"ސީމެކްސް" ބޯޓުން ދަތުރުކުރި ބިދޭސީ ފަޅުވެރިޔާ ނުފެނުނު، ހޯދުން މެދުކަނޑާލައިފި

އައްޑޫ ސިޓީން މާލެއަށް ދަތުރުކުރަމުންދިޔަ ބޯޓަކުން ގެއްލިގެން ރިޕޯޓްކުރި ބިދޭސީ މީހާ ހޯދުމަށް މިހާތަނަށް ކުރި މަސައްކަތުން އަދިވެސް އެމީހާ ފެނިފައި ނުވާކަމަށާއި އޭނާ ހޯދުމުގެ މަސައްކަތް މެދުކަނޑާލާފައިވާ ކަމަށް އެމްއެންޑީއެފްއިން ވިދާޅުވެއްޖެއެވެ.

ޤައުމީ ދިފަޢީ ބާރު، އެމްއެންޑީއެފްއިން ވިދާޅުވީ ގެއްލުނު ފަޅުވެރިޔާ ހޯދުމަށް އެމްއެންޑީއެފް ސަދަން އޭރިއާ ސްކޮޑްރަންއިން ސާޗް އޮޕަރޭޝަނެއް ހިންގާފައިވާ ކަމަށެވެ. މިހާދިސާއާ ގުޅިގެން ގެއްލުނު މީހާ ހޯދުން މިހާރު ވަނީ މެދުކަނޑާލާފައިވާއިރު މި މަހުގެ 17 އަދި 18 ވަނަ ދުވަހު 304 ނޯޓިކަލް މޭލުގެ ސަރަހައްދެއް ބަލައިފައިވާ ކަމަށް ވިދާޅުވިއެވެ.

މީގެ އިތުރުން، 19 ވަނަ ދުވަހު ފޯއްމުލަކު ގެ ވަށައިގެން ބަލައިފައިވާ ކަމަށާއި މި އޮޕަރޭޝަން ކުރިއަށްގެންގޮސްފައި ވަނީ ކަނޑުމަގުން ކަމަށްވެސް އެމްއެންޑީއެފުން ވިދާޅުވެއެވެ.

ދިވެހި ފުލުހުންގެ ޚިދުމަތުން ވިދާޅުވީ "ސީމެކްސް" ނަމަކަށް ކިޔާ ބޯޓުން ގެއްލިގެން ހޯދަމުންދަނީ އެ ބޯޓުގައި ފަޅުވެރިއެއްގެ ގޮތުގައި މަސައްކަތް ކުރަމުން ދިޔަ ނޭޕާލުގެ ރައްޔިތެއް ކަމަށްވާ ރާޖް ކުމާރެވެ.

ފުލުހުން ވިދާޅުވީ ބޯޓު އައްޑޫ ސިޓީން ފުރީ މި މަހުގެ 16ވަނަ ދުވަހުގެ ރޭ 11:30 ހާއިރު ކަމަށާއި ފުރިއިރު ރާޖް ކުމާރު ބޯޓުގައި ހުރި ކަމަށެވެ. އަދި އެރޭ ދަންވަރު 1:15 ހާއިރު ބޯޓުގެ ކެޕްޓަންއާ އޭނާ ވާހަކަދެއްކިކަމަށް މިހާތަނަށް ލިބިފައިވާ މައުލޫމާތުން އެނގޭކަމަށްވެސް ފުލުހުން ވިދާޅުވިއެވެ.

ރާޖް ކުމާރު ބޯޓުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލަކާ 8 މޭލަށް ކައިރިވެފައިވަނިކޮށްކަމަށް މައުލޫމާތު ލިބިފައިވާކަމަށްވެސް ފުލުހުން ވިދާޅުވެއެވެ.