ގޮތުގައިވެސްވަނީ މަސައްކަތް ކުރައްވާފައެވެ.

މަޢުރޫފްވަނީ އާކިޓެކްޗަރ ދާއިރާއިން އެތައް ދިރާސާތަކެއް ކުރައްވާ އެދިރާސާތައް އެހެން މީހުންނަށް ފައިދާކުރަނިވި އެއްޗެއްގެ ގޮތުގައި ޝާޢިއުކުރައްވާފައެވެ. ބައިނަލްއަޤުވާމީ އެތައް އެވޯޑެއް ލިބިވަޑައިގަންނަވާފައިވާ މަޢުރޫފް ވަނީ ބޭރުގެ އެތައް ޖަމްޢިއްޔާއެއްގެ މެމްބަރުކަންވެސް ކުރައްވާފައެވެ.

މަޢުރޫފް ޖަމީލް ވަނީ އިނގިރޭސިވިލާތުގެ، މެންޗެސްޓަރ މެޓްރޯޕޮލިޓަން ޔުނިވަރސިޓީގައި ބީއޭ އޮނާސް އިން އަކިޓެކްޗަރ އަދި ޔުނިވަރސިޓީ އޮފް ޝެފިލްޑްގައި، އާކިޓެކްޗަރ ދާއިރާއިން ޕޯސްޓް ގްރެޖުއޭޓް ޑިޕްލޮމާ އަދި މެލޭޝިއާގެ ޔުނިވަރސިޓީ އޮފް މަލަޔާއިން އާކިޓެކްޗަރގެ ދާއިރާއިން މާސްޓަރސް ހާސިލުކުރައްވާފައެވެ.

މިކަމުގައި ރައީސް @MMuizzu މި ނިންމެވި ނިންމުމަށް މަރުހަބާ ކިޔަން، އަދި މައުރޫފަށް ކާމިޔާބަށް އެދެން. @hdcmaldives https://t.co/YrdoQ19lDL

— Ahmed Shamheed (@Ashamhyd) December 22, 2024

އެޗްޑީސީގެ މެނޭޖިންގ ޑިރެކްޓަރުގެ މަޤާމަށް މަޢުރޫފް ޖަމީލް އައްޔަންކުރެއްވުމާއި ގުޅިގެން ގިނަ ބަޔަކު އަންނަނީ، މުހިންމު ނިންމެވުމެއްގެ ގޮތުގައި ސިފަކުރައްވަމުންނެވެ. ކުރީގެ ބައެއް ރައީސުންނާއި، ސަރުކާރުގެ އިސް ބައެއް ބޭފުޅުންގެ އިތުރުން، އިދިކޮޅު ބައެއް ފަރާތްތަކުންވެސް އަންނަނީ މައުރޫފް ޖަމީލަކީ އެޗްޑީސީގެ މެނޭޖިންގ ޑިރެކްޓަރުގެ މަޤާމަށް އެންމެ އެކަށޭނެ ބޭފުޅާގެ ގޮތުގައި ފާހަގަކުރައްވަމުންނެވެ.

މިގޮތުން ކުރީގެ ރައީސް މައުމޫން ޢަބްދުލް ޤައްޔޫމް ވިދާޅުވީ މަޢުރޫފަކީ ނަޒާޙަަތްތެރި ބޭފުޅެއްކަމަށް ޔަގީންކުރައްވާކަމަށެވެ.

Delighted by the appointment of a person of such integrity, ability and experience as Mauroof Jameel as head of HDC. Congratulations and good luck! pic.twitter.com/PbhJJvOosz

— Maumoon Abdul Gayoom (@maumoonagayoom) December 22, 2024

ކޮންމެ އަކަސް މައުރޫފްގެ މަސައްކަތްތަކުން ފެންނަން އޮތީ ޤައުމަށް ކޮށްދެއްވި މުހިންމު ޚިދުމަތްތަކެވެ. ޤައުމު ބިނާކުރުމުގައި މަޢުރޫފްގެ ޚިދުމަތްތަކާއި އަގުނުކުރެވޭނެ ގިނަގުނަ މަސައްކަތްތައް ހުޅުމާލެއާއި ރާއްޖޭގެ އެކި ސަރަހައްދުތަކުން ފެންނަން އެބަހުއްޓެވެ.