ކުރީގެ މާލީ ވަޒީރު ޑރ. ޝަފީޤު އެޗްޑީއެފްސީގެ ބޯޑަށް

މާލީ ވަޒީރުގެ މަޤާމުގައި ކުރިން ހުންނެވި ޑރ. މުޙައްމަދު ޝަފީޤު ހައުސިން ޑިވެލޮޕްމަންޓް ފައިނޭންސް ކޯޕަރޭޝަން، އެޗްޑީއެފްސީގެ ބޯޑަށް އައްޔަންކުރައްވައިފިއެވެ.

ސަރުކާރު ހިއްސާވާ ކުންފުނިތަކުގެ ބޯޑަށް މެންބަރުން އައްޔަންކުރައްވަނީ ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑު، ޕީސީބީންނެވެ. އެ ބޯޑުގެ ވެބްސައިޓުން ދައްކާގޮތުގައި ޝަފީޤު އެޗްޑީއެފްސީގެ ބޯޑު މެމްބަރެއްގެގޮތުގައި އައްޔަންކުރައްވާފައިވަނީ މި މަހުގެ ދެވަނަ ދުވަހުއެވެ. އަދި އެޗްޑީއެފްސީގެ ބޯޑުން ޑރ. ޝަފީޤް ވަނީ އެކުންފުނީގެ ޗެއަރމަންގެ މަޤާމަށް ހަމަޖައްސަވާފައެވެ.

ޝަފީޤު ވަނީ މީގެކުރިން ވެސް އެޗްޑީއެފްސީގެ އިސް މަޤާމެއް އަދާކުރައްވާފައެވެ. އެގޮތުން، މި ސަރުކާރުގެ ފުރަތަމަ މާލީ ވަޒީރުގެ މަޤާމާ ހަވާލުވެވަޑައިގަތުމުގެ ކުރިން އޭނާ ހުންނެވީ އެޗްޑީއެފްސީގެ ފައިނޭންސް ހެޑްގެ މަޤާމުގައެވެ.

މާލީ ވަޒީރުގެ މަޤާމަށް ޝަފީޤު އައްޔަން ކުރެއްވީ 17 ނޮވެމްބަރ 2023ގައެވެ. އެ މަޤާމުން އޭނާ އިސްތިއުފާދެއްވީ މިއަހަރުގެ ސެޕްޓެމްބަރ މަހުގެ 30 ވަނަ ދުވަހުއެވެ.

އެޗްޑީއެފްސީއަކީ ގެދޮރު ގަތުމަށް ބޭނުންވާ މާލީ އެހީތެރިކަން ދިނުމަށް 2004 ވަނަ އަހަރު ރައީސުލްޖުމްހޫރިއްޔާގެ ޚާއްސަ ގަރާރެއްގެ ދަށުން، އުފެއްދި ކުންފުންޏެކެވެ. އެކުންފުނި ޕަބްލިކް ލިމިޓެޑް ކުންފުންޏަކަށް ބަދަލުކޮށް، ކުންފުނީގެ 51 އިންސައްތަ ހިއްސާ ބޭރުގެ ބައެއް ފަރާތްތަކަށް ވިއްކާލާފައި ވަނީ 2008 ވަނަ އަހަރުއެވެ.