އެންމެ ހިންގުންތެރި ރަށު ކައުންސިލް އެވޯޑު، ޖެހިޖެހިގެން 4 ވަނަ ފަހަރަށް ބޮޑުފޮޅުދޫ ކައުންސިލަށް

ރާއްޖޭގެ އެންމެ ހިންގުންތެރި ކައުންސިލްގެ އެވޯޑު ޖެހިޖެހިގެން ހަތަރު ވަނަ ފަހަރަށް އަރިއަތޮޅު އުތުރުބުރި ބޮޑުފޮޅުދޫ ކައުންސިލުން ކާމިޔާބުކޮށްފިއެވެ.

އެ ކައުންސިލަށް މި އެވޯޑު ލިބިފައިވަނީ ރޭ ބޭއްވި 2023ވަނަ އަހަރުގެ ކަންގަތި އެވޯޑު ހަފްލާގައެވެ. މި އެވޯޑަކީ ލޯކަލް ކައުންސިލް ޕާރފޯމަންސް އިންޑެކްސްއިން އެންމެ މަތީ ވަނަތައް ހާސިލްކުރާ ކައުންސިލްތަކަށް 2015ވަނަ އަހަރުން ފެށިގެން ދެމުން އަންނަ އެވޯޑެކެވެ.

ކަންގަތި އެވޯޑަކީ އަތޮޅު ކައުންސިލްތަކާއި ރަށު ކައުންސިލްތަކުގެ ތެރެއިން ކޮންމެ އަހަރަކުވެސް އެންމެ ހިންގުންތެރި ކައުންސިލްތަކުގެ އަގުވަޒަންކުރުމުގެ ގޮތުން ލޯކަލް ގަވަރމަންޓް އޮތޯރިޓީން ދެމުން އަންނަ އެވޯޑެކެވެ. ލޯކަލް ކައުންސިލްތަކުގެ ޕަފޯމަންސް އިންޑެކްސް ބިނާވަނީ ކައުންސިލްތަކުން އެލްޖީއޭއަށް ހުށަހަޅާ ކިތާބީ ހެކިތަކަށެވެ.

ކަންގަތި އެވޯޑުގައި ކައުންސިލްތަކުގެ ޕަރފޯމަންސް އިންޑެކްސްއިން "ގަދަހަމާންތި" އަދި "ރަނިހަމާންތި" ދަރަޖަތަކަށް ވަނީ އެވޯޑު ދީފައެވެ. ގަދަހަމާންތި ދަރަޖައަކީ ލޯކަލް ކައުންސިލް ޕަފޯމަންސް އިންޑެކްސްއިން ވަނަތައް ހާސިލްކުރާ އަތޮޅު ކައުންސިލްތަކަށް ދެވޭ އެވޯޑެކެވެ. އަދި ރަނަހަމާންތި ދަރަޖައަކީ އެ އިންޑެކްސްއިން ވަނަތައް ހާސިލް ކުރާ ރަށު ކައުންސިލްތަކަށް ދޭ އެވޯޑެކެވެ.

ގަދަހާމަންތި ދަރަޖަ ލިބުނު ކައުންސިލްތައް

• 1ވަނަ: ހައްދުންމަތީ އަތޮޅު ކައުންސިލް
• 2ވަނަ: މިލަދުންމަޑުލު އުތުރުބުރީ އަތޮޅު ކައުންސިލް
• 3ވަނަ: ހުވަދުއަތޮޅު ދެކުނުބުރި އަތޮޅު ކައުންސިލް

ރަނަހަމާންތި ދަރަޖަ ލިބުނު ކައުންސިލްތައް

• 1ވަނަ: އަރިއަތޮޅު އުތުރުބުރި ބޮޑުފޮޅުދޫ ކައުންސިލް
• 2ވަނަ: ތިލަދުންމަތި އުތުރުބުރި ތުރާކުނު ކައުންސިލް
• 3ވަނަ: މާލެ އަތޮޅު ހިންމަފުށި ކައުންސިލް

މީގެ ތެރެއިން އެންމެ ހިންގުންތެރި ކައުންސިލްގެ އެވޯޑު އަރިއަތޮޅު އުތުރުބުރީ ބޮޑުފޮޅުދޫ ކައުންސިލުން ހާސިލުކުރާ މިއީ ހަތަރުވަނަ ފަހަރެވެ. އެ ކައުންސިލުން އަންނަނީ 2020ވަނަ އަހަރުން ފެށިގެން މި އެވޯޑު ހާސިލުކުރަމުންނެވެ.

