ސައިކަލެއްގައި ދަނިކޮށް އަންހެނަކު ފޭރެން އުޅުނު މީހަކު ހައްޔަރުކޮށްފި

މާލޭގައި ސައިކަލެއް ދުއްވާފަދިޔަ އަންހެނަކު ފޭރެން އުޅުނު މީހަކު ފުލުހުންގެ ޚިދުމަތުން ހައްޔަރުކޮށްފިއެވެ.

ފުލުހުން ވިދާޅުވީ އިއްޔެ އަލިކިލެގެފާނު މަގުން ސައިކަލެއްގައި ދިޔަ އަންހެނަކު ހުއްޓުވައި ފޭރަން އުޅުނު މައްސަލައެއް ހުށަހަޅާފައިވާ ކަމަށެވެ. މި މައްސަލައިގެ ތުހުމަތުގައި ވިލިމާލެ، ފިޔަބަރިި އުމުރުން 30 އަހަރުގެ ހަސަން އިސާމު ހައްޔަރުކޮށްފައިވާ ކަމަށް ފުލުހުން ވިދާޅުވިއެވެ.

އޭނާ ހައްޔަރުކޮށްފައިވަނީ އިއްޔެ ހަވީރު 5:20 ހާއިރު ކަމަށާއި އޭނާގެ ސައިކަލު ތަހުގީގަށް ޓޯވ ކޮށްފައިވާ ކަމަށްވެސް ފުލުހުން ވިދާޅުވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި ސައިކަލްގައި އަންހެނަކު ދުއްވާފައި ދަނިކޮށް އޭނާގެ ފަހަތުން އައި ސައިކަލެއްގައި ހެލްމެޓް އަޅައިގެން ހުރި މީހަކު ވަނީ އޭނާގެ ކަރުގައި އޮތް ފަށް ފޭރެން މަސައްކަތް ކޮށްފައެވެ. އަދި ސައިކަލުން ފައިބައިގެން އަންހެންމީހާ ދާން އުޅުމުން ހެލްމެޓް އަޅައިގެން ހުރި ފިރިހެން މީހާ ވަނީ އޭނާ ފަހަތުންގޮސް ދަބަސް ފޭރެންވެސް މަސައްކަތް ކޮށްފައެވެ.

ނަމަވެސް މަގުމަތީގައި ގިނަ ބަޔަކު އެއްވުމުން އޭނާ ވަނީ އެ ސަރަހައްދުން ފިލާފައެވެ.