ވިލުންތެރި 20: ސުނާމީ ކާރިސާގެ ހަނދާންތައް ފޮޓޯތަކުން ދައްކާލަނީ
-
މައުރަޒު ކުރިއަށްދާނީ ޑިސެންބަރު މަހުގެ 26 އިން 29 އަށް
-
މައުރަޒުގެ މަޤްސަދަކީ ކާރިސާތަކަށް ވިލުންތެރި ރާއްޖެއެއް ބައްޓަންކުރަން ކުރެވޭ މަސައްކަތްތައް ދައްކުވާދިނުން
ސުނާމީ ކާރިސާއަށްފަހު ޤައުމު އަލުން ބިނާކުރުމަށް އެންމެން ގުޅިގެންކޮށްފައިވާ މަސައްކަތްތައް ދައްކުވާދޭ ފޮޓޯ މައުރަޒެއް ބޭއްވުމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެން.ޑީ.އެމް.އޭ ނިންމައިފިއެވެ.
"ވިލުންތެރި 20"ގެ ނަމުގައި ބާއްވާ މި މައުރަޒު ބޭއްވުމަށް ހަމަޖެހިފައިވަނީ މި މަހުގެ 26 އިން 29 އަށް ނޭޝަނަލް އާޓް ގެލެރީގައެވެ. މިއީ ސުނާމީ ކާރިސާއަށް 20 އަހަރު ފުރުމާއި ގުޅުވައިގެން ބާއްވާ މަޢުރަޒެކެވެ.
ޕީއެސްއެމްނިއުސްއަށް މައުލޫމާތުދެއްވަމުން އެން.ޑީ.އެމް.އޭގެ ޑިވެލޮޕްމެންޓް އެންޑް ރެސިލިއެންސް މެނޭޖަރ އައިޝަތު އިލްމާ ވިދާޅުވީ
މި މައުރަޒު ހުޅުވުމުގެގޮތުން ހާއްސަ ހަރަކާތްތަކެއް ކުރިއަށްގެންދިމަށް ހަމަޖެހިފައިވާކަމަށެވެ. އެގޮތުން ލައިވް އާޓް އިތުރުން "ޕްރިޕެއަރ ފޯ ޓުމޯރޯ" ގެ ނަމުގައި ހާއްސަ ސެގްމެންޓެއްވެސް ކުރިއަށްދާނެކަމަށް އެންޑީއެމްއޭއިން މައުލޫމާތުދެއެވެ.
އެންޑީއެމްއޭއިން ވިދާޅުވީ މިފަދަ މައުރަޒެއް ބޭއްވުމުގެ މައިގަނޑު މަޤްސަދަކީ 2004 ވަނަ އަހަރު ކުރިމަތިވި ސުނާމީ ކާރިސާއަށްފަހު ރާއްޖެ އަލުން އާރާސްތުކޮށް ކާރިސާތަކަށް ވިލުންތެރި ޤައުމަކަށް ރާއްޖެ ހެދުމަށްޓަކައި އެންމެން ގުޅިިގެންކޮށްފައިވާ އަދި ކުރަމުންދާ މަސައްކަތްތައް ދައްކާލުންކަމަށެވެ.
މި މައުރަޒު އާއްމުންނަށް ހުޅުވުމަށް ހަމަޖެހިފައިވަނީ ބުރާސްފަތިދުވަހުގެ ހަވީރުން ފެށިގެން ކަމަށް އެންޑީއެމްއޭއިން ވިދާޅުވެއެވެ.
ސުނާމީ ކާރިސާގައި ދިވެހިން ދައްކުވައިދިން އެއްބައިވަންތަކަމުގެ ރީތި ނަމޫނާ ފާހަގަކޮށް، އެހަނދާން އާކުރުމުގެ ގޮތުން 2005 ވަނަ އަހަރުން ފެށިގެން ކޮންމެ އަހަރެއްގެވެސް ޑިސެންބަރުމަހުގެ 26 ވަނަ ދުވަސް ފާހަގަކުރަމުން އަންނަނީ ދިވެހިންގެ އެއްބައިވަންތަކަމުގެ ދުވަހުގެގޮތުގައެވެ.
26 ޑިސެންބަރ 2004 ވަނަ ދުވަހު ދިވެހިންގެ ފަރާތުން ފެނިގެންދިޔައީ އެކުވެރިކަމާއި، އެއްބައިވަންތަކުގެ އާދަޔާޚިލާފު ނަމޫނާއެވެ. ބަޔަކު އެހީދޭނެ އިރެއްގެ އިންތިޒާރުގައި ތިބުމުގެ ބަދަލުގައި، އެކަކުއަނެކަކަށް ވަގުތުންވަގުތަށް ދެވެންއޮތް އެހީއެއް ދޭންފެށިއެވެ. ބޮޑެތި ގެއްލުންތައްވި ރަށްރަށަށް މަސްދޯނިތަކާއި، ބޯޓްތަކުގައި އެހީގެތަކެތި ހިފައިގެން ދަތުރުކުރިއެވެ. ސުންނާފަތިވެފައިވާ ގޭގެއާއި، އެހީބޭނުންވާ މީހުންނަށް އެހީތެރިވާންފެށީ މަޖުބޫރުކަމެއްނެތި ހިތުންރުހުމުންނެވެ.