ބޮޑުފޮޅުދޫ ކައުންސިލްގެ ރައީސް ޝުޖާޢު އާދަމް، ޕީއެސްއެމް ނިއުސްއަށް ވިދާޅުވީ އެ ރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި މުވައްޒަފުންގެ އެންމެ ބޮޑު އަމާޒަކީ އަހަރީ ޕްލޭންގައިވާ ކަންކަން އެގޮތުގައި ތަންފީޒުކުރުމާއި ރައްޔިތުންނާއި ގާތުން ހިދުމަތްދީ ރައްޔިތުންގެ އިތުބާރު އޮތް އިދާރާއަކަށް ހެދުން ކަމަށެވެ. އަދި ރަށުގެ ތަރައްޤީއާއި ގުޅުން އޮތް ހުރިހާ ކަމެއްގައި ސިޔާސީ ފިކުރު އެއްފަރާތްކޮށް އެކުގައި މަސަައްކަތް ކުރާ އެއްބައިވަންތަ ބައެއްގެ ގޮތުގައި ތިބުމަށް އިސްކަންދެއްވާ ކަމަށްވެސް ވިދާޅުވިއެވެ.

ޕަފޯމަންސް އިންޑެކްސް އިން "ކާންނާ ހަނދާނީ ފިލާ"، އަދި "މާރާދަ ހަނދާނީ ފިލާ" ލިބުނު ކައުންސިލްތައްވެސް ވަނީ މި ހަފްލާގައި ހޮވާފައެވެ. ކާންނާ ހަނދާނީ ފިލައަކީ 2022ވަނަ އަހަރާ އަޅާބަލާއިރު އެންމެ ބޮޑު ކުރިއެރުމެއް ހޯދި އަތޮޅު އަދި ރަށު ކައުންސިލަށް ދޭ އެވޯޑެކެވެ. މި އެވޯޑު ހާސިލް ކުރީ މިލަދުންމަޑުލު ދެކުނުބުރި އަތޮޅު ކައުންސިލާއި ހައްދުންމަތި މުންޑޫ ކައުންސިލުންނެވެ.

މާރާދަ ހަނދާނީ ފިލައަކީ އަތޮޅު އަދި ރަށު ކައުންސިލްގެ ރޭންކުން ކޮންމެ ސަބް އިންޑެކްސްއަކުން 1 ވަނަ ހާސިލްކުރާ ކައުންސިލްތަކަށް ދޭ އެވޯޑެކެވެ.

އެވޯޑު ލިބުނު ކައުންސިލްތައް

• ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އަމަލުކުރާ މިންވަރު ދައްކުވައިދޭ ސަބްއިންޑެކްސް: ތިލަދުންމަތި އުތުރުބުރި އަތޮޅު ކައުންސިލް، ފެލިދެއަތޮޅު ކެޔޮދޫ ކައުންސިލް
• އިފެކްޓިވްނެސް ސަބް އިންޑެކްސް: ހައްދުންމަތީ އަތޮޅު ކައުންސިލް، އަރިއަތޮޅު އުތުރުބުރި ބޮޑުފޮޅުދޫ ކައުންސިލް
• ޕާޓިސިޕޭޝަން ސަބްއިންޑެކްސް: ހައްދުންމަތީ އަތޮޅު ކައުންސިލް، އަރިއަތޮޅު އުތުރުބުރި ބޮޑުފޮޅުދޫ ކައުންސިލް
• އެކައުންޓެބިލިޓީ ސަބްއިންޑެކްސް: ހައްދުންމަތީ އަތޮޅު ކައުންސިލް، ކޮޅުމަޑުލު ބުރުނީ ކައުންސިލް
• ސެކިއުރިޓީ ސަބް އިންޑެކްސް: މިލަދުންމަޑުލު އުތުރުބުރީ އަތޮޅު ކައުންސިލް، އަރިއަތޮޅު އުތުރުބުރި ބޮޑުފޮޅުދޫ ކައުންސިލް

ލާމަރުކަޒީ ނިޒާމު ހަރުދަނާކޮށް، ހިންގުމުގެ އަސާސްތައް ކުރިއަރުވައި ރަށްވެހި ޚިދުމަތްތަކެއް ރައްޔިތުންނަށް ފޯރުކޮށްދިނުމުގެ އަގުވަޒަންކުރުމުގެގޮތުން "ހިރިހަމާންތި އެވޯޑު"ވެސް ވަނީ ދީފައެވެ. މި އެވޯޑު ލިބިފައިވަނީ މާލެ ސިޓީ ކައުންސިލާއި އައްޑޫ ސީޓީ ކައުންސިލާއި ފުވައްމުލައް ސިޓީ ކައުންސިލް އަދި ކުޅުދުއްފުށި ސިޓީ ކައުންސިލަށެވެ.

ކާންނަ އެވޯޑު ދިނުމަށް ބޭއްވި ރަސްމިއްޔާތުގައި ކައުންސިލްތަކުގެ ޕާފޯމަންސް އިންޑެކްސް ފޮތްވެސް ވަނީ ނެރުއްވާފައެވެ. މި ފޮތް ނެރެދެއްވީ ޚާރިޖީ ވަޒީރު ޑރ. ޢަބްދުﷲ ޚަލީލެވެ.