އައްޑޫ ގާމެންޓު ފެކްޓްރީގެ މަސައްކަތް ނުހުއްޓޭ، އައު ބިމެއް ހަމަޖައްސަން ވާނީ އެދިފައި: ބީސީސީ

އައްޑޫސިޓީގައި ޢިމާރާތްކުރުމަށް ނިންމާފައި ގާމެންޓް ފެކްޓަރީ ނުވަތަ އަންނައުނު އުފައްދާ ފެކްޓްރީގެ މަސައްކަތް ހުއްޓާނުލާކަމަށާއި، އެ މަސައްކަތް ކުރިއަށްދާނެކަމަށް ބިޒްނަސް ސެންޓަރ ކޯޕަރޭޝަން، ބީސީސީން ވިދާޅުވެއްޖެއެވެ. އެކުންފުނިން މިހެން ވިދާޅުވެފައިމިވަނީ، އެ ފެކްޓްރީގެ މަސައްކަތް ހުއްޓާލާފައިވަކަމަށް ބުނެ ސޯޝަލް މީޑިއާގައި ދައުރުވާ ވާހަކަތަކާއި ގުޅިގެންނެވެ.

ބިޒްނަސް ސެންޓަރ ކޯޕަރޭޝަންގެ ފަރާތުން އައްޑޫ ސިޓީގައި ތަރައްޤީކުރާ ޤާމެންޓް ފެކްޓަރީއަކީ، އަންނައުނު އުފެއްދުމުގެ ވިޔަފާރި ކުރާ ފަރާތްތަކަށް ލިބޭނެ ފަހި ފުރުޞަތެއްކަމަށް، ބިޒްނަސް ސެންޓަރ ކޯޕަރޭޝަނުން ވިދާޅުވެއެވެ. އެ ފެކްޓްރީ ބޭނުންކޮށްގެން ފެހުމުގެ ވިޔަފާރިކުރާ ފަރާތްތަކުން އުފައްދާ އުފެއްދުންތައް ފަސޭހައިން މާކެޓްކޮށް، ބާޒާރަށް އެތަކެތި ނެރުމަށް މަގުފަހިކޮށްދޭނެކަމަށް ބީސީސީން ވަނީ ވިދާޅުވެފައެވެ.

މިމަސައްކަތް ހުއްޓާލަން ނިންމާފައިވާ ކަމަށް މީސްމީޑިއާގައި ދެކެވޭ ވާހަކަތަކާއި ގުޅިގެން ބިޒްނަސް ސެންޓަރ ކޯޕަރޭޝަން، ބީސީސީގެ މެނޭޖިންގ ޑިރެކްޓަރ އިބްރާހީމް ޒިޔާޢު ވިދާޅުވީ އެމަސައްކަތް ކުރިއަށް ގެންދަން ބީސީސީން ތައްޔާރުވެފައިވާކަމަށެވެ. އެހެންނަމަވެސް މިހާރު ލިބިފައިވާ ބިން އެހެން ސަރަހައްދަކަށް ބަދަލުކޮށްދިނުމަށް ސިޓީ ކައުންސިލްގައި އެދިވަޑައިގެންފައިވާކަމަށް ޒިޔާޢު ވިދާޅުވިއެވެ.

ބީސީސީގެ މެނޭޖިންގ ޑިރެކްޓަރ ވިދާޅުވީ، މިހާރު މި މަޝްރޫޢުއަށް ކަނޑައަޅާފައިވާ ސަރަހައްދަކީ އެހެން މަޝްރޫޢުތަކަށް ބޭނުން ކުރާ ސަރަހައްދެއްކަމުން ބިމުގެ އެއްބައި ދޫކޮށްލަން ޖެހިދާނެ ކަމަށް ބެލެވޭތީ ގާމެންޓުގެ މަސައްކަތް ކުރިއަށް ގެންދިއުމަށް އެކަށީގެންވާ ބިމެއް އަލުން ހަމަޖައްސައި ދިނުމަށް މިހާރު ކައުންސިލުގައި އެދިފައިވާކަމަށް ޒިޔާއު ވިދާޅުވިއެވެ. އަދި މިމަސައްކަތް ތައާވަލާއި އެއްގޮތަށް ކުރިއަށްދާނެކަން ފާހަގަކުރައްވާ ޒިޔާއު ވިދާޅުވީ، ބިން ހަމަޖެހުނުހާ އަވަހަށް މަސައްކަތް ފެށުމަށް އެކުންފުނިން ތައްޔާރުވެފައިވާ ކަމަށެވެ. އަދި އަމާޒަކީ ވީހާވެސް އަވަހަށް މަސައްކަތް ނިންމުންކަމަށްވެސް ބީސީސީގެ މެނޭޖިންގ ޑިރެކްޓަރ ވިދާޅުވިއެވެ.

ގާމެންޓް ފެކްޓްރީ ތަރައްޤީކުރުމަށް ބޭނުންވާ ބިން ކުއްޔަށް ދޫކުރުމުގެ އެއްބަސްވުމުގައި އައްޑޫ ސިޓީ ކައުންސިލާއި ބީސީސީއާ ދެމެދު ސޮއިކޮށްފައިވަނީ ޖޫން މަހުގެ 9 ވަނަ ދުވަހުއެވެ. އެކަމަށްޓަކައި އައްޑޫ ސިޓީ ކައުންސިލުން ބީސީސީއަށް ކުއްޔަށް ދީފައިވަނީ 30،000 އަކަފޫޓުގެ ބިމެކެވެ.

ފޭރާމުގެ ބާވަތްތައް ރާއްޖެ އެތެރެކުރުން މަދުކޮށް، އެތަކެތި ރާއްޖޭގައި އުފައްދައި، އަދި ވަޒީފާގެ އިތުރު ފުރުޞަތުތައް ފަހިކުރުމަކީ ބީސީސީގެ އަމާޒެކެވެ.

އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ އިސްނެންގެވުމާއެކު ބީސީސީން ތަރައްޤީކުރާ މި ފެކްޓްރީ ވެގެންދާނީ، ސަރުކާރުގެ ސިނާޢީ ތަރައްޤީގެ ހެޔޮ ބަދަލު އައްޑޫ ސިޓީއާއި މުޅި ރާއްޖެއިންވެސް ފެނިގެންދާނެ މަޝްރޫޢުއަކަށްކަމަށް ބީސީސީއިން ވަނީ ވިދާޅުވެފައެވެ. އަދި މަޝްރޫޢާއެކު، ރާއްޖެއަށް އެތެރެކުރާ ފޭރާމުގެ ބާވަތްތައް މަދުކޮށް ވަޒީފާގެ އިތުރު ފުރުޞަތުތައް އިތުރުކުރެވޭނެ ކަމަށްވެސް ބީސީސީން ވިދާޅުވެއެވެ.